Available languages

• BG
• ES
• CS
• DA
• DE
• ET
• EL
• EN
• FR
• HR
• IT
• LV
• LT
• HU
• MT
• NL
• PL
• PT
• RO
• SK
• SL
• FI
• SV

Taxonomy tags

Info

• Referral date: 14-03-2016
• Show case reference
• Ruling date: 16-02-2017
• AG: Wahl

References in this case

Share

• Print
• Download PDF
• E-mail link
• Get text per e-mail

Highlight in text

EU tax law WEB Aramex Nederland - C-145/16

Edizzjoni Provviżorja

SENTENZA TAL-QORTI TAL-ĠUSTIZZJA (Is-Sitt Awla)

16 ta’ Frar 2017 (*)

“Rinviju għal deċiżjoni preliminari – Regolament (KEE) Nru 2658/87 – Unjoni doganali u tariffa doganali komuni – Klassifikazzjoni tariffarja – Nomenklatura Magħquda – Validità – Regolament (UE) Nru 301/2012 – Intestaturi 8703 u 8711 – Vettura bi tliet roti msejħa ‘Spyder’”

Fil-Kawża C-145/16,

li għandha bħala suġġett talba għal deċiżjoni preliminari taħt l-Artikolu 267 TFUE, imressqa mill-Gerechtshof Amsterdam (qorti tal-appell ta’ Amsterdam, il-Pajjiżi l-Baxxi), permezz ta’ deċiżjoni tat-8 ta’ Marzu 2016, li waslet fil-Qorti tal-Ġustizzja fl-14 ta’ Marzu 2016, fil-proċedura

Aramex Nederland BV

vs

Inspecteur van de Belastingdienst/Douane,

IL-QORTI TAL-ĠUSTIZZJA (Is-Sitt Awla),

komposta minn E. Regan, President tal-Awla, C. G. Fernlund u S. Rodin (Relatur), Imħallfin,

Avukat Ġenerali : N. Wahl,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–        għal Aramex Nederland BV, minn W. de Wit u O. R. L. Gemin, konsulenti,

–        għall-Gvern Olandiż, minn M. K. Bulterman u M. H. S. Gijzen, bħala aġenti,

–        għall-Kummissjoni Ewropea, minn A. Caeiros u P. Vanden Heede, bħala aġenti,

–        rat id-deċiżjoni meħuda wara li nstema’ l-Avukat Ġenerali li l-kawża tinqata’ mingħajr konklużjonijiet,

tagħti l-preżenti

Sentenza

1        It-talba għal deċiżjoni preliminari tirrigwarda, essenzjalment, l-interpretazzjoni tal-intestaturi 8703 u 8711 tan-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), fil-verżjoni tiegħu li tirriżulta mir-Regolament ta’ Implementazzjoni tal-Kummissjoni (UE) Nru 927/2012, tad-9 ta’ Ottubru 2012 (ĠU 2012, L 304, p. 1, iktar ’il quddiem in-“NM”).

2        Din it-talba tressqet fil-kuntest ta’ tilwima bejn Aramex Nederland BV (iktar ’il quddiem “Aramex”) u l-Inspecteur van de Belastingdienst/Douane, dwar il-klassifikazzjoni tariffarja ta’ vettura bi tliet roti msejħa “Spyder” fi ħdan in-NM.

 Il-kuntest ġuridiku

 Id-dritt tal-Unjoni

3        In-NM, stabbilita mir-Regolament Nru 2658/87, hija bbażata fuq is-sistema armonizzata ta’ deskrizzjoni u kodifikazzjoni tal-merkanzija (iktar ’il quddiem is-“SA”), ippreparata mill-Kunsill għall-Kooperazzjoni Doganali, li sar l-Organizzazzjoni Dinjija tad-Dwana (ODD), u adottata bil-Konvenzjoni Internazzjonali dwar is-Sistema Armonizzata ta’ Deskrizzjoni u Kodifikazzjoni tal-Merkanzija, konkluża fi Brussell fl-14 ta’ Ġunju 1983. Din il-konvenzjoni ġiet approvata, flimkien mal-Protokoll ta’ Emenda tagħha tal-24 ta’ Ġunju 1986, f’isem il-Komunità Ekonomika Ewropea, bid-Deċiżjoni tal-Kunsill 87/369/KEE, tas-7 ta’ April 1987 (ĠU Edizzjoni Speċjali bil-Malti, Kapitolu 2, Vol. 2, p. 288).

4        L-intestatura 8703 tan-NM hija strutturat b’dan il-mod:

5        L-intestatura 8711 tan-NM hija strutturata kif ġej:

[...] ”      

6        L-Anness tar-Regolament ta’ Implimentazzjoni tal-Kummissjoni (UE) Nru 301/2012, tat-2 ta’ April 2012, dwar il-klassifikazzjoni ta’ ċerti prodotti fin-Nomenklatura Magħquda, adottat bis-saħħa tal-Artikolu 9(1)(a) tar-Regolament Nru 2658/87, jikklassifika fin-NM il-prodotti indikati fl-ewwel kolonna tat-Tabella li jidhru hemm taħt il-kodiċi indikat fir-rigward ta’ dawn il-prodotti fit-tieni kolonna ta’ din it-Tabella.
Fir-rigward tas-sotto-intestatura 8703 21 10, l-imsemmija tabella tipprovdi:

 In-noti ta’ spjega tas-SA

7        Skont l-Artikolu 6(1) tal- Konvenzjoni Internazzjonali dwar is-Sistema Armonizzata ta’ Deskrizzjoni u Kodifikazzjoni tal-Merkanzija, kumitat imsemmi “Kumitat tas-Sistema Armonizzata” kompost mir-rappreżentanti ta’ kull parti kontraenti, ġie mwaqqaf fi ħdan il-Kunsill ta’ Kooperazzjoni Doganali. Ix-xogħol tiegħu jikkonsisti, b’mod partikolari, f’li jipproponi emendi għall-imsemmija konvenzjoni u f’li jifformula noti ta’ spjega (iktar ’il quddiem in-“Noti ta’ Spjega tas-SA), opinjonijiet ta’ klassifikazzjoni u opinjonijiet oħra dwar l-interpretazzjoni tas-SA.

8        In-nota ta’ spjega tas-SA dwar l-intestatura 8703 hija hekk ifformulata:

“Bl-eċċezzjoni ta’ vetturi bil-mutur għat-trasport tal-persuni previsti taħt in-Nru 87.02, din l-intestatura tinkludi l-karozzi bil-mutur ta’ kull tip, inklużi l-vetturi bil-mutur anfibji għat-trasport tal-persuni, indipendentament mill-magna li tħaddimhom (magna bil-pistuni li taqbad fil-berqa jew bil-kompressjoni, magna elettrika,turbina li taħdem bil-gass, eċċ). (traduzzjoni mhux uffiċjali)

Hija tkopri wkoll il-vetturi ħfief bi tliet roti b’mod partikolari:

–        dawk li jużaw muturi b’roti ta’ motoċikletti, eċċ, li, bl-istruttura mekkanika tagħhom, jippreżentaw il-karatteristiċi tal-vetturi bil-mutur stess: preżenza ta’ sistema tal-istering bħal ta’ karozza bil-mutur, jew, kemm ger għar-rivers kif ukoll differenxjal; (traduzzjoni mhux uffiċjali);

–        dawk immuntati fuq xażi f’forma ta’ T b’żewġ roti ta’ wara huma misjuqa minn muturi elettriċi separati mħaddmin minn batteriji. Dawn il-vetturi huma normalment ikkontrollat b’lieva ċentrali uniku li jippermetti, minn naħa waħda, il-bidu u l-aċċelerazzjoni u diċelerazzjoni, il-waqfien u l-ger għar-rivers u, min-naħa l-oħra, it-tidwir lejn il-lemin jew lejn ix-xellug permezz ta’ koppja ta’ differenzjar għall-roti tas-sewqan jew bil-kontroll fuq ir-rota ta’ quddiem. (traduzzjoni mhux uffiċjali)

[...]

Jaqgħu, b’mod partikolari taħt din l-intestatura:

[...]

6)      Il-vetturi b’erba’ roti, b’xażi tubulari, mgħammra b’sistema tal-istering bħal ta’ karozza bil-mutur, per eżempju bbażata fuq il-prinċipju Ackerman. [...] ”. (traduzzjoni mhux uffiċjali)

9        In-Nota ta’ Spjega tas-SA rigward l-intestatura 8711 tipprovdi:

“Din l-intestatura tkopri, minn naħa, il-vetturi bil-mutur kollha, b’żewġ roti intiżi essenzjalment għat-trasport ta’ persuni. (traduzzjoni mhux uffiċjali)

[...]

Huma wkoll ikklassifikati hawn il-vetturi bi tliet roti (tat-tip tal-iskuter, pereżempju), bil-kundizzjoni li ma jippreżentawx in-natura ta’ vettura bil-mutur tan-Nru 87.03 (ara n-Nota ta’ Spjega Nru 87.03). (traduzzjoni mhux uffiċjali)

[...]

Huma, min-naħa l-oħra, esklużi:

[...]

Il-vetturi b’erba’ roti, għat-trasport ta’ persuni, b’xażi tubulari, mgħammra b’sistema tal-istering bħal ta’ karozza, pereżempju bbażata fuq il-prinċipju Ackerman (Nru 87.03)”. (traduzzjoni mhux uffiċjali)

 Il-kawża prinċipali u d-domanda preliminari

10      Fis-17 ta’ April 2013, wara dikjarazzjoni ta’ rilaxx għal ċirkulazzjoni libera ta’ vettura indikata bħala RD Spyder RS-S 990 SM5 DR 12 EUR (iktar ’il quddiem l-’iSpyder”) effettwata minn Aramex, l-amministrazzjoni fiskali Olandiża bagħtet lil din il-kumpannija avviż ta’ taxxa li jikkorrispondi għall-klassifikazzjoni tariffarja tal-iSpyder fis-sotto-intestatura 8703 21 10. Fit-28 ta’ Mejju 2013, Aramex ressqet ilment kontra dan l-avviż, fejn qieset li l-iSpyder kellha tiġi kklassifikata fis-sotto-intestatura 8711 50 00. Dan l-ilment ġie miċħud fl-10 ta’ Settembru 2013.

11      Ir-rikors ippreżentat minn Aramex quddiem ir-Rechtbank Noord-Holland (qorti tal-Olanda tat-Tramuntana, il-Pajjiżi l-Baxxi) kontra l-imsemmi avviż ta’ taxxa ġie miċħud bħala infondat minn sentenza tat-8 ta’ Diċembru 2014.

12      Fis-16 ta’ Jannar 2015, ir-rikorrenti appellat minn din is-sentenza quddiem il-Gerechtshof Amsterdam (qorti tal-appell ta’ Amsterdam, il-Pajjiżi l-Baxxi). Din il-qorti tal-aħħar qieset li ma huwiex possibbli li jiġi determinat b’mod inekwivoku jekk l-iSpyder, fid-dawl tal-karatteristiċi u tal-proprjetajiet objettivi tagħha, għandha tiġi kkunsidrata bħala “motoċikletta” jew bħala “vettura bil-mutur”.

13      Il-partijiet għall-proċedura quddiem il-qorti tar-rinviju ma jikkontestawx il-fatt li l-iSpyder serviet ta’ mudell għar-Regolament ta’ Implementazzjoni Nru 301/2012, li fuq il-bażi tagħha din il-vettura ġiet ikklassifikata fl-intestatura 8703. Madankollu, Aramex tqis li dan ir-regolament huwa invalidu.

14      Il-qorti tar-rinviju tirrimarka, fl-ewwel lok, li l-iSpyder hija mgħammra b’roti li d-dimensjonijiet tat-tajers tagħha huma komuni għall-vetturi bil-mutur iżda li dawn it-tajers huma mmanifatturati b’mod speċjali għall-motoċikletti bi tliet roti.

15      Fit-tieni lok, l-iSpyder tippreżenta ġeometrija tal-istering li tissodisfa l-prinċipju Ackermann u għandha għall-bqija stering differenti ħafna minn dik ta’ vettura. Minflok ma għandha stering tal-vettura, hija mgħammra b’manubriju tat-tip ta’ motoċikletta, b’żewġ manki li fuqhom huma mmuntati l-kontrolli. Bid-differenza tal-istering ta’ vettura, wieħed ma jistax idawwar dan il-manubriju kompletament, peress li l-portata massima lejn il-lemin jew lejn ix-xellug hija ta’ madwar 45 grad, kif jagħmel il-manubriju ta’ motoċikletta. Barra minn hekk, ma hemm la xaft u lanqas kaxxa tal-istering li tikkonverti, bħal f’vettura bil-mutur, il-moviment ta’ rotazzjoni tax-xaft tal-istering f’moviment lineari minkejja li l-moviment ta’ rotazzjoni ta-xaft tal-istering tal-iSpyder huwa kkonvertit f’dan il-moviment minn mezz ieħor, jiġifieri bl-għajnuna ta’ konnessjoni pendenti. Ix-xebh mal-istering ta’ vettura bil-mutur huwa limitat għall-preżenza ta’ xaft tal-istering, vireg, roti u l-ġeometrija tal-istering diġà evokata li jissodisfaw il-prinċipju Ackerman. Madankollu, il-qorti tar-rinviju tqis li ma jirriżultax espressament mill-kliem tan-Nota ta’ Spjega tas-SA dwar l-intestatura 8703 li l-preżenza, f’vettura ħafifa bi tliet roti, ta’ sistema tal-istering li tibbaża fuq il-prinċipju Ackerman huwa suffiċjenti biex wieħed ikun jista’ jitkellem fuq stering tat-tip ta’ karozza bil-mutur bħalma huwa l-każ għall-vetturi b’erba’ roti skont in-Nota ta’ Spjega tas-SA dwar l-intestatura 8703, punt 6.

16      Skont il-qorti tar-rinviju, il-karatteristiċi mqajma fiż-żewġ punti preċedenti ta’ din is-sentenza jistgħu jkunu rilevanti biex jiġi determinat jekk l-iSpyder tikkorrispondi għall-kategorija ta’ “vetturi ħfief bi tliet roti” imsemmija fl-ewwel eżempju tan-Nota ta’ Spjega tas-SA dwar l-intestatura 8703. Madankollu, din il-qorti tirrikonoxxi li dawn l-eżempji ma humiex limitattivi.

17      Il-qorti tar-rinviju tenfasizza li għalkemm l-ewwel kolonna tal-Anness tar-Regolament ta’ Implementazzjoni Nru 301/2012 tindika bħala karatteristika reali li l-iSpyder hija mgħammra b’sistema tal-istering tat-tip ta’ karozza bil-mutur, ebda element stabbilit fit-tielet kolonna ta’ dan l-Anness ma jippermetti li wieħed ikun jaf jekk il-Kummissjoni Ewropea effettivament ivverifikat u fuq il-bażi ta’ liema kriterji.

18      Fid-dawl ta’ dak li ntqal iktar ’il fuq, in-nutrizzjoni tad-dubji inkwantu għall-fondatezza tal-klassifikazzjoni rakkomandata mill-Kummissjoni, il-qorti tar-rinviju ddeċidiet li tissospendi l-proċeduri quddiemha u tagħmel lill-Qorti tal-Ġustizzja domanda preliminari li ġejja:

“Ir-Regolament ta’ Implimentazzjoni Nru 301/2012 huwa validu?”

 Fuq id-domanda preliminari

19      Preliminarjament, għandu jitfakkar li, skont ġurisprudenza stabbilita tal-Qorti tal-Ġustizzja, fil-kuntest tal-proċedura ta’ kooperazzjoni bejn il-qrati nazzjonali u l-Qorti tal-Ġustizzja, stabbilita fl-Artikolu 267 TFUE, hija l-kompetenza ta’ din tal-aħħar li tagħti lill-qorti nazzjonali risposta utli li tgħinha tiddeċiedi l-kawża quddiemha. F’dan id-dawl, huwa obbligu, jekk inhu l-każ, tal-Qorti tal-Ġustizzja li tifformula mill-ġdid id-domandi li jkunu ġew sottomessi lilha (ara, f’dan is-sens, is-sentenza tat-13 ta’ Ottubru 2016, M. u S., C-303/15, EU:C:2016:771, punt 16 u l-ġurisprudenza ċċitata).

20      Permezz tad-domanda tagħha, il-Qorti tar-rinviju essenzjalment tistaqsi jekk in-NM għandha tiġi interpretata fis-sens li vettura bi tliet roti, bħal dik inkwistjoni fil-kawża prinċipali, mgħammra b’tajers immanifatturati għall-motoċikletti bi tliet roti iżda simili għal dawk għall-vetturi bil-mutur, ikkontrollat permezz ta’ manubriju u mgħammar b’sistema tal-istering bbażat fuq il-prinċipju Ackermann, li jaqa’ taħt l-intestatura 8703 tan-NM.

21      F’dan ir-rigward, jeħtieġ li jiġi mfakkar li, skont ġurisprudenza stabbilita, il-Kunsill tal-Unjoni Ewropea, filwaqt li aġixxa b’kooperazzjoni mal-esperti tad-dwana tal-Istati Membri, attribwixxa lill-Kummissjoni setgħa diskrezzjonali wiesgħa sabiex tippreċiża l-kontenut tal-intestaturi tariffarji li fihom għandha tiġi kklassifikata merkanzija partikolari. Madankollu s-setgħa tal-Kummissjoni li tieħu l-miżuri msemmija fl-Artikolu 9(1)(a), (b), (d), u (e) tar-Regolament Nru 2658/87, bħala l-istabbiliment ta’ Noti kumplimentarji, ma tawtorizzahiex li temenda l-kontenut tal-intestaturi tariffarji li ġew stabbiliti fuq il-bażi tas-SA, stabbilita permezz tal-Konvenzjoni Internazzjonali dwar is-SA, li fiha l-Unjoni Ewropea impenjat ruħha, bis-saħħa tal-Artikolu 3 ta’ din tal-aħħar, li ma temendax il-portata (ara, f’dan is-sens, is-sentenza tat-12 ta’ Frar 2015, Raytek u Fluke Europe, C-134/13, EU:C:2015:82, punt 29 kif ukoll il-ġurisprudenza ċċitata).

22      Barra minn hekk, fl-interess taċ-ċertezza legali u tal-faċilità tal-ispezzjonijiet, il-kriterju deċiżiv għall-klassifikazzjoni tariffarja tal-merkanzija għandha titfittex, b’mod ġenerali, fil-karatteristiċi proprji u fil-proprjetajiet oġġettivi tagħhom, kif iddefiniti mill-kliem tal-intestatura tan-NM u min-noti ta’ taqsima jew ta’ kapitolu (sentenza tat-8 ta’ Diċembru 2016, Lemnis Lighting, C-600/15, EU:C:2016:937, punt 36 u l-ġurisprudenza ċċitata).

23      Ċertament, id-destinazzjoni tal-prodott tista’ tikkostitwixxi kriterju oġġettiv ta’ klassifikazzjoni sa fejn hija inerenti għall-imsemmi prodott, peress li l-inerenza għandha tkun tista tiġi evalwata skont il-karatteristiċi u l-proprjetajiet oġġettivi tagħha. Madankollu, id-destinazzjoni tal-prodott hija kriterju rilevanti biss jekk il-klassifikazzjoni ma tistax issir fuq il-bażi biss tal-karatteristiċi u tal-proprjetajiet oġġettivi tal-prodott (sentenza tad-9 ta’ Ġunju 2016, MIS, C-288/15, EU:C:2016:424, punt 24).

24      Barra minn hekk, għandu jitfakkar li n-Noti ta’ Spjega tas-SA jikkostitwixxu motivi importanti biex jiżguraw applikazzjoni uniformi tat-tariffa doganali komuni u jipprovdu, bħala tali, elementi validi għall-interpretazzjoni tagħha (is-sentenza tat-8 ta’ Diċembru 2016, Lemnis Lighting, C-600/15, EU:C:2016:937, punt 37).

25      Sabiex jiġi eżaminat jekk vettura bi tliet roti, bħal dik inkwistjoni fil-kawża prinċipali, tista’ taqa’ taħt l-intestatura 8703, għandu jiġi kkonstatat qabelxejn li l-klassifikazzjoni tal-vetturi bi tliet roti fl-intestatura 8711 għandha natura sussidjarja meta mqabbla mal-klassifikazzjoni tagħhom fl-intestatura 8703, peress li, skont in-Nota ta’ Spjega tas-SA dwar l-intestatura 8711, din tal-aħħar tkopri biss dawn il-vetturi bil-kundizzjoni li ma jippreżentawx il-karatteristiċi ta’ vettura bil-mutur li taqa’ taħt l-intestatura 8703.

26      L-ewwel nett, fir-rigward tal-kwisjtoni jekk hemm lok li jittieħed inkunsiderazzjoni, għall-finijiet tal-klassifikazzjoni ta’ vettura bi tliet roti fl-intestatura 8703, il-fatt li din tuża jew le roti ta’ motoċikletti, għandu jiġi rrilevat li n-Nota ta’ Spjega tas-SA dwar din l-intestatura tindika li l-imsemmija intestatura tkopri, b’mod partikolari, il-vetturi ħfief bi tliet roti li jużaw muturi u roti ta’ motoċikletti u li, permezz tal-istruttura mekkanika tagħhom, jippreżentaw il-karatteristiċi ta’ vetturi bil-mutur infushom.

27      Għandu jiġi kkonstatat, f’dan ir-rigward, li n-Nota ta’ Spjega tas-SA dwar l-intestatura 8703 b’hekk tipprovdi xi eżempji ta’ vetturi bi tliet roti li għandhom jiġu kklassifikati f’din l-intestatura.

28      Għaldaqstant, anki jekk il-vetturi msemmija bħala eżempji f’din in-nota jippreżentaw xi tagħmir analogu għal dak tal-motoċikletti, b’mod partikolari l-użu ta’ roti ta’ motoċikletti, l-eżistenza ta’ tali tagħmir ma tikkostitwixxix kundizzjoni tal-klassifikazzjoni fl-intestatura 8703 ta’ vetturi bi tliet roti li, bl-istruttura mekkanika tagħhom, jippreżentaw il-karatteristiċi ta’ vetturi bil-mutur. Minn dan isegwi li l-fatt li vettura ma tużax roti ta’ motoċikletta ma tostakolax il-klassifikazzjoni tagħha f’din l-intestatura.

29      It-tieni nett, fir-rigward tad-domanda jekk il-vetturi bi tliet roti mgħammra b’sistema tal-istering li x-xebh tagħha ma’ dik li tgħammar il-vetturi bil-mutur hija limitata għall-fatt li tibbaża fuq il-prinċipju Ackermann huma li “għandh[om] sistema tal-istering bħal tal-karozzi bil-mutur”, fis-sens tan-Nota ta’ Spjega tas-SA dwar l-intestatura 8703, għandu jitfakkar li din in-nota tistabbilixxi, essenzjalment, li l-vetturi li jidħlu f’din l-intestatura huma l-vetturi ta’ kull tip li jippreżentaw ċerti karatteristiċi tekniċi bħal stering tat-tip ta’ karozza bil-mutur li tibbaża fuq il-prinċipju Ackermann (ara, f’dan is-sens, is-sentenza tas-27 ta’ April 2006, Kawasaki Motors Europe, C-15/05, EU:C:2006:259, punt 43).

30      Barra minn hekk, jekk huwa veru li l-ewwel eżempju pprovdut min-Nota ta’ Spjega tas-SA dwar l-intestatura 8703 ma tiddefinixxix il-kunċett ta’ “sistema tal-istering bħal tal-karozzi bil-mutur”, din l-istess nota tipprovdi li “[i]l-vetturi b’erba’ roti, b’xażi tubulari, mgħammra b’sistema tal-istering bħal ta’ karozza, pereżempju bbażata fuq il-prinċipju Ackerman”, jaqgħu taħt din l-intestatura. (traduzzjoni mhux uffiċjali)

31      Minn dan isegwi li l-vetturi bi tliet roti mgħammra b’sistema tal-istering li x-xebh tagħhom ma’ dik li tgħammar il-vetturi bil-mutur hija limitata għall-fatt li tibbaża fuq il-prinċipju Ackerman għandhom “sistema tal-istering bħal tal-karozzi bil-mutur”, fis-sens tan-Nota ta’ Spjega tas-SA dwar l-intestatura 8703.

32      It-tielet nett, fir-rigward tal-klassifikazzjoni ta’ vettura bi tliet roti mgħammra b’manubriju fl-intestatura 8703, kif previst mir-Regolament Nru 301/2012, għandu jiġi kkonstatat li din il-karatteristika ma tidher la fil-kliem tal-intestatura 8711 u lanqas fin-Nota ta’ Spjega tas-SA dwar din l-intestatura. Għaldaqstant, il-fatt li vettura bi tliet roti hija mgħammra b’manubriju ma tipprekludix il-klassifikazzjoni tagħha fl-intestatura 8703.

33      Ladarba l-fatt li s-sistema tal-istering ta’ vettura, bħal dik inkwistjoni fil-kawża prinċipali, hija operata permezz ta’ manubriju u tibbaża fuq il-prinċipju Ackermann jikkostitwixxi karatteristika oġġettiva tagħha, li tippermetti li tkun ikklassifikata fl-intestatura 8703, id-destinazzjoni ta’ tali vettura ma hijiex, kuntrarjament għal dak li Aramex argumentat, kriterju rilevanti għall-finijiet tal-klassifikazzjoni tagħha.

34      Fir-rigward tal-validità tar-Regolament Nru 301/2012, għandu jiġi kkonstatat li l-eżaminazzjoni tad-domanda preliminari ma rrilevat l-ebda element ta’ natura li taffettwa l-validità ta’ dan ir-regolament, sa fejn jipprevedi l-klassifikazzjoni fis-sotto-intestatura 8703 21 00 ta’ vettura ġdida bil-mutur bi tliet roti mgħamra b’sistema tal-istering tat-tip ta’ karozza bil-mutur ikkontrollata permezz ta’ manubriju.

35      Fid-dawl ta’ dak kollu li ntqal hawn fuq, ir-risposta li għandha tingħata għad-domanda magħmula li n-NM għandha tiġi interpretata fis-sens li vettura bi tliet roti, bħal dik inkwistjoni fil-kawża prinċipali, mgħammra b’tajers immanifatturati għall-motoċikletti bi tliet roti iżda simili għal dawk għall-vetturi bil-mutur, ikkontrollata permezz ta’ manubriju u mgħammra b’sistema tal-istering bbażat fuq il-prinċipju Ackermann, taqa’ taħt l-intestatura 8703 tan-NM.

 Fuq l-ispejjeż

36      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Is-Sitt Awla) taqta’ u tiddeċiedi:

1)      In-Nomenklatura Magħquda li tinsab fl-Anness I tar-Regolament tal-Kunsill (KEE) Nru 2658/87, tat-23 ta’ Lulju 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana, fil-verżjoni tiegħu li tirriżulta mir-Regolament ta’ Implementazzjoni tal-Kummissjoni (UE) Nru 927/2012, tad-9 ta’ Ottubru 2012, għandha tiġi interpretata fis-sens li vettura bi tliet roti, bħal dik inkwistjoni fil-kawża prinċipali, mgħammra b’tajers immanifatturati għall-motoċikletti bi tliet roti iżda simili għal dawk għall-vetturi bil-mutur, ikkontrollata permezz ta’ manubriju u mgħammra b’sistema tal-istering bbażat fuq il-prinċipju Ackermann, taqa’ taħt l-intestatura 8703 ta’ din in-nomenklatura.

Firem

* Lingwa tal-kawża: l-Olandiż.