Available languages

Taxonomy tags

Info

References in this case

Share

Highlight in text

Go

SENTENZA TAL-QORTI TAL-ĠUSTIZZJA (Is-Seba’ Awla)

17 ta’ Lulju 2014 (*)

“VAT — Direttiva 2006/112/KE — Artikoli 16 u 18 — Leasing finanzjarju — Oġġetti li jkunu s-suġġett ta’ kuntratt ta’ leasing — Nuqqas ta’ rkupru ta’ dawn l-oġġetti mill-kumpannija ta’ leasing wara r-rexissjoni tal-kuntratt — Oġġetti nieqsa”

Fil-Kawża C-438/13,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Curtea de Apel Bucureşti (ir-Rumanija), permezz ta’ deċiżjoni tad-9 ta’ April 2013, li waslet fil-Qorti tal-Ġustizzja fit-2 ta’ Awwissu 2013, fil-proċedura

BCR Leasing IFN SA

vs

Agenţia Naţională de Administrare Fiscală — Direcţia generală de administrare a marilor contribuabili,

Agenţia Naţională de Administrare Fiscală — Direcţia generală de soluţionare a contestaţiilor,

IL-QORTI TAL-ĠUSTIZZJA (Is-Seba’ Awla),

komposta minn J. L. da Cruz Vilaça, President tal-Awla, G. Arestis u A. Arabadjiev (Relatur), Imħallfin,

Avukat Ġenerali: M. Szpunar,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–        għal SC BCR Leasing IFN SA, minn D. Dascălu, avukat,

–        għall-Gvern Rumen, minn R. H. Radu, bħala aġent,

–        għall-Kummissjoni Ewropea, minn G.-D. Balan u L. Lozano Palacios, bħala aġenti,

wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikoli 16 u 18 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1, iktar ’il quddiem id-“Direttiva tal-VAT”).

2        Din it-talba tressqet fil-kuntest ta’ kawża bejn BCR Leasing IFN SA (iktar ’il quddiem “BCR Leasing”) u l-Agenţia Naţională de Administrare Fiscală — Direcţia generală de administrare a marilor contribuabili u l-Agenţia Naţională de Administrare Fiscală — Direcţia generală ta’ soluţionare u contestaţiilor (iktar ’il quddiem, flimkien, l-“Agenţia”), dwar il-ħlas tat-taxxa fuq il-valur miżjud (iktar ’il quddiem il-“VAT”) fuq oġġetti mikrija fil-kuntest ta’ kuntratt ta’ leasing, iżda li rriżultaw nieqsa wara li ma ngħatawx lura lill-kumpannija ta’ leasing.

 Il-kuntest ġuridiku

 Id-Direttiva tal-VAT

3        L-Artikolu 2(1) tad-Direttiva tal-VAT huwa redatt kif ġej:

“It-transazzjonijiet li ġejjin għandhom ikunu soġġetti għall-VAT:      

(a)      il-provvista ta’ merkanzija magħmula bi ħlas fit-territorju ta’ Stat Membru minn persuna taxxabbli li taġixxi bħala tali;

[...]”

4        L-Artikolu 14 tad-Direttiva tal-VAT jipprovdi:

“1.      ‘Provvista ta’ merkanzija’ għandha tfisser it-trasferiment tad-dritt ta’ sid li jiddisponi minn proprjetà tanġibbli.

2.      Flimkien mat-transazzjonijiet imsemmija fil-paragrafu 1, kull waħda minn dawn li ġejjin għandha tiġi kkunisdrata bħala provvista ta’ merkanzija:

[...]

(b)      il-konsenja materjali ta’ merkanzija skont kuntratt għall-kiri ta’ merkanzija għal ċertu żmien, jew għall-bejgħ ta’ merkanzija bi ħlas akkont, li jipprovdi li normalment proprjetà għandha tgħaddi mhux aktar tard minn meta jsir l-aħħar ħlas akkont;

[...]”

5        L-Artikolu 16 ta’ din id-direttiva jipprovdi:

“L-applikazzjoni [użu] minn persuna taxxabbli ta’ merkanzija li tifforma parti mill-assi tan-negozju tagħha għall-użu privat tagħha jew tal-persunal tagħha, jew biex issir it-tneħħija tagħhom mingħajr ħlas jew, b’mod iktar ġenerali, l-applikazzjoni tagħhom għal skopijiet barra dawk tan-negozju tagħha għandhom jitqiesu bħala provvista bi ħlas, fejn il-VAT fuq dik il-merkanzija jew il-partijiet komponenti tagħhom kienet deduċibbli kollha jew parti minnha.

Iżda, l-applikazzjonijet [użu] ta’ merkanzija għall-użu tan-negożju bħala kampjuni jew rigali ta’ valur żgħir m’għandhomx ikunu meqjusa bħala provvista ta’ merkanzija bi ħlas.”

6        L-Artikolu 18 tad-Direttiva tal-VAT huwa redatt kif ġej:

“L-Istati Membri jistgħu iqisu kull waħda mit-transazzjonijiet li ġejjin bħala provvista ta’ merkanzija bi ħlas

(a)      l-applikazzjoni [użu] minn persuna taxxabbli għal skopijiet tan-negozju tagħha ta’ merkanzija magħmula, maħduma, estratta, ipproċessata, mixtrija jew importata matul tali negozju, fejn il-VAT fuq din il-merkanzija, kieku kienet ġiet akkwistata minn persuna oħra taxxabbli, ma tkunx deduċibbli kollha;

(b)      l-applikazzjoni [użu] ta’ merkanzija minn persuna taxxabbli għal skopijiet ta’ qasam ta’ attività mhux taxxabbli, fejn il-VAT fuq din il-merkanzija saret deduċibbli kollha jew f’parti mal-akkwist tagħha jew mal-applikazzjoni [użu] tagħha skont il-punt (a);

ċ)      bl-eċċezzjoni tal-każijiet imsemmija fl-Artikolu 19, iż-żamma tal-merkanzija minn persuna taxxabbli, jew l-eredi tagħha, fejn hi tieqaf milli twettaq attività ekonomika taxxabbli, fejn il-VAT fuq tali merkanzija saret deduċibbli kollha jew parti minnha mal-akkwist tagħha jew mal-applikazzjoni tagħha skont il-punt (a).”

7        L-Artikoli 184 sa 186 tad-Direttiva tal-VAT, li jidhru fil-Kapitolu 5, intitolat “Aġġustament tat-tnaqqis”, tat-Titolu X, intitolat “Tnaqqis”, ta’ din id-direttiva, huma redatti kif ġej:

“Artikolu 184

It-tnaqqis inizjali għandu jiġi aġġustat fejn dan ikun ogħla jew inqas minn dak li għalih il-persuna taxxabbli kienet intitolata.

Artikolu 185

1.      L-aġġustament għandu, b’mod partikolari, isir fejn, wara li ssir id-denunzja tal-VAT, isir xi tibdil fil-fatturi [fl-elementi] użati biex jiddeterminaw l-ammont li għandu jitnaqqas, per eżempju fejn ix-xirjiet huma kkanċellati jew hu miksub roħs fil-prezzijiet.

2.      Bħala deroga mill-paragrafu 1, m’għandu jsir l-ebda aġġustament fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ distruzzjoni, telf jew serq tal-proprjetà li ġie ppruvat jew ikkonfermat kif imiss, jew fil-każ ta’ merkanzija riżervata għall-iskop ta’ għoti ta’ rigali ta’ valur żgħir jew ta’ l-għoti ta’ kampjuni, kif speċifikat fl-Artikolu 16.

Madanakollu, fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ serq, l-Istati Membri jistgħu jeħtieġu li jsir aġġustament.

Artikolu 186

L-Istati Membri għandhom jistabbilixxu r-regoli dettaljati għall-applikazzjoni ta’ l-Artikoli 184 u 185.”

 Id-dritt Rumen

 Il-Kodiċi tat-Taxxa

8        Skont il-punt 16 tal-Artikolu 125a(1) tal-Liġi Nru 571/2003 li tistabilixxi l-Kodiċi tat-Taxxa (Monitorul Oficial al României, parti I, Nru 927, tat-23 ta’ Diċembru 2003), fil-verżjoni tiegħu li japplika għall-fatti fil-kawża prinċipali (iktar ’il quddiem il-“Kodiċi tat-Taxxa”), il-“provvista lilu nnifsu għandha s-sens previst fl-Artikolu 128(4)” ta’ dan il-kodiċi.

9        L-Artikolu 128 tal-imsemmi kodiċi, intitolat “Kunsinni ta’ oġġetti”, jipprovdi:

“1.      ‘Provvista ta’ oġġetti’ għandha tfisser it-trasferiment tad-dritt ta’ proprjetarju li jiddisponi minn oġġetti.

[...]

3.      It-tranżazzjonijiet li ġejjin huma wkoll ikkunsidrati bħala kunsinni ta’ oġġetti, skont il-paragrafu 1:

a)       il-provvista materjali ta’ oġġett lil persuna oħra skont kuntratt li jipprevedi ħlas rateali, jew ta’ kwalunkwe tip ieħor ta’ kuntratt, li jipprovdi li l-proprjetà hija akkwistata mhux iktar tard mill-ħlas tal-ammont finali dovut, bl-eċċezzjoni ta’ kuntratti ta’ leasing;

[...]

4.      It-tranżazzjonijiet li ġejjin għandhom jitqiesu bħala provvista ta’ oġġett bi ħlas:

a)      l-applikazzjoni [użu], minn persuna taxxabbli, ta’ oġġett mobbli mixtri jew prodott minnha għal skopijiet barra dawk tal-impriża tagħha, meta din it-taxxa fuq dak l-oġġett jew il-partijiet komponenti tiegħu kienet deduċibbli kollha jew parti minnha;

b)      l-applikazzjoni [użu], minn persuna taxxabbli, ta’ oġġett mobbli mixtri jew prodott minnha bil-għan li jitqiegħdu għad-dispożizzjoni ta’ persuni oħrajn mingħajr ħlas, meta din it-taxxa fuq dak l-oġġett jew il-partijiet komponenti tiegħu kienet deduċibbli kollha jew parti minnha;

c)      l-applikazzjoni [użu], minn persuna taxxabbli, ta’ oġġett mobbli mixtri minnha, minbarra l-oġġetti kapitali msemmija fl-Artikolu 149(1)(a), bil-għan li jintużaw fil-kuntest ta’ tranżazzjonijiet li ma jagħtux id-dritt għal tnaqqis sħiħ, meta din it-taxxa fuq dak l-oġġett jew il-partijiet komponenti tiegħu kienet deduċibbli kollha jew parti minnha fid-data tax-xiri tagħha;

d)      l-oġġetti nieqsa, salv dawk previsti fil-paragrafu (8) (a) sa (c);

[...]

8.      Ma jikkostitwixxix provvista ta’ oġġetti, skont il-paragrafu (1):

a)      l-oġġetti meqruda wara diżastri naturali jew minħabba forza maġġuri, kif ukoll l-oġġetti mitlufa jew misruqa, jekk jiġu debitament ippruvati skont id-dispożizzjonijiet rilevanti;

b)      l-istokkijiet li l-kwalità tagħhom iddeterjorat li ma jistgħux jiġu użati iktar, kif ukoll l-assi tanġibbli fissi mormija, fil-kundizzjonijiet previsti miid-dispożizzjonijiet rilevanti;

c)      l-oġġetti li jitħassru, fil-limiti previsti mil-liġi.”

10      Skont l-Artikolu 129(3)(a) tal-Kodiċi tat-Taxxa, il-“kera jew il-tqegħid għad-dispożizzjoni ta’ oġġetti fil-kuntest ta’ kuntratt ta’ leasing” jikkostitwixxu provvista ta’ servizzi.

 Ir-regoli ta’ implementazzjoni tal-Kodiċi tat-Taxxa

11      Ir-regoli ta’ implementazzjoni tal-Kodiċi tat-Taxxa, approvati bir-Regolament tal-Gvern Nru 44/2004 (Monitorul Oficial al României, Parti I, Nru 112, tas-6 ta’ Frar 2004), fil-verżjoni tagħhom applikabbli għall-fatti fil-kawża prinċipali, fil-punt 6 tagħhom jipprovdu:

“Punt 6

[...]

6.       F’każ ta’ rexissjoni ta’ kuntratti ta’ leasing li jirrigwarda oġġetti mobbli tanġibbli, l-oġġetti inkwistjoni huma kkunsidrati bħala nieqsa fl-amministrazzjoni tal-persuna li tagħti l-leasing, skont l-Artikolu 128(4)(d), tal-Kodiċi tat-Taxxa, mal-iskadenza tat-terminu previst fil-kuntratt għar-restituzzjoni tal-oġġett mill-kerrej, iżda matul perijodu ta’ mhux iktar minn 30 jum kalendarji li jiddekorru mir-rexissjoni tal-kuntratt […].”

12      Permezz tad-Digriet tal-Gvern Nru 15/2012 (Monitorul Oficial al României, Parti I, Nru 621, tad-29 ta’ Awwissu 2012), il-Gvern Rumen ħassar l-Artikolu 128(4)(d) u (8)(a) sa (c), tal-Kodiċi tat-Taxxa, b’effett mill-1 ta’ Jannar 2013. Bl-istess mod, permezz tar-Regolament tal-Gvern Nru 1071/2012 (Monitorul Oficial al României, Parti I, Nru 753, tat-8 ta’ Novembru 2012), il-Gvern Rumen ħassar il-punt 6(6) tar-Regoli ta’ Implementazzjoni tal-Kodiċi tat-Taxxa, b’effett mill-1 ta’ Jannar 2013.

 Il-kawża prinċipali u d-domanda preliminari

13      BCR Leasing hija kumpannija b’responsabbiltà limitata li topera l-attività ta’ leasing. Hija tixtri mingħand diversi fornituri tal-karozzi u tnaqqas għal kollox il-VAT tal-input sħiħa mħallsa. Barra minn hekk, din il-kumpannija tikkonkludi kuntratti ta’ leasing, li jirrigwardaw il-karozzi mixtrija, ma’ persuni fiżiċi jew ġuridiċi li huma l-utenti ta’ dawn l-oġġetti matul it-tul kollu tal-kuntratt, filwaqt li BCR Leasing tibqa’ l-proprjetarja ta’ dawn il-karozzi.

14      Minħabba ħlasijiet tardivi jew nuqqas ta’ ħlas, BCR Leasing kienet kostretta li tirrexxindi parti minn dawn il-kuntratti ta’ leasing konklużi mal-kerrejja li ma jħallsux. Skont l-imsemmija kuntratti, il-kerrejja kellhom l-obbligu, f’terminu ta’ tlett ijiem li jibdew jiddekorru mir-rexissjoni tal-kuntratt ikkonċernat, li jirrestitwixxu l-oġġett kopert b’dan il-kuntratt. BCR Leasing bdiet proċeduri ta’ rkupru kontra ċerti kerrejja peress li rrifjutaw li jirrestitwixxu l-oġġett ikkonċernat. Madankollu, minkejja l-isforzi li għamlet, ċerti oġġetti inkwistjoni ma setgħux jiġu rkuprati fit-termini previsti.

15      Peress li ma daħlet l-ebda ħlas mill-kuntratti rexissi, BCR Leasing waqfet toħroġ fatturi li jirrigwardaw l-imsemmijin kuntratti u li tiġbor il-VAT relatata.

16      Matul kontroll magħmul fl-2011, l-Agenția kkonstatat xi irregolaritajiet li jirrigwardaw il-modalitajiet ta’ indikazzjoni, ta’ reġistrazzjoni u ta’ dikjarazzjoni tal-VAT għall-perijodu bejn l-1 ta’ Settembru 2008 u l-31 ta’ Diċembru 2010. Permezz tal-avviż tat-taxxa tat-30 ta’ Awwissu 2011 u tar-rapport ta’ kontroll fiskali bl-istess data, hija imponiet fuq BCR Leasing obbligu addizzjonali ta’ ħlas ta’ RON 19 266 551 (lei Rumeni) bħala VAT, kif ukoll ammont ta’ RON 9 502 774 bħala penalitajiet moratorji.

17      Fl-avviż tat-taxxa msemmi iktar ’il fuq, l-Agenția indikat li l-leasing kellu jiġi ttrattat, matul il-kuntratt, bħala provvista ta’ servizz li jista’ jiġi segwit bi provvista ta’ oġġetti fil-mument fejn il-kuntratt jasal fi tmiemu, skont jekk il-kerrej jagħżilx jew le li jixtri.

18      Barra dan, l-Agenția kkunsidrat li, fil-każ ta’ oġġetti nieqsa għal raġunijiet oħra barra dawk previsti fl-Artikolu 128(8)(a) sa (c) tal-Kodiċi tat-Taxxa, dan kien jikkonsisti fi provvista ta’ oġġetti suġġetta għal VAT, peress li t-tranżazzjoni għandha tiġi ddefinita bħala “provvista lilu nnifsu”, skont il-punt 16 tal-Artikolu 125a(1) tal-Kodiċi tat-Taxxa.

19      Konsegwentement, skont l-Agenția, BCR Leasing kellha l-obbligu, fl-iskadenza tat-terminu previst fil-kuntratt ta’ leasing għar-restituzzjoni tal-oġġett mingħand il-kerrejj, li tapplika d-dispożizzjonijiet tal-Artikolu 128(4)(d) tal-Kodiċi tat-Taxxa dwar il-provvista lilu nnifsu u l-ġbir tal-VAT, kif ukoll li tistabilixxi fatturi f’isimha stess għal dawn il-kunsinni.

20      Peress li qieset li l-leġiżlazzjoni nazzjonali li hija l-bażi tal-avviż tat-taxxa msemmija fil-punt 16 ta’ din is-sentenza ma hijiex konformi mas-sistema stabbilita mid-Direttiva tal-VAT, BCR Leasing ressqet rikors għall-annullament kontra dan l-avviż, li fl-aħħar lok, tressaq quddiem il-Curtea de Apel București.

21      F’dawn iċ-ċirkustanzi, il-Curtea de Apel București ddeċidiet li tissospendi l-proċeduri quddiemha u li tagħmel id-domanda preliminari segwenti lill-Qorti tal-Ġustizzja:

“Is-sitwazzjoni ta’ oġġetti li jkunu s-suġġett ta’ kuntratt ta’ leasing li, wara r-rexissjoni ta’ dan il-kuntratt minħabba nuqqas min-naħa tal-kerrej, ma ġewx irkuprati mill-kumpannija ta’ leasing mingħand il-kerrej, minkejja l-fatt li din il-kumpannija bdiet u kompliet proċeduri legali għall-irkupru tal-imsemmija oġġetti u li, wara r-rexissjoni, hija ma rċeviet ebda somma ta’ flus mill-użu ta’ dawn l-oġġetti, tista’ tiġi kkunsidrata bħala provvista bi ħlas fis-sens tal-Artikolu 16 tad-[Direttiva tal-VAT] jew, jekk ikun il-każ, bħala provvista ta’ oġġetti bi ħlas fis-sens tal-Artikolu 18 [ta’ din id-direttiva]?”

 Fuq id-domanda preliminari

22      Permezz tad-domanda tagħha, il-qorti tar-rinviju tistaqsi, essenzjalment, jekk l-Artikoli 16 u 18 tad-Direttiva tal-VAT għandhomx jiġu interpretati fis-sens li l-impossibbiltà, għal kumpannija ta’ leasing, li tirkupra mingħand il-kerrej oġġetti li jkunu s-suġġett ta’ kuntratt ta’ leasing wara r-rexissjoni tiegħu li tkun seħħet minħabba nuqqas imwettaq mill-kerrej, minkejja l-passi meħuda mill-kumpannija bil-għan li tirkupra dawn l-oġġetti u minkejja l-assenza ta’ xi korrispettiv wara din ir-rexissjoni, tistax tiġi ttrattata bħala provvista bi ħlas ta’ oġġetti skont dawn l-artikoli.

23      Għandu jitfakkar, qabel kollox, li l-Artikolu 16 tad-Direttiva tal-VAT jittratta ċerti tranżazzjonijiet li għalihom ma jinġabar ebda korrispettiv reali mingħand il-persuna taxxabbli bħala kunsinni ta’ oġġetti bi ħlas u suġġetti għall-VAT. Skont ġurisprudenza stabbilita ferm, l-għan ta’ din id-dispożizzjoni huwa li jiżgura ugwaljanza ta’ trattament bejn il-persuna taxxabbli li tuża oġġetti għall-bżonnijiet personali tiegħu, min-naħa, u l-konsumatur finali li jikseb oġġett tal-istess tip, min-naħa l-oħra (ara, f’dan is-sens, is-sentenza EMI Group, C-581/08, EU:C:2010:559, punt 17 u l-ġurisprudenza ċċitata).

24      Bil-għan li jintlaħaq dan l-għan l-Artikolu 16 tad-Direttiva tal-VAT jittratta bħala provvista ta’ oġġetti bi ħlas, l-użu, minn persuna taxxabbli, ta’ oġġett li jifformaw parti mill-assi tal-impriża tagħha għall-użi privati tagħha jew tal-persunal tagħha, jew sabiex issir it-tneħħija tagħhom mingħajr ħlas, jew, b’mod iktar ġenerali, l-użu tagħhom għal skopijiet barra dawk tal-impriża tagħha, meta l-VAT fuq dan l-oġġett jew il-partijiet komponenti tiegħu kienet deduċibbli kollha jew parti minnha.

25      Issa, għandu jiġi rrilevat li, f’dan il-każ, l-impossibbiltà li jiġu rkuprati l-oġġetti li jkunu s-suġġett ta’ kuntratt ta’ leasing, fiċ-ċirkustanzi bħal dawk fil-kawża prinċipali, ma taqax taħt waħda minn dawn is-sitwazzjonijiet.

26      Fil-fatt, l-ewwel nett, l-oġġetti kkonċernati ma jistgħux jitqiesu li huma intiżi għall-bżonnijiet privati tal-persuna taxxabbli jew għal dawk tal-persunal tagħha, peress li ma humiex fil-pussess tagħhom. It-tieni nett, il-fatt li l-kerrej jibqa’ fil-pussess ta’ dawn l-oġġetti mingħajr ma tħallas ebda korrispettiv jirriżulta minn aġir allegatament doluż tagħha u mhux ta’ trasferiment mingħajr ħlas tal-imsemmija oġġetti mill-proprjetarju għall-kerrej. It-tielet nett, dawn l-istess oġġetti ma għandhomx jitqiesu li qed jiġu applikati għal “skopijiet barra dawk” tal-impriża tal-persuna taxxabbli, peress li l-kiri tagħhom u, għaldaqstant, it-tqegħid tagħhom għad-dispożizzjoni tal-kerrej jikkostitwixxu l-essenza nnifisha tal-attività ekonomika tal-proprjetarju. Il-fatt li l-proprjetarju ma jirkuprax dawn l-oġġetti wara r-rexissjoni tal-kuntratt tal-leasing ma jfisser bl-ebda mod li applikahom għal skopijiet barra dawk tal-impriża tiegħu.

27      Minn dan isegwi li l-impossibbiltà, għal kumpannija ta’ leasing, sabiex tirkupra oġġetti li jkunu s-suġġett ta’ kuntratt ta’ leasing wara r-rexissjoni tiegħu f’ċirkustanzi bħalma huma dawk fil-kawża prinċipali, ma tistax tiġi ttrattata bħala provvista ta’ oġġetti bi ħlas skont l-Artikolu 16 tad-Direttiva tal-VAT.

28      Sussegwentement, fir-rigward tal-Artikolu 18 tad-Direttiva tal-VAT, għandu jiġi kkonstatat li din id-dispożizzjoni ma tistax tiġi applikata f’ċirkustanzi bħalma huma dawk fil-kawża prinċipali.

29      Fil-fatt, mid-deċiżjoni tar-rinviju jirriżulta li BCR Leasing wettqet tnaqqis sħiħ tal-VAT tal-input imħallsa fil-mument tax-xiri tal-vetturi inkwistjoni. Għaldaqstant, is-sitwazzjoni msemmija fl-Artikolu 18(a) tad-Direttiva tal-VAT, li tkopri biss il-każ meta x-xiri tal-input ma jagħtix id-dritt ta’ tnaqqis sħiħ tal-VAT, hija mingħajr ebda rilevanza f’dan il-każ.

30      F’dak li jikkonċerna s-sitwazzjonjiet imsemmija fl-Artikolu 18(b) u (c) tad-Direttiva tal-VAT, huwa biżżejjed li jingħad li, f’dan il-każ, il-persuna taxxabbli la użat l-oġġetti kkonċernati għal “qasam ta’ attività mhux taxxabbli”, skont l-Artikolu 18(b) u lanqas waqfet milli twettaq l-attività ekonomika taxxabbli tiegħu, kif jeżiġi l-imsemmi Artikolu 18(c).

31      Għaldaqstant, l-Artikolu 18 tad-Direttiva tal-VAT ma jippermettix lill-Istati Membri li jittrattaw bħala provvista ta’ oġġetti bi ħlas, tranżazzjonijiet bħalma huma dawk fil-kawża prinċipali.

32      Fl-aħħar nett, għandu jiġi ppreċiżat, sabiex tingħata risposta utli lill-qorti tar-rinviju, li l-mekkaniżmu ta’ aġġustament previst mill-Artikoli 184 sa 186 tad-Direttiva tal-VAT jifforma parti integrali mis-sistema tat-tnaqqis tal-VAT stabbilita minnha (sentenza TETS Haskovo, C-234/11, EU:C:2012:644, punt 30). Għaldaqstant, il-kunsiderazzjonijiet preċedenti ma jaffettwawx il-ħolqien eventwali ta’ dritt tal-awtorità tat-taxxa li teżiġi aġġustament min-naħa tal-persuna taxxabbli fiċ-ċirkustanzi previsti f’dan ir-rigward fid-Direttiva tal-VAT.

33      Fid-dawl tal-kunsiderazzjonijiet preċedenti, ir-risposta għad-domanda magħmula għandha tkun li l-Artikoli 16 u 18 tad-Direttiva tal-VAT għandhom jiġu interpretati f’sens li l-impossibbiltà, għal kumpannija ta’ leasing, li tirkupra mingħand il-kerrej oġġett li jkun is-suġġett ta’ kuntratt ta’ leasing wara r-rexxissjoni tiegħu li tkun seħħet minħabba nuqqas imwettaq mill-kerrej, minkejja l-passi meħuda minn din il-kumpannija bil-għan li tirkupra dawn l-oġġetti u minkejja l-assenza ta’ xi korrispettiv wara din ir-rexissjoni, ma tistax tiġi ttrattata bħala provvista bi ħlas ta’ oġġetti skont dawn l-artikoli.

 Fuq l-ispejjeż

34      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Is-Seba’ Awla) taqta’ u tiddeċiedi:

L-Artikoli 16 u 18 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, għandhom jiġu interpretati fis-sens li l-Artikoli 16 u 18 tad-Direttiva tal-VAT għandhom jiġu interpretati f’sens li l-impossibbiltà, għal kumpannija ta’ leasing, li tirkupra mingħand il-kerrej oġġetti li jkunu s-suġġett ta’ kuntratt ta’ leasing wara r-rexxissjon tiegħu li tkun seħħet minħabba nuqqas imwettaq mill-kerrejja, minkejja l-passi meħuda mill-kumpannija bil-għan li tirkupra dawn l-oġġetti u minkejja l-assenza ta’ xi korrispettiv wara din ir-rexissjoni, ma tistax tiġi ttrattata bħala provvista bi ħlas ta’ oġġetti skont dawn l-artikoli.

Firem

* Lingwa tal-kawża: ir-Rumen.