Available languages

Taxonomy tags

Info

References in this case

Share

Highlight in text

Go

SENTENZA TAL-QORTI TAL-ĠUSTIZZJA(l-Ewwel Awla)

12 ta' Jannar 2006 (*)

"Direttiva 69/335 – Taxxi indiretti fuq il-ġbir tal-kapital – Sistema nazzjonali li tintaxxa kumpannija (kumpannija sussidjarja) bid-dazju kapitali fir-rigward ta' kontribuzzjoni li saret mill-kumpannija parent tagħha (kumpannija grandparent) favur il-kumpannija sussidjarja tagħha (kumpannija sussidjarja tas-sussidjarja) – Dazju kapitali – Żieda fil-kapital – Ħlas fuq il-kont tal-premium ta' l-azzjonijiet" – Żieda fl-assi – Żieda fil-valur ta' l-ishma – Provvista ta' servizzi minn membru – Ħlas minn membru tal-membru – Ħlas lil kumpannija sussidjarja – Il-veru benefiċjarju veru – Ġbir tad-dazju kapitali darba waħda biss (fil-Komunità) – Artikolu 52 tat-Trattat KE (li sar, wara emenda, l-Artikolu 43 KE) – Libertà ta' stabbiliment – Prattika nazzjonali li teżenta l-kumpannija (kumpannija sussidjarja) mit-taxxa biss jekk il-kumpannija sussidjarja tagħha (kumpannija sussidjarja tas-sussidjarja) tkun ukoll stabblita f'dan l-Istat Membru"

Fil-kawża C-494/03,

li għandha bħala suġġett talba għal deċiżjoni preliminari skond l-Artikolu 234 KE, imressqa mill-Hoge Raad der Nederlanden (l-Olanda), permezz ta' deċiżjoni tal-21 ta' Novembru 2003, li waslet fil-Qorti tal-Ġustizzja fl-24 ta' Novembru 2003, fil-kawża

Senior Engineering Investments BV

vs

Staatssecretaris van Financiën

IL-QORTI TAL-ĠUSTIZZJA (l-Ewwel Awla),

komposta minn P. Jann (Relatur), President ta' Awla, N. Colneric,  J. N. Cunha Rodrigues, M. Ilešič u E. Levits, Imħallfin,

Avukat Ġenerali: M. Poiares Maduro,

Reġistratur: M. Ferreira, Amministratur Prinċipali,

wara li rat il-proċedura bil-miktub u wara s-seduta tas-26 ta' Mejju 2005,

wara li rat is-sottomissjonijiet ippreżentati:

–       għal Senior Engineering Investments BV, minn H. T. P.M. van den Hurk u G. Weening, belastingadviseurs,

–       għall-Gvern Olandiż, minn H. G. Sevenster u J. van Bakel, kif ukoll minn M. de Grave, bħala aġenti,

–       għall-Kummissjoni tal-Komunitajiet Ewropej, minn R. Lyal u A. Weimar, bħala aġenti,

wara li semgħet il-konklużjonijiet ta' l-Avukat Ġenerali ippreżentati fis-seduta ta' l-14 ta' Lulju 2005,

tagħti l-preżenti

Sentenza

1       It-talba għal deċiżjoni preliminari tirrigwarda l-interpretazzjoni ta' l-Artikoli 2 u 4 tad-Direttiva tal-Kunsill tas-17 ta' Lulju 1969 li tikkonċerna taxxi indiretti fuq il-ġbir tal-kapital 69/335 (KEE) (ĠU L 249, p. 25), kif emendata permezz tad-Direttiva tal-Kunsill ta' l-10 ta' Ġunju 1985 (ĠU L 156, p. 23, iktar 'il quddiem id-"Direttiva 69/335"), kif ukoll ta' l-Artikolu 52 tat-Trattat KE (li sar, wara emenda, l-Artikolu 43KE).

2       Din it-talba ġiet ippreżentata fil-kuntest ta' kawża bejn il-kumpannija Senior Engineering Investments BV (iktar 'il quddiem "Senior BV" jew il-"kumpannija sussidjarja") u Staatssecretaris van Financïen dwar il-ġbir ta' dazju kapitali fir-rigward ta' kontribuzzjoni finanzjarja f'kapital mogħtija mill-kumpannija parent (tagħha), Senior Engineering Investments Ltd (iktar 'il quddiem "Senior Ltd" jew il-"kumpannija grandparent") fuq ħlas "fil-kont tal-premium ta' l-azzjonijiet" ta' kumpannija sussidjarja tagħha, Senior Engineering Trading Gesellschaft für Autozulieferteile mbH (iktar 'il quddiem "Senior GmbH" jew il-"kumpannija sussidjarja tas-sussidjarja").

 Il-kuntest ġuridiku

 Il-leġiżlazzjoni Komunitarja

3       Kif jirriżulta mill-ewwel u t-tieni premessi tagħha, id-Direttiva 69/335 tippromwovi l-moviment liberu tal-kapital, libertà li hija kkunsidrata bħala essenzjali għall-ħolqien ta' suq intern. F'dan ir-rigward, id-Direttiva hija intiża sabiex telimina l-ostakli fiskali fil-qasam tal-ġbir tal-kapital, fosthom, b'mod partikolari, il-kontribuzzjonijiet ta' kapital effettwati mill-memembri jew mill-azzjonisti lill-kumpanniji tagħhom.

4       Għal dan il-għan, l-Artikoli 1 sa 9 tad-Direttiva 69/335 jipprovdu għall-impożizzjoni dazju armonizzat fuq il-kontribuzzjonijiet ta' kapital lil kumpanniji (iktar 'il quddiem id-"dazju kapitali").

5       Skond is-sitt premessa tad-Direttiva 69/355 dan id-dazju kapitali huwa impost darba biss fil-Komunità u għandu jkun ta' l-istess livell fl-Istati Membri kollha.

6       Għaldaqstant, skond (it-termini) ta' l-Artikolu 2(1) ta' din id-Direttiva, "[l]-operazzjonijiet soġġetti għal dazju kapitali għandhom biss ikunu taxxabbli fl-Istat Membru li fit-territorju tiegħu iċ-ċentru effettiv ta' amministrazzjoni ta' kull kumpannija kapitali ikun jinsab fiż-żmien meta dawn l-operazzjonijiet iseħħu".

7       L-Artikolu 4 tad-Direttiva 69/335 jistabbilixxi l-lista ta' operazzjonijiet li l-Istati Membri jistgħu jew għandhom, skond il-każ, jissoġġettaw għad-dazju kapitali (iktar 'il quddiem il-"kontribuzzjonijiet ta' kapital lil kumpanniji").

8       B'hekk l-Artikolu 4(1)(c) ta' din id-Direttiva jiddisponi li l-Istati Membri għandhom jissoġġettaw għal dazju kapitali iż-"żieda fil-kapital ta' kumpannija kapitali bil-kontribuzzjoni ta' assi ta' kull tip".

9       Skond il-paragrafu 2(b) ta' din l-istess dispożizzjoni, l-Istati Membri jistgħu jissoġġettaw għal dazju kapitali "żieda fl-assi ta' kumpannija kapitali permezz tal-provvista ta' servizzi minn membru [jew azzjonista] li ma tinvolvix żieda fil-kapital tal-kumpannija, imma li tirriżulta f'varjazzjoni fid-drittijiet fil-kumpannija jew li tista' żżid il-valur ta' l-ishma [jew ta' l-azzjonijiet] tal-kumpannija".

10     Madankollu, skond l-Artikolu 7(2) tad-Direttiva 69/355, "[l]-Istati Membri jistgħu […] jeżentaw mid-dazju kapitali l-operazzjonijiet l-oħra kollha barra dawk imsemmija fil-paragrafu 1 [peress illi dawn ta' l-aħħar huma dejjem eżentati] […]".

  Il-leġiżlazzjoni nazzjonali

11     L-Artikolu 32(1) tal-Wet op de belastingen van rechtsverkeer (liġi fuq l-intaxxar ta' tranżazzjonijiet legali), ta' l-24 ta' Diċembru 1970 (Stb. 1970, Nru 611), kif emendata permezz tal-liġi tat-13 ta' Diċembru 1996 (Stb. 1996, Nru 652), jiddisponi li, taħt l-isem "kapitaalbelasting" (dazju kapitali) hija imposta fuq il-ġbir ta' kapital maqsum f'azzjonijiet għal entitajiet stabbiliti fl-Olanda.

12     Skond l-Artikolu 34(c) u (d) ta' din il-liġi, "ġbir ta' kapital maqsum f'azzjonijiet" tfisser "il-ġbir ta' kapital li għalih ingħataw azzjonijiet bonus jew azzjonijiet fundaturi jew oħrajn, li jagħtu dritt għal sehem mill-profitt jew minn dak li jifdal wara x-xoljiment jew l-istralċ" kif ukoll "l-għoti ta' kapital minn azzjonista jew persuna li żamm azzjonijiet bonus jew azzjonijiet fundaturi, jew oħrajn, mingħajr ma jingħataw espressament id-drittijiet imsemmija fil-paragrafu (c)".

13     L-Artikolu 63 tal-Algemene wet inzake rijksbelastingen (liġi ġenerali fuq it-taxxa), tat-2 ta' Lulju 1959 (Stb. 1959, Nru 301), fih klawżola li tissejjaħ ta' hardship li fuq il-bażi tagħha l-Ministru jew is-Segretarju ta' l-Istat għall-Finanzi jista' jirrimedja f'ċerti sitwazzjonijiet jew f'ċerti kategoriji ta' sitwazzjonijiet, inġustizzji sproporzjonati li jistgħu jirriżultaw fl-applikazzjoni tal-liġi fiskali.

  Il-miżuri ta' implementazzjoni

14     Il-qorti tar-rinviju tikkonstata li, fil-mument tal-fatti rilevanti, ir-Renju ta' l-Olanda kien isegwi politika li permezz tagħha kontribuzzjoni mogħtija minn kumpannija grandparent lil kumpannija sussidjarja tas-sussidjarja tagħha kienet, bħala prinċipju, kkunsidrata bħala operazzjoni taxxabbli kemm fir-rigward tal-kumpannija sussidjarja kif ukoll fir-rigward tal-kumpannija sussidjarja tas-sussidjarja. Madankollu, jekk it-tnejn li huma kienu stabbiliti fl-Olanda, permezz tal-klawżola ta' hardship, il-kumpannija sussidjarja tas-sussidjarja biss kienet taxxabbli.

15     Il-Gvern Olandiż josserva mandankollu li, fir-rigward tal-kumpanniji sussidjarji tas-sussidjarji stabbiliti barra l-Olanda, l-ispettur tat-taxxi jista' wkoll jirrinunzja għall-ġbir tad-dazju kapitali minn kumpannija sussidjarja, meta dazju kapitali kien diġà ġie impost barra mill-pajjiż fuq il-kumpannija sussidjarja tas-sussidjarja.

16     Skond il-Gvern Olandiż, il-politika segwita mir-Renju ta' l-Olanda tikkonsisti b'hekk pjuttjost, għal raġunijiet ta' ekwità u sabiex tiġi evitata taxxa doppja fi ħdan grupp ta' kumpanniji, fl-eżenzjoni ta' kumpannija sussidjarja f'kull każ fejn il-kumpannija sussidjarja tas-sussidjarja tkun diġà ġiet intaxxata (fl-Olanda jew barra mill-pajjiż) u mhux biss fil-każ fejn din ta' l-aħħar hija stabbilita fl-Olanda. Fil-fatt, fiż-żewġ każijiet, l-impożizzjoni tad-dazju kapitali fuq il-kumpannija sussidjarja tkun (inġusta) skond il-klawżola ta' hardship.

 Il-kawża prinċipali u d-domandi preliminari

17     Senior BV hija kumpannija ta' responsabbiltà limitata inkorportata fl-Olanda li għandha l-ishma kollha tagħha miżumuma minn kumpannija inkorporata fl-Ingilterra, Senior Ltd. Senior BV iżżomm, min-naħa tagħha, l-ishma kollha fil-kumpannija inkorporata fil-Ġermanja, Senior GmbH.

18     Fit-8 ta' Diċembru 1997, il-kumpannija grandparent, Senior Ltd tat kontribuzzjoni ta' 10 071 000 DEM (jiġifieri 11 349 000 NLG) lill-kumpannija sussidjarja tas-sussidjarja tagħha, Senior GmbH.

19     Fil-Ġermanja, din l-operazzjoni ma kienet ġiet suġġetta għal ebda imposta pagabbli minn Senior GmbH, peress illi dan l-Istat Membru kien, fuq il-bażi ta' l-Artikolu 7(2) tad-Direttiva 69/335, neħħa d-dazju kapitali mill-1 ta' Jannar 1992.

20     Fl-Olanda, Senior BV kellha tħallas ammont ta' 113 490 NLG bħala dazju kapitali.

21     Senior BV b'hekk ressqet rikors li permezz tiegħu hija kkontestat il-validità ta' din it-tassazzjoni. Peress illi dan ir-rikors kien ġie miċħud mill-ispettur tat-taxxi kif ukoll mill-Gerechtshof te's-Gravenhage, Senior BV appellat quddiem il-Qorti tall-Kassazzjoni kontra d-deżizjoni mogħtija minn dan ta' l-aħħar.

22     Peress li kellha dubju fuq il-kompatibilità mad-dritt Komunitajru tas-sistema Olandiża li timponi minn naħa waħda, dazju kapitali, fuq, kumpannija (kumpannija sussidjarja) fir-rigward ta' kontribuzzjoni mogħtija mill-kumpannija prinċipali tagħha (kumpannija grandparent) lis-sussidjarja tagħha (kumpannija sussidjarja tas-sussidjarja), imma li teżenta min-naħa l-oħra, minn din it-taxxa, kumpannija (kumpannija sussidjarja), meta l-kumpannija sussidjaraja tagħha (kumpannija sussidjarja tas-sussidjarja) tkun ukoll stabbilita fl-Olanda, il-Hoge Raad der Nederlanden iddeċidiet li tissospendi l-proċedimenti u li tagħmel is-segwenti domandi għal deċiżjoni preliminari lill-Qorti tal-Ġustizzja:

"1. L-Artikolu 4(2)(b) tad-Direttiva [69/335], jippermetti li jiġi impost dazju kapitali fuq kumpannija fir-rigward ta' kontribuzzjoni finanzjarja informali mogħtija direttament mill-kumpannija parent ta' din il-kumpannija lill-kumpannija sussidjara ta' din il-kumpannija u, jekk iva, liema huma ċ-ċirkostanzi rilevanti f'dan ir-rigward? B'mod partikolari, huwa rilevanti li din il-kumpannija tkun meqjusa mill-perspettiva ekonomika, bħala il-"vera benefiċjarja" […] ta' din il-kontribuzzjoni finanzjarja informali mogħtija direttament?

2.      Il-liberta ta' stabbiliment prevista mill-Artikolu 52 [tat-Trattat KE] flimkien ma' l-Artikolu 58 [tat-Trattat KE (li sar, wara emenda, l-Artikolu 48KE)], jipprojbixxi lill-amministrazzjoni fiskali ta' Stat Membru milli japplika l-politika segwenti: kumpannija ma tħallasx dazju kapitali fuq il-kontribuzzjoni finanzjarja informali mogħtija direttament mill-kumpannija parent tagħha lill-kumpannija sussidjarja tagħha jekk din ta' l-aħħar tkun stabbilita f'dan l-Istat Membru. F'din l-evalwazzjoni huwa rilevanti l-fatt li fuq il-livell tal-grupp multinazzjonali, ikun ġie impost dazju kapitali aktar għoli milli dak impost li kieku din il-kumpannija u l-kumpannija sussidjarja tagħha kienu stabbiliti fl-Olanda, peress li f'dan il-każ id-Direttiva tippermetti li dazju kapitali jiġi impost kemm fuq din il-kumpannija, kif ukoll fuq il-kumpannija sussidjarja tagħha?"

 Fuq id-domandi preliminari

 Fuq l-ewwel domanda: l'impożizzjoni ta' dazju kapitali (Artikolu 4(1)(c) u (2)(b) tad-Direttiva 69/335)

23     Permezz ta' l-ewwel domanda tagħha, il-qorti tar-rinviju essenzjalment tistaqsi, jekk, f' ċirkostanzi bħal dawk fil-kawża prinċipali, id-Direttiva 69/335 tipprojbixxix li Stat Membru jimponi dazju kapitali fuq kumpannija (kumpannija sussidjarja) fir-rigward ta' kontribuzzjoni mogħtija mill-kumpannija parent tagħha (kumpannija grandparent) lis-sussidjarja tagħha (kumpannija sussidjarja tas-sussidjarja).

24     F'dan ir-rigward, għandu jiġi mfakkar li d-Direttiva 69/335 tipprovdi, fl-Artikoli 1 sa 9 tagħha għall-impożizzjoni ta' dazju kapitali armonizzat fuq il-kontribuzzjonijiet ta' kapital lil kumpanniji.

25     Skond l-istruttura u l-iskema tad-Direttiva 69/335, dan id-dazju kapitali huwa impost fuq kumpannija li tirċievi l-kontribuzzjoni in kwistjoni. Din normalment tkkun il-kumpannija li lilha jingħataw fiżikament ir-riżorsi u s-servizzi in kwistjoni. Huwa biss eċċezzjonalment li jista' jkun mod ieħor u li jkun meħtieġ li jiġi identifikat il-"vera benefiċjarju" tar-riżorsi jew tas-servizzi in kwistjoni (ara, b'mod partikolari, rigward kontribuzzjoni finanzjarja mogħtija lil sussidjarji tal-kumpannija li żiedet il-kapital tagħha, is-sentenza tas-17 ta' Ottubru 2002, ESTAG, C-339/99, Ġabra p. I-8837 punti 44 sa 47).

26     Minbarra dan, jirriżulta mis-sitt premessa u mill-Artikolu 2 tad-Direttiva 69/335, li kontribuzzjoni ta' kapital lil kumpannija hija taxxabbli darba waħda biss (fil-Komunità) (ara, f'dan is-sens, b'mod partikolari, is-sentenzi ta' l-20 ta' April 1993, Ponente Carni u Cispadana Costruzioni, C-71/91 u C-178/91, Ġabra p. I-1915, punt 19, u tas-17 ta' Diċembru 1998, Codan, C-236/97, Ġabra p. I-8679, punt 27).

27     Fil-kawża prinċipali, jirriżulta mill-fatti deskritti mill-qorti tar-rinviju li l-kontribuzzjoni in kwistjoni kienet ġiet mogħtija lill-kumpannija sussidjarja tas-sussidjarja (Senior GmbH) fil-kuntest ta' kontribuzzjoni favur tagħha. Min-naħa l-oħra, dawn il-fatti bl-ebda mod ma jippermettu li jiġi affermat li ċirkostanzi tal-kawża prinċipali jikkostitwixxu, sitwazzjoni eċċezzjonali fejn kumpannija oħra, bħal, per eżempju, il-kumpannija sussidjarja (Senior BV) għandha tiġi kkunsidrata bħala li kienet il-"vera benefiċjarja" ta' din il-kontribuzzjoni.

28     Għaldaqstant għandu jiġi eżaminat jekk, skond ir-regoli tad-Direttiva 69/335, il-kontribuzzjoni in kwistjoni hijiex soġġetta għal dazju kapitali pagabbli mill-kumpannija sussidjarja tas-sussidjarja (Senior GmbH). Jekk dan ikun il-każ, din l-istess kontribuzzjoni ma tistax, fil-fatt, tkukn soġġetta għal taxxa pagabbli minn kumpannija oħra, f'dan il-każ mill-kumpannija sussidjarja (Senior BV).

29     F'dan ir-rigward, l-Artikolu 4 tad-Direttiva 69/335 jiddefinixxi l-operazzjonijiet li l-Istati Membri jistgħu jew għandhom, skond il-każ, jissoġġettaw għad-dazju kapitali (ara, f'dan is-sens, b'mod partikolari, is-sentenzi tat-18 ta' Marzu 1993, Viessman, C-280/91, Ġabra p. I-971, punt 12, u tas-27 ta' Ottubru 1998, Agas, C-152/97, Ġabra p. I-6553, punti 19 u 20).

30     Peress illi l-operazzjoni in kwistjoni fil-kawża prinċipali tikkostitwxxi kontribuzzjoni finanzjarja mogħtija minn kumpannija grandparent (Senior Ltd) lill-kumpannija sussidjarja tas-sussidjarja tagħha (Senior GmbH), hija tista', bħala prinċipju, tiġi analizzata fid-dawl kemm ta' l-Artikolu 4(1)(c) tad-Direttiva 69/335, kif ukoll ta' l-Artikolu 4(2)(b) tagħha.

31     B'hekk, l-Artikolu 4(1)(c) ta' din id-Direttiva jipprovdi għall-impożizzjoni ta' dazju kapitali fir-rigward taż-żieda fil-kapital ta' kumpannija bil-kontribuzzjoni ta' assi ta' kull tip.

32     L-Artikolu 4(2)(b) ta' din l-istess Direttiva jiddisponi li l-Istati Membri jistgħu jissoġġettaw għal dazju kapitali ż-żieda fl-assi ta' kumpannija permezz tal-provvista ta' servizzi minn membru (jew azzjonista) li ma tinvolvix żieda fil-kapital tal-kumpannija, imma li tista' żżid il-valur ta' l-ishma (jew ta' l-azzjonijiet) tal-kumpannija.

33     Meta jitqabblu dawn iż-żewġ dispożizzjonijiet, għandu jiġi kkonstatat, kif għamel il-Gvern Olandiż, li ż-"żieda fil-"kapital" skond l-Artikolu 4(1)(c) tad-Direttiva 69/335 timplika ż-żieda formali tal-kapital tal-kumpannija kemm permezz ta' ħruġ ta' ishma jew azzjonijiet ġodda, kif ukoll permzz ta' żieda fil-valur nominali ta' l-ishma jew azzjonijiet eżistenti (ara, f'dan is-sens, fuq in-natura tal-kapital, is-sentenzi tal-15 ta' Lulju 1982, Felicitas Rickmers-Linie, 270/81, Ġabra p. 2771, punt 15, u tat-2 ta' Frar 1988, Dansk Sparinvest, 36/86, Ġabra p. 409, punt 13).

34     Min-naħa l-oħra u safejn l-assi huma definiti bħala l-beni kollha li l-membri kkontribwixxew ma' kwalunkwe żieda fil-valur tagħhom (ara, f'dan is-sens, is-sentenza tat-28 ta' Marzu 1990, Siegen, C-38/88, Ġabra p. I-1447, punt 12), iż-"żieda fl-assi" skond l-Artikolu 4(2)(b) ta' din id-Direttiva tinkludi, bħala prinċipju, kull forma ta' żieda fl-attiv ta' kumpannija. Għaldaqstant, il-Qorti tal-Ġustizzja kkwalifikat bħala "żieda fl-assi" skond din id-dispożizzjoni, per eżempju, trasferiment tal-profitti (ara s-sentenza tat-13 ta' Ottubru 1992, Weber Haus, C-49/91, Ġabra p. I-5207, punt 10), self mingħajr interessi (ara, b'mod partikolari, is-sentenza tas-17 ta' Settembru 2002, Norddeutsche Gesellschaft zur Beratung und Durchführung von Entsorgungsaufgaben bei Kernkraftwerken, C-392/00, Ġabra p. I-7397, punt 18) assunzjoni ta' telf (ara s-sentenza Siegen, iċċitata iktar 'il fuq, punt 13), ir-rinunzja għal kreditu (ara s-sentenza tal-5 ta' Frar 1991, Deltakabel, C-15/89, Ġabra p. I-241, punt 12).

35     Fil-kawża prinċipali, il-kontribuzzjoni in kwistjoni kienet ġiet imħallsa fuq "il-kont tal-premium ta' l-azzjonijiet" tal-kumpannija sussidjarja tas-sussidjarja (Senior GmbH). Safejn ħlas fuq "il-kont tal-premium ta' l-azzjonijiet" ma jinvolvix "żieda fil-kapital", din il-kontribuzzjoni ma taqax taħt l-Artikolu 4(1)(c) tad-Direttiva 69/335.

36     Il-kontribuzzjoni in kwistjoni madankollu taqa' taħt il-kamp ta' applikazzjoni ta' l-Artikolu 4(2)(b) ta' din id-Direttiva.

37     Fil-fatt, fl-ewwel lok, l-għoti tal-kontribuzzjoni finanzjarja in kwistjoni "żiedet l-assi" tal-kumpannija sussidjarja tas-sussidjarja (Senior GmbH).

38     Fit-tieni lok, din il-kontribuzzjoni "tista' żżid il-valur ta' l-ishma" fl-istess kumpannija. Sussegwentement għal din il-kontribuzzjoni, l-ishma fil-kumpannija sussidjarja tas-sussidjarja (Senior GmbH) de facto għandhom valur għola.

39     Fit-tielet lok, il-kontribuzzjoni in kwistjoni tippreżenta ruħha bħala "provvista ta' servizzi minn membru". Fil-fatt, huwa veru li din il-kontribuzzjoni ngħatat mhux minn membru ta' Senior GmbH (Senior BV), imma mill-kumpannija parent ta' din ta' l-aħħar (Senior Ltd), b'hekk minn membru tal-membru. Madankollu, għandu jiġi mfakkar li l-Qorti tal-Ġustizzja adottat fir-rigward ta' l-oriġini ta' kontribuzzjoni approċċ informali, ibbażat fuq l-attribuzzjoni reali tagħha (ara, f'dan is-sens, is-sentenzi ċċitati, Weber Haus, punti 11 u 13; ESTAG, punti 37 sa 39 kif ukoll 41, u tas-17 ta' Ottubru 2002, Develop, C-71/00, Ġabra p. I-8877, punti 25 sa 29). Peress illi l-kontribuzzjoni in kwistjoni kienet ġiet mogħtija, mill-kumpannija grandparent (Senior Ltd) lill-kumpannija sussidjarja tas-sussidjarja (Senior GmbH) sabiex iżżid il-valur ta' l-ishma f'din ta' l-aħħar u peress illi din iż-żieda kienet fuq kollox fl-interess ta' l-uniku membru tiegħu, jiġifieri (Senior BV), għandu jiġi kkonstat li din il-kontribuzzjoni għandha tiġi attribwita lil din ta' l-aħħar, jiġifieri Senior BV. B'hekk din hija "provvista ta' servizzi minn membru" skond l-Artikolu 4(2)(b) tad-Direttiva 69/335.

40     Minn dan isegwi li, skond ir-regoli tad-Direttiva 69/335, il-kontribuzzjoni in kwistjoni fil-kawża prinċipali hija soġġetta għal dazju kapitali pagabbli mill-kumpannija sussidjarja tas-sussidjarja (Senior GmbH).

41     Peress illi, skond l-Artikolu 2(1) tad-Direttiva 69/335, moqri flimkien mas-sitt premessa tagħha, kontribuzzjoni ta' kapital lil kumpannija tista' tiġi ntaxxata darba waħda biss (fil-Komunità), din il-kontribuzzjoni ma tistax tkun soġġetta għal tassazzjoni darb'oħra, din id-darba pagabbli mill-kumpannija sussidjarja (Senior BV).

42     F'dan ir-rigward, ftit jimporta li l-kontribuzzjoni in kwistjoni kienet eventwalment żiedet l-assi tal-kumpannija sussidjarja wkoll (Senior BV). Fil-fatt, għandu jiġi kkonstatat, kif osserva l-Avukat Ġenerali fil-punt 21 tal-konklużjonijiet tiegħu, li tali żieda hija biss effett ekonomiku awtomatiku u aċċessorju tal-kontribuzzjoni magħmula favur il-kumpannija sussidjarja tas-sussidjarja (Senior GmbH). B'hekk din iż-żieda mhijiex dovuta għal kontribuzzjoni oħra li hi distinta, u li tista', bħala tali, tkun soġġetta għat-taxxa.

43     Bl-istess mod, ftit jimporta li l-Istat Membru kompetenti, skond l-Artikolu 2(1) tad-Direttiva 69/335, biex jintaxxa l-kumpannija sussidjarja tas-sussidjarja (Senior GmbH), jiġifieri r-Repubblika Federali tal-Ġermanja, ma kienx, fir-realtà, intaxxa din il-kumpannija minħabba li d-dazju kapitali kien ġie mħassar mill-1 ta' Jannuar 1992. L-Istati Membri huma fil-fatt, skond l-Artikolu 7(2) tad-Direttiva 69/335, liberi li jeżentaw mid-dazju kapitali l-kontribuzzjonijiet ta' kapital lil kumpanniji, mingħajr ma dik l-eżenzjoni jkollha bħala konsegwenza li tippermetti lil Stat Membru ieħor li jintaxxhom. Għall-kuntrarju, id-Direttiva 69/335 tiffavorixxi u tinkuraġġixxi kemm l-eżenzjonijiet speċifiċi mid-dazju kapitali (Artikoli 7(1) u (3), 8 u 9, kif ukoll it-tħassir sħiħ tagħha (Artikolu 7(2)). Din id-Direttiva b'hekk ma tistax tiġi nterpretata b'mod li tippermetti lil Stat Membru li japprofitta, sabiex iżid id-dħul fiskali tiegħu, mit-temperanza fiskali ta' Stat Membru ieħor.

44     Għaldaqstant, fid-dawl ta' dak li ntqal qabel, it-tweġiba għall-ewwel domanda għandha tkun li, f'ċirkostanzi bħal dawk tal-kawża prinċipali, l-Artikolu 4(2)(b) tad-Direttiva 69/335, moqri flimkien ma' l-Artikolu 2(1) u s-sitt premessa tagħha tipprojbixxi li Stat Membru jimponi dazju kapitali fuq kumpannija (kumpannija sussidjarja) fir-rigward ta' kontribuzzjoni mogħtija mill-kumpannija parent (kumpannija grandparent) lis-sussidjarja tagħha (kumpannija sussidjarja tas-sussidjarja).

 Fuq it-tieni domanda: id-dritt għall-libertà ta' stabbiliment (Artikolu 52 tat-Trattat KE)

45     Fid-dawl tat-tweġiba mogħtija għall-ewwel domanda, m'hemmx lok li tingħata tweġiba għat-tieni domanda.

 Fuq l-ispejjeż

46     Peress li l-proċedura għandha, fir-rigward tal-partijiet fil-kawża prinċipali, in-natura ta' kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni ta' l-osservazzjonijiet lill-Qorti, barra dawk ta' l-imsemmija partijiet, ma jistgħux jitħallsu lura.

Għal dawn il-motivi, il-Qorti tal-Ġustizzja (l-Ewwel Awla) taqta' u tiddeqiedi:

F'ċirkostanzi bħal dawk tal-kawża prinċipali, l-Artikolu 4(2)(b) tad-Direttiva tal-Kunsill tas-17 ta' Lulju 1969 li tikkonċerna taxxi indiretti fuq il-ġbir tal-kapital (69/335/KEE), kif emendata permezz tad-Direttiva tal-Kunsill ta' l-10 ta' Ġunju 1985 (85/303/KEE), moqri flimkien ma' l-Artikolu 2(1) u s-sitt premessa tagħha, tipprojbixxi li Stat Membru jimponi dazju kapitali fuq kumpannija (kumpannija sussidjarja) fir-rigward ta' kontribuzzjoni mogħtija mill-kumpannija parent (kumpannija grandparent) lis-sussidjarja tagħha (kumpannija sussidjarja tas-sussidjarja).

Firem

* Lingwa tal-kawża: l-Olandiż.