Available languages

Taxonomy tags

Info

References in this case

References to this case

Share

Highlight in text

Go

Kawża C-594/10

T.G. van Laarhoven

vs

Staatssecretaris van Financiën

(talba għal deċiżjoni preliminari
mressqa mill-Hoge Raad der Nederlanden)

“Sitt Direttiva tal-VAT — Dritt għal tnaqqis tat-taxxa tal-input imħallsa — Limitazzjoni — Użu ta’ proprjetà mobbli li tifforma parti mill-assi tal-impriża għall-bżonnijiet privati tal-persuna taxxabbli — Trattament fiskali tal-użu privat ta’ oġġett li jifforma parti mill-assi tal-impriża”

Sommarju tas-sentenza

Dispożizzjonijiet fiskali — Armonizzazzjoni tal-leġiżlazzjonijiet — Taxxi fuq id-dħul mill-bejgħ — Sistema komuni ta’ taxxa fuq il-valur miżjud — Tranżazzjonijiet taxxabbli — Valur taxxabbli — Użu mill-persuna taxxabbli, għal finijiet kemm professjonali kif ukoll privati, ta’ vetturi li jifformaw parti mill-assi tal-impriża tagħha

(Direttiva tal-Kunsill 77/388, l-ewwel subparagrafu tal-Artikolu 6(2)(a) u Artikolu 11A(1)(c))

L-ewwel subparagrafu tal-Artikolu 6(2)(a) tas-Sitt Direttiva 77/388, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima, kif emendata bid-Direttiva 95/7, moqri flimkien mal-Artikolu 11A(1)(c) ta’ din l-istess direttiva, għandu jiġi interpretat fis-sens li jipprekludi leġiżlazzjoni fiskali nazzjonali li inizjalment tawtorizza lil persuna taxxabbli li l-vetturi bil-mutur tagħha huma użati għal finijiet kemm professjonali kif ukoll privati, tnaqqas immedjatament u totalment it-taxxa fuq il-valur miżjud tal-input imħallsa, iżda li sussegwentement tipprevedi, fir-rigward tal-użu privat ta’ dawn il-vetturi, taxxa annwali bbażata, għad-determinazzjoni tal-valur taxxabbli tat-taxxa fuq il-valur miżjud dovuta għal sena finanzjarja partikolari, fuq metodu ta’ kalkolu fiss tal-ispejjeż relatati ma’ tali użu, li ma jqisx, b’mod proporzjonali, l-portata reali tiegħu.

(ara l-punt 38 u d-dispożittiv)







SENTENZA TAL-QORTI TAL-ĠUSTIZZJA (It-Tielet Awla)

16 ta’ Frar 2012 (*)

“Sitt Direttiva tal-VAT — Dritt għal tnaqqis tat-taxxa tal-input imħallsa — Limitazzjoni — Użu ta’ proprjetà mobbli li tifforma parti mill-assi tal-impriża għall-bżonnijiet privati tal-persuna taxxabbli — Trattament fiskali tal-użu privat ta’ oġġett li jifforma parti mill-assi tal-impriża”

Fil-Kawża C-594/10,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Hoge Raad der Nederlanden (il-Pajjiżi l-Baxxi), permezz ta’ deċiżjoni tad-29 ta’ Ottubru 2010, li waslet fil-Qorti tal-Ġustizzja fis-17 ta’ Diċembru 2010, fil-proċedura

T.G. van Laarhoven

vs

Staatssecretaris van Financiën,

IL-QORTI TAL-ĠUSTIZZJA (It-Tielet Awla),

komposta minn K. Lenaerts, President tal-Awla, J. Malenovský, R. Silva de Lapuerta (Relatur), E. Juhász u D. Šváby, Imħallfin,

Avukat Ġenerali: J. Kokott,

Reġistratur: M. Ferreira, Amministratur,

wara li rat il-proċedura bil-miktub u wara s-seduta tal-10 ta’ Novembru 2011,

wara li kkunsidrat l-osservazzjonijiet ippreżentati:

–        għal T.G. van Laarhoven, minnu stess,

–        għall-Gvern Olandiż, minn C. Wissels u M. Bulterman, bħala aġenti,

–        għall-Gvern tar-Renju Unit, minn C. Murrell, bħala aġent,

–        għall-Kummissjoni Ewropea, minn L. Lozano Palacios u W. Roels, bħala aġenti,

wara li semgħet il-konklużjonijiet tal-Avukat Ġenerali, ippreżentati fis-seduta tat-8 ta’ Diċembru 2011,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikolu 17(6) tas-Sitt Direttiva tal-Kunsill 77/388/KEE, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima (ĠU Edizzjoni Speċjali bil-Malti, Kapitolu 9, Vol. 1, p. 23), kif emendata bid-Direttiva tal-Kunsill 95/7/KE, tal-10 ta’ April 1995 (ĠU Edizzjoni Speċjali bil-Malti, Kapitolu 9, Vol 1, p. 27, iktar ’il quddiem is-“Sitt Direttiva”).

2        Din it-talba tressqet fil-kuntest ta’ kawża bejn T.G. van Laarhoven u s-Staatssecretaris van Financiën (Segretarju tal-Istat għall-Finanzi) dwar it-taxxa fuq il-valur miżjud (iktar ’il quddiem il-“VAT”) dovuta fuq l-użu, għall-bżonnijiet privati tal-persuna taxxabbli, ta’ vetturi bil-mutur li jifformaw parti mill-patrimonju tal-impriża tiegħu.

 Il-kuntest ġuridiku

 Id-dritt tal-Unjoni

3        Skont l-Artikolu 2 tas-Sitt Direttiva “[d]awn li ġejjin għandhom ikunu soġġetti [għall-VAT] […] il-provvista ta’ oġġetti u servizzi magħmula bi ħlas fit-territorju tal-pajjiż minn persuna taxxabbli li taġixxi bħala tali”.

4        L-ewwel subparagrafu tal-Artikolu 6(2)(a) ta’ din id-direttiva jqis bħala provvista ta’ servizzi bi ħlas “l-użu ta’ oġġetti li jifformaw parti mill-assi ta’ negozju għall-użu privat ta’ persuna taxxabbli jew tal-persunal tiegħu jew b’mod iktar ġenerali għal skopijiet oħra barra dawk tan-negozzju tiegħu fejn [il-VAT] fuq dawn l-oġġetti hija deduċibbli kollha jew parti minnha”.

5        Skont l-Artikolu 11A(1)(c) tas-Sitt Direttiva, l-ammont taxxabbli huwa magħmul minn “fir-rigward ta’ provvisti msemmija fl-Artikolu 6(2), l-ispejjeż kollha lill-persuna taxxabbli tal-provvediment tas-servizzi”.

6        L-Artikolu 17 tal-istess direttiva, fil-verżjoni tagħha li tirriżulta mill-Artikolu 28f tagħha jipprovdi:

“1. Id-dritt li tnaqqas għandu jqum fl-istess ħin meta t-taxxa mnaqqsa ssir taxxabbli.

2. Sakemm il-merkanzija u s-servizi jintużaw għall-iskop tat-transazzjonijiet taxxabbli tagħha, il-persuna taxxabbli tkun intitolata li tnaqqas mit-taxxa li għandu jħallas:

(a)      [VAT] dovuta jew mħallsa ġewwa t-territorju tal-pajjiz rigward l-oġġetti jew is-servizzi pprovduti jew li għad għandhom jiġu forniti lilu minn persuna taxxabli oħra;

[...]

6. Qabel perjodu ta’ erba’ snin ta’ l-inqas ikunu għaddew mid-data tad-dħul fis-seħħ ta’ din id-Direttiva, il-Kunsill, jaġixxi unanimament fuq proposta mill-Kummissjoni, għandu jiddeċiedi liema nefqa m’għandiex tkun eleġġibli għal tnaqqis tat-taxxa fuq il-valur miżjud. It-taxxa fuq il-valur miżjud fl-ebda ċirkostanza m’għandha tkun imnaqqsa fuq spejjeż li mhux strettament nefqa tan-negozju, bħal dik fuq il-lussu, pjaċiri jew divertiment.

Sa kemm ir-regoli ta’ fuq jidħlu fis-seħħ, Stati Membri jistgħu iżommu l-esklużjonijiet kollha pprovduti taħt il-liġijiet nazzjonali meta din id-Direttiva tidħol fis-seħħ.

[...]”

7        L-Artikolu 20(1) u (2) tas-Sitt Direttiva jipprovdi:

“1. It-tnaqqis inizzjali għandu jkun aġġustat b’mod konformi mal-proċeduri stabbiliti mill-Istati Membri b’mod partikolari:

(a)      fejn it-tnaqqis jkun ogħla jew inqas minn dak li għalih l-persuna taxxabbli hi ntitolata;

(b)      fejn wara li jsir il-prospett xi tibdil isir fil-fatturi użati biex jiddeterminaw l-ammont li għandu jitnaqqas, b’mod partikolari fejn ix-xirjiet huma kanċellati jew roħs fil-prezz hu miksub; madanakollu, aġġustamenti m’għandhomx isiru fil-każijiet ta’ transazzjonijiet li jibqgħu totalment jew parzjalment mhux imħallsa u distrutti, telf jew serq tal-proprjetà verament ippruvati jew ikkonfermati, lanqas fil-każ ta’ applikazzjonijiet għall-iskopijiet ta’ għoti ta’ regali ta’ valur żgħir u ta’ l-għoti ta’ kampjuni speċifikati fl-Artikolu 5(6). Madanakollu, Stati Membri jistgħu jeħtieġu aġġustamenti fil-każijiet ta’ transazzjonjiet li jibqgħu totalment jew parzjalment mhux imħallsa u ta’ serq.

2. Fil-każ ta’ oġġetti kapitali, l-aġġustment għandu jkun mifrux fuq ħames snin inkluż dik meta l-oġġetti jkunu akkwistati jew fabbrikati. L-aġġustament annwali għandu jsir biss fir-rigward ta’ wieħed minn ħamsa tat-taxxa imposta fuq l-oġġetti. L-aġġustament għandu jsir fuq bażi tal-varjazzjonijet fit-tnaqqis intitolat fis-snin konsekwenti b’ relazzjoni għal dik is-sena meta l-oġġetti kienu akkwistati jew fabbrikati.

[...]”

 Il-leġiżlazzjoni nazzjonali

8        L-Artikolu 2 tal-Liġi tal-1968 dwar it-taxxa fuq id-dħul mill-bejgħ (Wet op de omzetbelasting 1968, iktar ’il quddiem il-“liġi dwar il-VAT”) jipprovdi:

“Għandha titnaqqas mit-taxxa dovuta fuq il-provvista ta’ oġġetti u ta’ servizzi t-taxxa dovuta fuq il-provvista ta’ oġġetti u ta’ servizzi intiża għall-imprenditur, fuq ix-xiri intra-Komunitarju ta’ oġġetti mwettaq minnu u fuq l-importazzjonijiet ta’ oġġetti intiżi għalih.”

9        L-Artikolu 15 tal-liġi dwar il-VAT jipprovdi kif ġej:

“1. It-taxxa msemmija fl-Artikolu 2 li titnaqqas mill-imprenditur tikkorrispondi:

a)      għat-taxxa li tkun ġiet ikkalkolata fuq fattura stabbilita skont ir-regoli fis-seħħ minn imprendituri oħra, matul il-perijodu tad-dikjarazzjoni, fir-rigward ta’ provvisti ta’ oġġetti u ta’ servizzi mwettqa favur l-imprenditur;

[...]

6.      Ir-regoli dwar it-tnaqqis tat-taxxa huma stabbiliti permezz ta’ digriet ministerjali meta l-oġġetti u s-servizzi huma wkoll użati mill-imprenditur għall-finijiet oħra għajr għall-operazzjonjiet intaxxati tiegħu […]. Ir-regoli dwar it-tnaqqis tat-taxxa huma stabbiliti permezz ta’ digriet ministerjali meta vettura hija użata mill-imprenditur għal finijiet privati wkoll. F’dan il-kuntest, huwa possibbli li jiġi previst li l-esklużjoni ta’ merkanzija użata mill-imprenditur fl-impriża tiegħu ma hijiex meħuda inkunsiderazzjoni.

[...]”

10      L-Artikolu 15(1) tad-digriet ta’ applikazzjoni tal-Liġi tal-1968 dwar it-taxxa fuq il-valur miżjud (Uitvoeringsbeschikking omzetbelasting 1968, iktar ’il quddiem id-“digriet dwar il-VAT”), adottat skont l-Artikolu 15(6) ta’ din il-liġi jipprovdi:

“It-taxxa dovuta fuq il-pussess — inkluż ix-xiri — mill-operatur ta’ vettura bil-mutur użata wkoll għal skopijiet oħra barra fil-kuntest tal-impriża (użu privat) hija l-ewwel imnaqqsa daqs li kieku l-vettura kienet użata biss fil-kuntest tal-impriża, sussegwentement, fid-dawl tal-użu privat tagħha, ammont ta’ taxxa ta’ 12 % huwa dovut, annwalment, fuq l-ammont tal-ispejjeż li, għall-finijiet tat-taxxa fuq id-dħul, huma kkunsidrati bħala taxxabbli jekk il-vettura, għal finijiet ta’ din it-taxxa, kienet ġiet inkluża fl-assi tal-impriża. F’dan ir-rigward, l-użu tal-vettura għal finijet privati huwa stabbilit abbażi tad-differenza bejn it-total tal-kilometri magħmula bil-vettura f’sena finanzjarja u t-total tal-kilometri magħmula, meta tinġabar it-taxxa fuq id-dħul, għall-impriża. Din it-taxxa hija dovuta matul l-aħħar perijodu fiskali tas-sena.”

 Il-kawża prinċipali u d-domandi preliminari

11      T.G. van Laarhoven jopera uffiċċju ta’ konsultazzjoni dwar it-taxxa fil-forma ta’ impriża individwali. Fl-2006, żewġ vetturi bil-mutur ġew suċċessivament inklużi fl-assi tal-impriża. T.G. van Laarhoven uża ż-żewġ vetturi għal finijiet kemm professjonali kif ukoll privati.

12      Matul din is-sena, T.G. van Laarhoven għamel iktar minn 500 kilometru għal finijiet privati b’dawn il-vetturi. Fid-dikjarazzjoni tal-VAT tiegħu relatata mal-perijodu bejn l-1 ta’ Ottubru u l-31 ta’ Diċembru 2006, huwa indika, fir-rigward ta’ dan l-użu privat u fid-dawl tal-Artikolu 15 tad-digriet dwar il-VAT, ammont ta’ EUR 538 dovut taħt din it-taxxa u huwa ħallas ta’ dan l-ammont.

13      Madankollu, T.G. van Laarhoven ressaq talba intiża sabiex jikseb ir-rimbors ta’ dan l-ammont. Peress li din it-talba ġiet miċħuda permezz ta’ deċiżjoni tal-Ispettur huwa ppreżenta rikors quddiem ir-Rechtbank te Breda kontra din id-deċiżjoni dwar ċaħda. Peress li, permezz ta’ sentenza tat-3 ta’ Marzu 2008, din tal-aħħar ċaħdet dan ir-rikors bħala infondat il-persuna taxxabbli ppreżentat appell fil-kassazzjoni minn din is-sentenza quddiem il-Hoge Raad der Nederlanden.

14      Billi bbażat ruħha fuq l-Artikolu 17(6) tas-Sitt Direttiva, din tal-aħħar ikkunsidrat li r-Renju tal-Pajjiżi l-Baxxi kien adotta leġiżlazzjoni fiskali li tirrestrinġi t-tnaqqis tal-VAT għall-vetturi bil-mutur użati minn operatur f’kuntest li ma huwiex dak tal-attività professjonali tiegħu. Din il-leġiżlazzjoni, riprodotta fl-Artikolu 15(6) tal-liġi dwar il-VAT, moqri flimkien mal-Artikolu 15(1) tad-digriet dwar il-VAT, tipprovdi li l-VAT imposta fuq ix-xiri ta’ tali vetturi hija, l-ewwel nett, imnaqqsa daqs li kieku dawn kienu użati biss fil-kuntest tal-attività professjonali. Sussegwentement, ammont ta’ VAT għal tali użu privat huwa impost annwalment fuq l-operatur. Dan l-ammont huwa kkalkolat abbażi ta’ perċentwali fissa tal-ammont fiss tal-ispejjeż li, għall-finijiet tal-ġbir tat-taxxa fuq id-dħul, huma kkunsidrati li ma sarux għall-attività professjonali. Dan l-ammont fiss huwa fih innifsu stabbilit abbażi ta’ perċentwali tal-prezz li jinsab fil-katalgu jew tal-valur ta’ kull vettura.

15      Il-qorti tar-rinviju tindika wkoll li saru ċertu numru ta’ emendi, wara d-dħul fis-seħħ tas-Sitt Direttiva, li emendaw l-Artikolu 15(1) tad-digriet dwar il-VAT. Minn naħa, il-perċentwali fissa msemmija iktar ’il fuq ġiet emendata diversi drabi u, min-naħa l-oħra, l-ammont taxxabbli li fir-rigward tiegħu din il-perċentwali fissa hija applikata żdied. Ġeneralment dawn l-emendi għal dan id-digriet kellhom effett negattiv għall-persuna taxxabbli fir-rigward tal-ammont ikkunsidrat bħala użu privat ta’ vettura li tifforma parti mill-assi tal-impriża u, konsegwentement, fuq l-ammont tat-tnaqqis tal-VAT.

16      Fid-dawl ta’ dawn il-kunsiderazzjonijiet, il-Hoge Raad der Nederlanden iddeċidiet li tissospendi l-proċeduri u li tagħmel lill-Qorti tal-Ġustizzja d-domandi preliminari li ġejjin:

“1)      Il-tieni subparagrafu tal-Artikolu 17(6) tas-Sitt Direttiva jipprekludi emendi għal leġiżlazzjoni li tillimita [l-possibbiltajiet ta’] tnaqqis bħal dik inkwistjoni, skont liema Stat Membru jkun fittex li jieħu vantaġġ mill-possibbiltà, li għaliha dik id-dispożizzjoni tipprovdi, [li jeskludi t-tnaqqis] ([jew] li tinżamm […] l-esklużjoni ta[t-] tnaqqis[)] fir-rigward ta’ ċerti oġġetti u servizzi jekk, bħala konsegwenza ta’ dawk l-emendi, l-ammont eskluż mit-tnaqqis żdied f’ħafna każijiet, iżda l-approċċ u l-iskema tal-leġiżlazzjoni li tillimita t-tnaqqis baqgħu ma nbidlux?

2)      Jekk it-tweġiba għall-ewwel domanda tkun fl-affermattiv, il-qrati nazzjonali għandhom jevitaw li japplikaw il-leġiżlazzjoni li tillimita t-tnaqqis fl-intier tagħha, jew huwa biżżejjed għalihom li ma japplikawx il-leġiżlazzjoni sa fejn tkun żiedet il-portata tal-esklużjoni jew tar-restrizzjoni eżistenti fil-mument meta s-Sitt Direttiva daħlet fis-seħħ?”

 Fuq id-domandi preliminari

 Osservazzjonijiet preliminari

17      Hemm lok li jiġi kkonstatat li d-domanda, hekk kif magħmula mill-qorti tar-rinviju, tirrigwarda l-interpretazzjoni tal-Artikolu 17(6) tas-Sitt Direttiva.

18      Il-qorti tar-rinviju tirreferi għal din id-dispożizzjoni tas-Sitt Direttiva, peress li hija tqis li l-leġiżlazzjoni fiskali Olandiża li tat lok għall-kawża prinċipali, jiġifieri l-Artikolu 15(1) tad-digriet dwar il-VAT, tikkostitwixxi regola li tirrestrinġi d-dritt għal tnaqqis tal-VAT tal-input imħallsa fil-mument tax-xiri ta’ vettura bil-mutur li hija inkluża fl-assi tal-impriża mill-persuna taxxabbli kkonċernata, iżda li hija wkoll użata għal finijiet privati minn din tal-aħħar.

19      Fid-dawl ta’ din il-kunsiderazzjoni u b’kunsiderazzjoni għall-fatt li l-leġiżlazzjoni fiskali inkwistjoni fil-kawża prinċipali ġiet emendata diversi drabi wara d-dħul fis-seħħ tas-Sitt Direttiva fil-Pajjiżi l-Baxxi, il-qorti tar-rinviju tistaqsi dwar il-konformità tal-Artikolu 15(1) tad-digriet dwar il-VAT mal-Artikolu 17(6) ta’ din id-direttiva.

20      F’dan ir-rigward għandu jitfakkar li t-tieni subparagrafu tal-Artikolu 17(6) tas-Sitt Direttiva, li huwa ta’ natura derogatorja, jawtorizza lill-Istati Membri jżommu il-leġiżlazzjoni eżistenti tagħhom fil-qasam tal-esklużjoni tad-dritt għal tnaqqis, fid-data tad-dħul fis-seħħ tas-Sitt Direttiva, sakemm il-Kunsill jadotta d-dispożizzjonijiet previsti fl-ewwel subparagrafu tal-Artikolu 17(6) (ara s-sentenzi tal-14 ta’ Ġunju 2001, Il-Kummissjoni vs Franza, C-345/99, Ġabra p. I-4493, punt 19, kif ukoll tal-11 ta’ Diċembru 2008, Danfoss u AstraZeneca, C-371/07, Ġabra p. I-9549, punt 28).

21      Il-qorti tar-rinviju tqis li l-emendi suċċessivi tal-leġiżlazzjoni fiskali Olandiża setgħu wasslu għal restrizzjoni tad-dritt għal tnaqqis ikbar minn dik li tirriżulta mid-dispożizzjonijiet applikabbli fid-data tad-dħul fis-seħħ tas-Sitt Direttiva, peress li tali limitazzjoni setgħet teċċedi s-setgħa mogħtija lill-Istati Membri, skont dan it-tieni subparagrafu tal-Artikolu 17(6).

22      Madankollu, għandu jiġi rrilevat li, skont l-ewwel parti tal-ewwel sentenza tal-Artikolu 15(1) tad-digriet dwar il-VAT, it-taxxa mħallsa meta tinxtara vettura bil-mutur użata f’kuntest barra dak tal-impriża hija immedjatament u totalment imnaqqsa, daqs li kieku din il-vettura kienet użata biss għal finijiet professjonali. Huwa biss sussegwentement li, skont it-tieni parti ta’ din il-frażi, l-użu privat tal-vettura huwa suġġett għal taxxa fissa.

23      Għaldaqstant, dan l-Artikolu 15(1) jagħmel distinzjoni bejn it-tnaqqis immedjat u totali tal-VAT tal-input imħallsa u t-teħid inkunsiderazzjoni mill-aspett fiskali tal-użu privat tal-vettura fi stadju sussegwenti, jiġifieri fil-kuntest tal-kalkolu tat-taxxa fuq id-dħul tal-operatur ikkonċernat fl-aħħar tal-perijodu fiskali tas-sena taxxabbli inkwistjoni.

24      Minn dan jirriżulta li l-proċess fiskali li huwa s-suġġett tal-kwistjoni fil-kawża prinċipali bl-ebda mod ma jippreġudika d-dritt għal tnaqqis tal-VAT fir-rigward tax-xiri ta’ vettura bil-mutur użata għal finijiet kemm professjonali kif ukoll privati minn operatur u għaldaqstant ma jistax jiġi kklassifikat bħala limitazzjoni għad-dritt għal tnaqqis tal-VAT imħallsa max-xiri ta’ din il-vettura.

25      Dan il-proċess jista’ jitqies li huwa konformi mal-ġurisprudenza stabbilita tal-Qorti tal-Ġustizzja li skontha, f’każ ta’ użu ta’ oġġett kapitali kemm għal finijiet professjonali kif ukoll privati, il-persuna taxxabbli għandha l-għażla, għall-iskopijiet tal-VAT, jew li tinkludi dan l-oġġett fl-intier tiegħu fl-assi tal-impriża tagħha, jew li żżommu fl-intier tiegħu fl-assi privat tagħha billi teskludih kompletament mis-sistema tal-VAT, jew ukoll li tinkludih fl-impriża tagħha biss għal dak li huwa użu professjonali effettiv (ara s-sentenzi tal-14 ta’ Lulju 2005, Charles u Charles-Tijmens, C-434/03, Ġabra p. I-7037, punt 23 u ġurisprudenza ċċitata, kif ukoll tal-14 ta’ Settembru 2006, Wollny, C-72/05, Ġabra p. I-8297, punt 21).

26      Jekk il-persuna taxxabbli tagħżel li tittratta oġġett kapitali użat kemm għal finijiet professjonali kif ukoll għal finijiet privati bħala oġġett tal-impriża, il-VAT tal-input dovuta fuq ix-xiri ta’ dan l-oġġett hija fil-prinċipju mnaqqsa totalment u immedjatament (ara s-sentenzi ċċitati iktar ’il fuq Charles u Charles-Tijmens, punt 24, kif ukoll Wollny, punt 22).

27      Madankollu, f’tali każ, id-dritt għal tnaqqis totali u immedjat tal-VAT imħallsa fil-mument tax-xiri jwassal għall-obbligu korrispondenti li titħallas il-VAT fuq l-użu privat tal-oġġett tal-impriża (ara s-sentenzi ċċitati iktar ’il fuq Charles u Charles-Tijmens, punt 30, kif ukoll Wollny, punt 24). Għal dan il-għan, l-ewwel subparagrafu tal-Artikolu 6(6)(a) tas-Sitt Direttiva jittratta l-użu għal finijiet privati bħall-provvista ta’ servizzi mwettqa bi ħlas, b’mod li l-persuna taxxabbli għandha, skont l-Artikolu 11A(1)(c) tal-istess direttiva, tħallas il-VAT fuq l-ispejjeż relatati ma’ dan l-użu (ara s-sentenza tat-8 ta’ Mejju 2003, Seeling, C-269/00, Ġabra p. I-4101, punti 42 u 43).

28      Għaldaqstant, f’dawn iċ-ċirkustanzi u fid-dawl tal-ġurisprudenza msemmija fit-tliet punti preċedenti, hemm lok li d-domandi magħmula mill-qorti tar-rinviju jiġu mifhuma bħala li huma intiżi sabiex jiġi magħruf b’liema mod għandhom jiġu interpretati d-dispożizzjonijiet tas-Sitt Direttiva dwar l-intaxxar tal-użu privat ta’ vettura bil-mutur li tifforma parti mill-assi ta’ impriża.

29      Il-fatt li l-qorti nazzjonali, mill-aspett formali, ifformulat id-domandi preliminari billi rreferiet għal dispożizzjoni tas-Sitt Direttiva applikabbli għal sitwazzjonijiet differenti ma jipprekludix lill-Qorti tal-Ġustizzja milli tipprovdi lil din il-qorti l-elementi ta’ interpretazzjoni kollha li jistgħu jkunu utli sabiex tiddeċiedi l-kawża mressqa quddiemha, irrispettivament minn jekk tagħmilx jew le riferiment għalihom fil-formulazzjoni tad-domandi tagħha (ara, f’dan is-sens, is-sentenza tal-15 ta’ Lulju 2010, Pannon Gép Centrum, C-368/09, Ġabra p. I-7467, punt 33 u l-ġurisprudenza ċċitata).

 Fuq id-domandi preliminari

30      Fid-dawl ta’ dak kollu li jippreċedi, hemm lok li jiġi kkunsidrat li, permezz taż-żewġ domandi tagħha, li għandhom jiġu eżaminati flimkien, il-qorti tar-rinviju essenzjalment tistaqsi jekk l-ewwel subparagrafu tal-Artikolu 6(2)(a) tas-Sitt Direttiva moqri flimkien mal-Artikolu 11(1)(c) tagħha, għandux jiġi interpretat fis-sens li jipprekludi leġiżlazzjoni fiskali nazzjonali li inizjalment tawtorizza lil persuna taxxabbli li l-vetturi bil-mutur tagħha huma użati għal finijiet kemm professjonali kif ukoll privati, tnaqqas immedjatament u totalment il-VAT tal-input imħallsa, iżda li sussegwentement tipprevedi, fir-rigward tal-użu privat ta’ dawn il-vetturi, taxxa annwali bbażata, għad-determinazzjoni tal-valur taxxabbli tal-VAT dovuta għal sena finanzjarja partikolari, fuq metodu ta’ kalkolu fiss tal-ispejjeż relatati ma’ tali użu.

31      Fir-rigward ta’ din it-taxxa u hekk kif tfakkar fil-punt 27 ta’ din is-sentenza, l-Artikolu 11A(1)(c) tas-Sitt Direttiva jipprevedi li t-tassazzjoni għandha ssir abbażi tal-ammont tas-ispejjeż sostnuti mill-persuna taxxabbli għat-twettiq tal-provvista ta’ servizzi inkwistjoni (ara s-sentenzi Charles u Charles-Tijmens, iċċitata iktar ’il fuq punt 25, kif ukoll tat-23 ta’ April 2009, Puffer, C-460/07, Ġabra p. I-3251, punt 41).

32      Minn dak kollu li jippreċedi jirriżulta li, sabiex il-qorti tar-rinviju tkun tista’ tingħata indikazzjonijiet utli, għandu jiġi interpretat il-kunċett ta’ “l-ispejjeż kollha lill-persuna taxxabbli tal-provvediment tas-servizzi”, stabbilit fl-imsemmi Artikolu 11A(1)(c).

33      F’dan ir-rigward, għandu minn naħa jiġi rrilevat, hekk kif għamlet l-Avukat Ġenerali fil-punti 28 u 29 tal-konklużjonijiet tagħha, li għalkemm l-Istati Membri għandhom ċertu marġni ta’ diskrezzjoni fir-rigward tal-prinċipji li jirregolaw id-determinazzjoni tal-ammont ta’ dawn l-ispejjeż, marġni li jawtorizza, sa ċertu punt, metodi ta’ kalkolu fiss, għandu madankollu jiġi ggarantit li ffissar eventwali tal-metodi ta’ kalkolu tal-VAT dovuta mill-persuna taxxabbli jissodisfa b’mod partikolari l-prinċipju ta’ proporzjonalità, fis-sens li tali determinazzjoni fissa għandha neċessarjament tkun proporzjonata mal-portata tal-użu privat tal-oġġett inkwistjoni.

34      Fil-fatt, filwaqt li jgawdu minn tali marġni ta’ diskrezzjoni, l-Istati Membri huma obbligati josservaw l-għan li fuqu huwa bbażat l-Artikolu 11A(1)(c) tas-Sitt Direttiva, jiġifieri li jiġi ddeterminat il-valur taxxabbli li jikkorrispondi għall-użu privat ta’ dawn l-oġġetti.

35      Min-naħa l-oħra, id-determinazzjoni tal-ammont tal-ispejjeż sostnuti mill-persuna taxxabbli għandha tevita li tagħti lil din tal-aħħar, li tuża tali oġġett li jifforma parti mill-assi tal-impriża tagħha wkoll għal finijiet privati, vantaġġ ekonomiku inġustifikat fir-rigward ta’ konsumatur finali, li jirriżulta mill-fatt li din il-persuna taxxabbli tnaqqas VAT li hija ma kellhiex dritt tagħmel (ara, f’dan is-sens, is-sentenza Wollny, iċċitata iktar ’il fuq, punt 35).

36      F’dawn iċ-ċirkustanzi, hija l-qorti nazzjonali, li hija l-unika li għandha ġurisdizzjoni sabiex tinterpreta d-dritt nazzjonali, li għandha tevalwa, fir-rigward tal-elementi hekk ipprovduti mill-Qorti tal-Ġustizzja, jekk il-metodi ta’ kalkolu tal-valur taxxabbli tal-VAT dovuta minħabba l-użu privat tal-oġġett li jifforma parti mill-assi tal-impriża, previsti mil-leġiżlazzjoni fiskali Olandiża, jistgħux jitqiesu bħala konformi mal-kunċett ta’ “l-ispejjeż kollha lill-persuna taxxabbli tal-provvediment tas-servizzi”, skont l-Artikolu 11A(1)(c) tas-Sitt Direttiva.

37      Għal dan il-għan, hija l-qorti tar-rinviju li għandha tinterpreta, sa fejn huwa possibbli, id-dritt nazzjonali tagħha fid-dawl tat-test u tal-għan ta’ din id-dispożizzjoni tas-Sitt Direttiva sabiex jintlaħqu r-riżultati mixtieqa minn din tal-aħħar, billi tagħti preferenza lil dik l-interpretazzjoni tar-regoli nazzjonali li hija l-iktar konformi ma’ dan l-għan sabiex b’hekk tasal għal soluzzjoni kompatibbli mad-dispożizzjonijiet tal-imsemmija direttiva u billi jekk ikun hemm bżonn ma tapplikax kull dispożizzjoni kuntrarja tal-liġi nazzjonali (ara s-sentenza tat-22 ta’ Diċembru 008, Magoogra, C-414/07, Ġabra p. I-10921, punt 44 u l-ġurisprudenza ċċitata).

38      Fid-dawl tal-osservazzjonijiet preċedenti, hemm lok li r-risposta għad-domandi magħmula tkun li l-ewwel subparagrafu tal-Artikolu 6(2)(a) tas-Sitt Direttiva moqri flimkien mal-Artikolu 11A(1)(c) ta’ din l-istess direttiva, għandu jiġi interpretat fis-sens li jipprekludi leġiżlazzjoni fiskali nazzjonali li inizjalment tawtorizza lil persuna taxxabbli li l-vetturi bil-mutur tagħha huma użati għal finijiet kemm professjonali kif ukoll privati, tnaqqas immedjatament u totalment il-VAT tal-input imħallsa, iżda li sussegwentement tipprevedi, fir-rigward tal-użu privat ta’ dawn il-vetturi, taxxa annwali bbażata, għad-determinazzjoni tal-valur taxxabbli tal-VAT dovuta għal sena finanzjarja partikolari, fuq metodu ta’ kalkolu fiss tal-ispejjeż relatati ma’ tali użu, li ma jqisx, b’mod proporzjonali, l-portata reali tiegħu.

 Fuq l-ispejjeż

39      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi:

L-ewwel subparagrafu tal-Artikolu 6(2)(a) tas-Sitt Direttiva tal-Kunsill 77/388/KEE, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima, kif emendata bid-Direttiva tal-Kunsill 95/7/KE, tal-10 ta’ April 1995 moqri flimkien mal-Artikolu 11A(1)(c) ta’ din l-istess direttiva, għandu jiġi interpretat fis-sens li jipprekludi leġiżlazzjoni fiskali nazzjonali li inizjalment tawtorizza lil persuna taxxabbli li l-vetturi bil-mutur tagħha huma użati għal finijiet kemm professjonali kif ukoll privati, tnaqqas immedjatament u totalment it-taxxa fuq il-valur miżjud tal-input imħallsa, iżda li sussegwentement tipprevedi, fir-rigward tal-użu privat ta’ dawn il-vetturi, taxxa annwali bbażata, għad-determinazzjoni tal-valur taxxabbli tat-taxxa fuq il-valur miżjud dovuta għal sena finanzjarja partikolari, fuq metodu ta’ kalkolu fiss tal-ispejjeż relatati ma’ tali użu, li ma jqisx, b’mod proporzjonali, l-portata reali tiegħu.

Firem

* Lingwa tal-kawża: l-Olandiż.