Available languages

Taxonomy tags

Info

References in this case

Share

Highlight in text

Go

Edizzjoni Provviżorja

SENTENZA TAL-QORTI TAL-ĠUSTIZZJA (Is-Sitt Awla)

3 ta’ Frar 2022 (*)

“Rinviju għal deċiżjoni preliminari – Taxxa fuq il-valur miżjud (VAT) – Direttiva 2006/112/KE – Artikolu 122 – Rata mnaqqsa għall-kunsinni ta’ injam użat bħala ħatab – Differenzazzjoni skont il-karatteristiċi u l-proprjetajiet oġġettivi tal-prodotti – Tipi ta’ injam intiżi li jintużaw bħala ħatab li jservi l-istess bżonn tal-konsumatur u li jkun f’kompetizzjoni – Prinċipju ta’ newtralità fiskali”

Fil-Kawża C-515/20,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Bundesfinanzhof (il-Qorti Federali tal-Finanzi, il-Ġermanja), permezz ta’ deċiżjoni tal-10 ta’ Ġunju 2020, li waslet fil-Qorti tal-Ġustizzja fl-14 ta’Ottubru 2020, fil-proċedura

B AG

vs

Finanzamt A,

IL-QORTI TAL-ĠUSTIZZJA (Is-Sitt Awla),

komposta minn L. Bay Larsen, Viċi President tal-Qorti tal-Ġustizzja, li qiegħed jaġixxi bħala President tas-Sitt Awla, N. Jääskinen u J.-C. Bonichot (Relatur), Imħallfin,

Avukat Ġenerali: E. Tanchev,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–        għal B AG, minn T. Hammer, Wirtschaftsprüfer u Steuerberater, kif ukoll minn C. Hammer, Steuerberater,

–        għall-Gvern Ġermaniż, minn J. Möller u S. Costanzo, bħala aġenti,

–        għall-Kummissjoni Ewropea, minn L. Lozano Palacios u R. Pethke, bħala aġenti,

wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikoli 98 u 122 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60, iktar ’il quddiem id-“Direttiva dwar il-VAT”).

2        Din it-talba tressqet fil-kuntest ta’ tilwima bejn B AG u l-Finanzamt A (l-Amministrazzjoni tal-Finanzi A, il-Ġermanja) (iktar ’il quddiem l-“amministrazzjoni fiskali”) dwar l-applikazzjoni tar-rata mnaqqsa tat-taxxa fuq il-valur miżjud (VAT) għall-kunsinni tal-biċċiet tal-injam.

 Il-kuntest ġuridiku

 Id-dritt tal-Unjoni

 Id-Direttiva dwar il-VAT

3        Skont il-premessa 4 tad-Direttiva dwar il-VAT:

“L-ilħuq ta’ l-għan li jiġi stabbilit suq intern jassumi l-applikazzjoni fl-Istati Membri ta’ leġislazzjoni dwar it-taxxi fuq il-bejgħ li ma tħarbatx il-kondizzjonijet tal-kompetizzjoni jew ma xxekkilx iċ-ċaqliq ħieles tal-merkanzija u s-servizzi. Għalhekk hu meħtieġ li tintlaħaq din l-armonizazzjoni tal-leġislazzjoni dwar it-taxxi fuq il-bejgħ permezz ta’ sistema ta’ [VAT], li għandha telimina, sa fejn hu possibli, fatturi li jistgħu jtelfu l-kondizzjonijet ta’ kompetizzjoni, kemm fuq livell nazzjonali kif ukoll fuq livell tal-Komunità.”

4        Il-premessa 7 ta’ din id-direttiva hija redatta kif ġej:

“Is-sistema komuni ta’ VAT għandha twassal, anki jekk ir-rati u l-eżenzjonijiet ma jkunux armonizzati b’mod sħiħ, għal newtralità fil-kompetizzjoni, b’mod li fit-territorju ta’ kull pajjiż merkanzija u servizzi simili jġorru l-istess piż ta’ taxxa, hu x’inhu t-tul tal-produzzjoni u l-katina tad-distribuzzjoni.”

5        L-Artikolu 96 tal-imsemmija direttiva jiddisponi:

“L-Istati Membri għandhom japplikaw rata standard ta’ VAT, li għandha tiġi ffissata minn kull Stat Membru bħala persentaġġ ta’ l-ammont taxxabbli u li għandha tkun l-istess għall-provvista ta’ merkanzija u għall-provvista ta’ servizzi.”

6        L-Artikolu 98 tad-Direttiva dwar il-VAT jipprevedi:

“1.      L-Istati Membri jistgħu japplikaw jew rata mnaqqsa waħda jew żewġ rati mnaqqsa.

2.      Ir-rati mnaqqsa għandhom japplikaw biss għall-provvisti ta’ merkanzija jew servizzi fil-kategoriji stabbiliti fl-Anness III.

[…]

3.      Meta jkunu qed japplikaw ir-rati mnaqqsa previsti fil-paragrafu 1 għal kategoriji ta’ merkanzija, l-Istati Membri jistgħu jużaw in-Nomenklatura Magħquda sabiex jistabbilixxu eżattament kemm hi koperta l-kategorija kkonċernata.”

7        L-Anness III ta’ din id-direttiva, li jistabbilixxi l-lista ta’ kunsinni ta’ oġġetti u ta’ provvisti ta’ servizzi li għalihom jistgħu jiġu applikati r-rati mnaqqsa msemmija fl-Artikolu 98 tagħha, ma jinkludix kategorija ta’ prodotti “injam użat bħala ħatab”.

8        L-Artikoli 109 sa 122 tal-imsemmija direttiva jistabbilixxu l-kundizzjonijiet li fihom l-Istati Membri jistgħu japplikaw rati mnaqqsa ta’ VAT, sakemm is-sistema definittiva ma tkunx ġiet introdotta.

9        L-Artikolu 122 tal-istess direttiva jipprovdi:

“L-Istati Membri jistgħu japplikaw rata mnaqqsa għall-provvista […] ta’ injam użat bħala ħatab.”

 In-NM

10      In-Nomenklatura Magħquda (iktar ’il quddiem in-“NM”) tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat bir-Regolament ta’ Implimentazzjoni tal-Kummissjoni (UE) Nru 1101/2014 tas-16 ta’ Ottubru 2014 (ĠU 2014, L 312, p. 1).

11      Hija tinkludi, b’mod partikolari, l-intestaturi tariffarji li ġejjin:

Kodiċi NM

Deskrizzjoni

4401

Ħatab, f’forma ta’ zkuk, zkuk ħoxnin, friegħi, qatet ta’ għesieleġ jew forom simili; injam f’laqx jew frak; serratura u skart u fdal ta’ injam, kemm jekk magħqudin fi zkuk, briquettes, gerbub jew forom simili jew le

4401 10 00

Ħatab, f’forma ta’ zkuk, zkuk ħoxnin, friegħi, qatet ta’ għesieleġ jew forom simili


Injam f’laqx jew frak

4401 21 00

Koniferu

4401 22 00

Mhux koniferu


Serratura u skart u fdal ta’ injam, kemm jekk magħqudin fi zkuk, briquettes, gerbub jew forom simili jew le

4401 31 00

Pelits tal-injam

4401 39

Oħrajn

4401 39 20

Magħqudin (per eżempju, briquettes)


Oħrajn

4401 39 30

Serratura

 Id-dritt Ġermaniż

12      L-Artikolu 12 tal-Umsatzsteuergesetz (il-Liġi dwar it-Taxxa fuq id-Dħul mill-Bejgħ) jiddisponi:

“(1)      Ir-rata tat-taxxa hija ta’ 19% tal-ammont taxxabbli għat-tranżazzjonijiet kollha taxxabbli (Artikoli 10, 11, 25(3) u 25a(3) u (4)).

(2)      Ir-rata tat-taxxa hija mnaqqsa għal 7 % għat-tranżazzjonijiet li ġejjin:

1.      il-kunsinna, l-importazzjoni jew l-akkwist intra-Komunitarju ta’ oġġetti msemmija fl-Anness 2, bl-eċċezzjoni ta’ prodotti msemmija fin-Nru 49(f), u fin-Nri 53 u 54;

[…]”

13      In-Numru 48 tal-Anness 2 ta’ din il-liġi huwa fformulat kif ġej:

[Numru tar-reġistru]

Deskrizzjoni

Tariffa doganali (kapitolu, intestatura, subintestatura)

48

Injam, jiġifieri:



a) Ħatab, f’forma ta’ zkuk, zkuk ħoxnin, friegħi, qatet ta’ għesieleġ jew forom simili

Subintestatura 4401 10 00


b) Serratura u skart u fdal ta’ injam, kemm jekk magħqudin fi zkuk, briquettes, gerbub jew forom simili, kemm jekk le

Subintestatura 4401 30

 Il-kawża prinċipali u d-domandi preliminari

14      It-tilwima tirrigwarda l-applikazzjoni tar-rata mnaqqsa tal-VAT għall-kunsinni tal-biċċiet tal-injam.

15      Matul l-2015, ir-rikorrenti fil-kawża prinċipali kkummerċjalizzat biċċiet tal-injam bid-denominazzjonijiet protetti “Flokets weiss” (biċċiet tal-injam “industrijali”) u “Flokets natur” (biċċiet tal-injam “tal-foresta”) u żgurat il-manutenzjoni ta’ installazzjonijiet ta’ tisħin li jużaw il-biċċiet tal-injam bħala fjuwil.

16      Il-biċċiet tal-injam industrijali jiġu mit-tqattigħ taz-zkuk, li l-qatgħat tagħhom jitnaqqsu f’biċċiet tal-injam minn imtieħen tat-tħin. Il-biċċiet tal-injam tal-foresta jiġu mill-friegħi u mill-imsaġar li jirriżultaw mill-manutenzjoni tal-foresti. Ir-residwi tal-injam jiġu mitħuna minn magna fil-foresta u mbagħad imnixxfin mir-rikorrenti fil-kawża prinċipali.

17      Matul is-sena finanzjarja 2015, ir-rikorrenti fil-kawża prinċipali pprovdiet biċċiet tal-injam industrijali u tal-foresta lill-komun A u lill-parroċċa B. Matul dak il-perijodu, hija pprovdiet ukoll biċċiet tal-injam bħala fjuwil, fil-kuntest ta’ ftehim konkluż mal-komun C dwar il-“monitoraġġ tal-funzjonament ta’ installazzjoni ta’ tisħin tal-biċċiet tal-injam li jinkludi l-manutenzjoni u t-tindif”.

18      Fid-dikjarazzjoni provviżorja tal-VAT għas-sena finanzjarja 2015, ir-rikorrenti fil-kawża prinċipali applikat ir-rata normali (19 %) għall-provvisti msemmija iktar ’il fuq , konformement mal-opinjoni tal-amministrazzjoni fiskali espressa matul spezzjoni fiskali preċedenti.

19      Ir-rikorrenti fil-kawża prinċipali kkontestat din ir-rata quddiem il-Finanzgericht (il-Qorti tal-Finanzi, il-Ġermanja), li laqgħet ir-rikors parzjalment. Dik il-qorti ddeċidiet li l-kunsinni ta’ biċċiet tal-injam lill-komun A u lill-parroċċa B kellhom jiġu suġġetti għar-rata mnaqqsa, iżda li l-pakkett ta’ provvisti pprovdut lill-komun C kellu jiġi ntaxxat bir-rata normali, peress li kien jikkostitwixxi provvista globali unika.

20      Kemm ir-rikorrenti fil-kawża prinċipali kif ukoll l-amministrazzjoni fiskali ppreżentaw appell għal reviżjoni kontra s-sentenza tal-Finanzgericht (il-Qorti tal-Finanzi) quddiem il-Bundesfinanzhof (il-Qorti Federali tal-Finanzi, il-Ġermanja).

21      Dik il-qorti tistaqsi, fl-ewwel lok, dwar il-kunċett ta’ “injam użat bħala ħatab”, li jinsab fl-Artikolu 122 tad-Direttiva dwar il-VAT, b’mod partikolari dwar jekk dan il-kunċett jinkludix il-biċċiet tal-injam.

22      Fit-tieni lok, il-qorti tar-rinviju tistaqsi jekk, fl-eżerċizzju tal-possibbiltà prevista fl-Artikolu 122 tad-Direttiva dwar il-VAT, l-Istati Membri humiex awtorizzati jiddefinixxu bi preċiżjoni l-kamp ta’ applikazzjoni ta’ rata mnaqqsa tat-taxxa għal kunsinni ta’ injam użat bħala ħatab billi jirrikorru għan-NM jew jekk l-awtorizzazzjoni f’dan is-sens prevista fl-Artikolu 98(3) ta’ din id-direttiva hijiex limitata għall-każijiet ta’ applikazzjoni ta’ rata mnaqqsa tat-taxxa fuq il-kunsinni ta’ oġġetti li jaqgħu fil-kategoriji elenkati fl-Anness III tal-imsemmija direttiva.

23      Fit-tielet lok, fil-każ li l-Istati Membri jkunu awtorizzati jippreċiżaw il-kamp ta’ applikazzjoni tar-rata mnaqqsa tal-VAT għal kunsinni ta’ injam użat bħala ħatab permezz tan-NM, il-qorti tar-rinviju tixtieq tkun taf jekk il-prinċipju ta’ newtralità fiskali jipprekludix l-applikazzjoni ta’ rati differenti ta’ taxxa għal tipi differenti ta’ injam użat bħala ħatab.

24      F’dawn iċ-ċirkustanzi, il-Bundesfinanzhof (il-Qorti Federali tal-Finanzi) iddeċidiet li tissospendi l-proċedura quddiemha u li tagħmel lill-Qorti tal-Ġustizzja d-domandi preliminari li ġejjin:

“1)      Il-kunċett ta’ injam użat bħala ħatab, li jinsab fl-Artikolu 122 tad-Direttiva [dwar il-VAT] għandu jiġi interpretat fis-sens li jkopri l-injam kollu li, fid-dawl tal-karatteristiċi oġġettivi tiegħu, ikun intiż esklużivament li jintuża bħala ħatab?

2)      Stat Membru li jistabbilixxi, fuq il-bażi tal-Artikolu 122 tad-Direttiva [dwar il-VAT], rata mnaqqsa ta’ taxxa fir-rigward tal-kunsinni ta’ njam użat bħala ħatab, jista’ jiddefinixxi bi preċiżjoni l-kamp ta’ applikazzjoni ta’ din ir-rata, fis-sens tal-Artikolu 98(3) tad-Direttiva [dwar il-VAT], b’riferiment għan-[NM]?

3)      Fil-każ li tingħata risposta fl-affermattiv għat-tieni domanda: Stat Membru jista’ jeżerċita s-setgħa, mogħtija lilu mill-Artikolu 122 tad-Direttiva [dwar il-VAT] u mill-Artikolu 98(3) tad-Direttiva [dwar il-VAT], li jiddefinixxi l-kamp ta’ applikazzjoni tar-rata mnaqqsa ta’ taxxa fir-rigward tal-kunsinni ta’ njam użat bħala ħatab b’riferiment għan-[NM], b’osservanza tal-prinċipju ta’ newtralità fiskali, b’tali mod li jiġu suġġetti għal rati differenti ta’ taxxa l-kunsinni ta’ diversi tipi ta’ njam użat bħala ħatab f’sitwazzjoni fejn dawn it-tipi, għalkemm jistgħu jiġu distinti fuq il-bażi tal-karatteristiċi u tal-proprjetajiet oġġettivi tagħhom, f’għajnejn il-konsumatur medju għandhom, skont il-kriterju tal-kumparabbiltà fl-użu, l-istess utilità (f’dan il-każ, li jsaħħnu) u għalhekk jinsabu f’kompetizzjoni ma’ xulxin?”

 Fuq id-domandi preliminari

 Fuq l-ewwel domanda

25      Permezz tal-ewwel domanda tagħha, il-qorti tar-rinviju essenzjalment tistaqsi jekk l-Artikolu 122 tad-Direttiva dwar il-VAT għandux jiġi interpretat fis-sens li l-kunċett ta’ “injam użat bħala ħatab” jinkludi l-injam kollu li, fid-dawl tal-karatteristiċi oġġettivi tiegħu, ikun intiż esklużivament sabiex jiġi maħruq.

26      Għandu jitfakkar li, skont ġurisprudenza stabbilita tal-Qorti tal-Ġustizzja, mir-rekwiżiti kemm tal-applikazzjoni uniformi tad-dritt tal-Unjoni kif ukoll mill-prinċipju ta’ ugwaljanza jirriżulta li l-kliem ta’ dispożizzjoni tad-dritt tal-Unjoni li ma jagħmel l-ebda riferiment espliċitu għad-dritt tal-Istati Membri sabiex jiġu ddeterminati t-tifsira u l-portata tagħha għandu normalment jiġi interpretat b’mod awtonomu u uniformi mal-Unjoni Ewropea kollha, irrispettivament mill-klassifikazzjonijiet użati fl-Istati Membri (sentenza tad-9 ta’ Settembru 2021, Bundesamt für Fremdenwesen und Asyl (Applikazzjoni sussegwenti għal protezzjoni internazzjonali), C-18/20, EU:C:2021:710, punt 32).

27      Minn dan jirriżulta li, fl-assenza ta’ riferiment fl-Artikolu 122 tad-Direttiva dwar il-VAT, il-kunċett ta’ “injam użat bħala ħatab” li jinsab f’din id-dispożizzjoni għandu jitqies bħala kunċett awtonomu tad-dritt tal-Unjoni li s-sens u l-portata tiegħu għandhom ikunu identiċi fl-Istati Membri kollha. Għaldaqstant, il-Qorti tal-Ġustizzja għandha tagħti lil dan il-kunċett interpretazzjoni uniformi fl-ordinament ġuridiku tal-Unjoni.

28      F’dan ir-rigward, fl-assenza ta’ definizzjoni tal-“injam użat bħala ħatab” li jinsab f’din id-direttiva, għandu jsir riferiment, minn naħa, għas-sens abitwali tal-espressjoni fil-lingwaġġ ta’ kuljum (ara, f’dan is-sens, is-sentenza tad-9 ta’ Settembru 2021, Phantasialand, C-406/20, EU:C:2021:720, punt 29), jiġifieri injam intiż li jiġi maħruq sabiex jissaħħan bini pubbliku jew privat.

29      Min-naħa l-oħra, għandu jiġi rrilevat li l-Artikolu 122 tad-Direttiva dwar il-VAT huwa ta’ natura derogatorja. Fil-fatt, skont l-Artikolu 96 ta’ din id-direttiva, l-istess rata ta’ VAT, jiġifieri r-rata normali stabbilita minn kull Stat Membru, hija applikabbli għall-kunsinni ta’ oġġetti u għall-provvisti ta’ servizzi. Huwa għalhekk b’eċċezzjoni għal din ir-regola li l-possibbiltà li tiġi applikata, b’mod provviżorju, rata mnaqqsa ta’ VAT b’mod partikolari għall-injam użat bħala ħatab hija prevista fl-Artikolu 122 tal-imsemmija direttiva.

30      Bħala dispożizzjoni derogatorja, dan l-artikolu għandu jiġi interpretat b’mod strett (sentenzi tad-29 ta’ Lulju 2019, Inter-Environnement Wallonie u Bond Beter Leefmilieu Vlaanderen, C-411/17, EU:C:2019:622, punt 147, kif ukoll tas-16 ta’ Lulju 2020, JE (Liġi applikabbli għad-divorzju), C-249/19, EU:C:2020:570, punt 23), u, konsegwentement, il-kunċett ta’ “injam użat bħala ħatab”, li jiddetermina l-kamp ta’ applikazzjoni tiegħu, għandu jiġi interpretat b’mod strett. Għaldaqstant, hemm lok li jiġi kkunsidrat bħala “injam użat bħala ħatab”, skont id-definizzjoni li tipproponi l-qorti tar-rinviju, l-injam kollu li, fid-dawl tal-karatteristiċi oġġettivi tiegħu, bħal livell predeterminat ta’ nxif, ikun intiż esklużivament sabiex jiġi maħruq.

31      Minn dak li ntqal jirriżulta li l-Artikolu 122 tad-Direttiva dwar il-VAT għandu jiġi interpretat fis-sens li l-kunċett ta’ injam użat bħala ħatab, fis-sens ta’ dan l-artikolu, jindika l-injam kollu li, fid-dawl tal-karatteristiċi oġġettivi tiegħu, ikun intiż esklużivament sabiex jiġi maħruq.

 Fuq it-tieni domanda

32      Permezz tat-tieni domanda tagħha, il-qorti tar-rinviju tistaqsi, essenzjalment, jekk l-Artikolu 122 tad-Direttiva dwar il-VAT għandux jiġi interpretat fis-sens li Stat Membru li, skont din id-dispożizzjoni, jistabbilixxi rata mnaqqsa ta’ VAT għall-kunsinni ta’ injam użat bħala ħatab, jista’ jiddefinixxi l-kamp ta’ applikazzjoni tagħha, konformement mal-Artikolu 98(3) tal-imsemmija direttiva billi jirreferi għan-NM.

33      Għandu jitfakkar li, fir-rigward tal-kategoriji ta’ kunsinni ta’ oġġetti elenkati fl-Anness III tad-Direttiva dwar il-VAT, li jistgħu jkunu suġġetti għal rata mnaqqsa ta’ VAT bis-saħħa tal-Artikolu 98(1) u (2) ta’ din id-direttiva, il-paragrafu 3 ta’ dan l-artikolu jippermetti espressament lill-Istati Membri li jiddefinixxu dawn il-kategoriji b’mod iktar preċiż billi jirreferu għan-NM.

34      Mill-banda l-oħra, l-istess possibbiltà ma tistax tiġi dedotta mill-formulazzjoni stess tal-Artikolu 122 tad-Direttiva dwar il-VAT, li sempliċement jgħid li l-Istati Membri jistgħu japplikaw rata mnaqqsa inter alia għall-kunsinni tal-injam użat bħala ħatab, sakemm is-sistema definittiva ma tkunx ġiet introdotta.

35      Madankollu, għandu jiġi enfasizzat, minn naħa, li, kif ġie espost fil-punt 30 ta’ din is-sentenza, l-Artikolu 122 tad-Direttiva dwar il-VAT jirrappreżenta dispożizzjoni derogatorja u għandu, konsegwentement, jiġi interpretat b’mod strett. Għaldaqstant, l-Istati Membri ma jistgħux jagħtu l-benefiċċju ta’ rata mnaqqsa lil kunsinni oħra ta’ injam minbarra dik ta’ injam użat bħala ħatab b’applikazzjoni ta’ din id-dispożizzjoni.

36      Min-naħa l-oħra, peress li l-Artikolu 122 tad-Direttiva dwar il-VAT jagħti lill-Istati Membri l-possibbiltà, matul perijodu tranżitorju, li japplikaw rata mnaqqsa għall-kunsinni ta’ injam użat bħala ħatab, dawn l-Istati jistgħu ma japplikawx tali rata għal dawn il-kunsinni u jagħżlu li japplikaw ir-rata normali prevista fl-Artikolu 96 ta’ din id-direttiva. Tali għażla tinkludi wkoll il-possibbiltà li tiġi applikata rata mnaqqsa għal ċerti kunsinni biss ta’ injam użat bħala ħatab, sakemm din l-għażla tiġi eżerċitata fil-limiti stretti tad-deroga, kif tfakkar fil-punt preċedenti.

37      Fil-fatt, bħalma jirriżulta minn ġurisprudenza stabbilita tal-Qorti tal-Ġustizzja fir-rigward tal-Artikolu 98 tad-Direttiva dwar il-VAT (sentenza tas-27 ta’ Ġunju 2019, Belgisch Syndicaat van Chiropraxie et, C-597/17, EU:C:2019:544, punt 44), għandu jiġi rrilevat li l-leġiżlatur tal-Unjoni, fl-Artikolu 122 ta’ din id-direttiva, ippreveda biss possibbiltà, għall-Istati Membri, li japplikaw, bħala deroga u b’mod tranżitorju, rata mnaqqsa ta’ VAT għall-kunsinni, inter alia, ta’ injam użat bħala ħatab. Għaldaqstant, l-Istati Membri għandhom il-possibbiltà li jirriżervaw il-benefiċċju ta’ din ir-rata mnaqqsa għal parti biss minn dawn il-kunsinni.

38      Għalhekk, huma l-Istati Membri li għandhom l-intenzjoni li jagħmlu użu ristrett u għalhekk selettiv tal-possibbiltà mogħtija lilhom mill-Artikolu 122 tad-Direttiva dwar il-VAT li għandhom jippreċiżaw, bi kwalunkwe mezz, fid-dritt nazzjonali tagħhom il-kunsinni ta’ injam użat bħala ħatab li huma jagħżlu li jagħtu l-benefiċċju ta’ rata mnaqqsa. L-ebda dispożizzjoni tad-dritt tal-Unjoni ma tipprojbixxihom milli jirrikorru għal strument ta’ dan id-dritt għal dan l-għan u, b’mod partikolari, milli jirreferu għan-NM, anki jekk dan l-Artikolu 122, b’differenza mill-Artikolu 98 ta’ din id-direttiva, ma jipprevedix dan espressament.

39      Madankollu, il-possibbiltà, li tirriżulta mill-Artikolu 122 tad-Direttiva dwar il-VAT, li l-benefiċċju ta’ rata mnaqqsa tiġi rriżervata għal ċerti kunsinni biss ta’ injam użat bħala ħatab hija suġġetta għall-osservanza tal-prinċipju ta’ newtralità fiskali. Fil-fatt, kif jirriżulta minn ġurisprudenza stabbilita, l-Istati Membri jistgħu jiddeterminaw b’mod iktar preċiż il-kategoriji ta’ kunsinni ta’ oġġetti jew ta’ provvisti ta’ servizzi li għalihom l-imsemmija direttiva tippermettilhom japplikaw rata mnaqqsa, bla ħsara għall-osservanza tal-prinċipju ta’ newtralità fiskali inerenti għas-sistema komuni tal-VAT (sentenzi tat-22 ta’ April 2021, Dyrektor Izby Administracji Skarbowej w Katowicach, C-703/19, EU:C:2021:314, punt 38, u tad-9 ta’ Settembru 2021, Phantasialand, C-406/20, EU:C:2021:720, punt 25 kif ukoll il-ġurisprudenza ċċitata).

40      Fid-dawl tal-kunsiderazzjonijiet preċedenti, ir-risposta li għandha tingħata għat-tieni domanda hija li l-Artikolu 122 tad-Direttiva dwar il-VAT għandu jiġi interpretat fis-sens li Stat Membru li, skont dan l-artikolu, jistabbilixxi rata mnaqqsa ta’ VAT għall-kunsinni ta’ injam użat bħala ħatab, jista’ jillimita l-kamp ta’ applikazzjoni tagħha għal ċerti kategoriji ta’ kunsinni ta’ injam użat bħala ħatab billi jirreferi għan-NM, bla ħsara għall-osservanza tal-prinċipju ta’ newtralità fiskali.

 Fuq it-tielet domanda

41      Permezz tat-tielet domanda tagħha, il-qorti tar-rinviju essenzjalment tistaqsi jekk il-prinċipju ta’ newtralità fiskali għandux jiġi interpretat fis-sens li jipprekludi li l-kunsinna ta’ biċċiet tal-injam tiġi eskluża mill-benefiċċju tar-rata mnaqqsa applikabbli għall-kunsinna ta’ tipi oħra ta’ injam użat bħala ħatab.

42      Kif tfakkar fil-punt 40 ta’ din is-sentenza, meta Stat Membru jagħżel li japplika r-rata mnaqqsa ta’ VAT b’mod selettiv għall-kunsinni ta’ oġġetti jew provvisti ta’ servizzi li għalihom id-Direttiva dwar il-VAT tippermetti li tiġi applikata tali rata, huwa għandu josserva l-prinċipju ta’ newtralità fiskali.

43      Dan il-prinċipju jipprekludi li oġġetti jew provvisti ta’ servizzi li jixxiebhu, li jkunu f’kompetizzjoni ma’ xulxin, jiġu ttrattati b’mod differenti mill-perspettiva tal-VAT (sentenza tad-9 ta’ Settembru 2021, Phantasialand, C-406/20, EU:C:2021:720, punt 37 u l-ġurisprudenza ċċitata).

44      Skont ġurisprudenza stabbilita, sabiex jiġi stabbilit jekk oġġetti jew provvisti ta’ servizzi jixxibhux, għandha tittieħed inkunsiderazzjoni prinċipalment il-perspettiva tal-konsumatur medju. Oġġetti jew provvisti ta’ servizzi jkunu jixxiebhu meta jkollhom karatteristiċi analogi u jissodisfaw l-istess bżonnijiet tal-konsumatur, skont kriterju ta’ tqabbil fl-użu, u meta d-differenzi eżistenti ma jinfluwenzawx b’mod kunsiderevoli d-deċiżjoni tal-konsumatur medju li jirrikorri għal wieħed jew għal ieħor mill-imsemmija oġġetti jew provvisti ta’ servizzi (sentenza tad-9 ta’ Settembru 2021, Phantasialand, C-406/20, EU:C:2021:720, punt 38 u l-ġurisprudenza ċċitata).

45      Fi kliem ieħor, għandu jiġi eżaminat jekk l-oġġetti jew il-provvisti ta’ servizzi inkwistjoni jinsabux, mill-perspettiva tal-konsumatur medju, f’relazzjoni ta’ sostituzzjoni. Fil-fatt, f’din l-ipoteżi, l-applikazzjoni ta’ rati differenti ta’ VAT tista’ taffettwa l-għażla tal-konsumatur, u dan jindika, konsegwentement, ksur tal-prinċipju ta’ newtralità fiskali (sentenza tad-9 ta’ Settembru 2021, Phantasialand, C-406/20, EU:C:2021:720, punt 39 u l-ġurisprudenza ċċitata).

46      Għaldaqstant, hija l-qorti tar-rinviju li għandha twettaq eżami konkret sabiex tiddetermina jekk il-biċċiet tal-injam humiex sostitwibbli għat-tipi l-oħra ta’ injam użat bħala ħatab mill-perspettiva tal-konsumatur medju.

47      Konsegwentement, ir-risposta li għandha tingħata għat-tielet domanda hija li l-prinċipju ta’ newtralità fiskali għandu jiġi interpretat fis-sens li ma jipprekludix li d-dritt nazzjonali jeskludi l-kunsinna ta’ biċċiet tal-injam mill-benefiċċju tar-rata mnaqqsa tal-VAT, filwaqt li jagħti dan il-benefiċċju lill-kunsinni ta’ tipi oħra ta’ injam użat bħala ħatab, sakemm, mill-perspettiva tal-konsumatur medju, il-biċċiet tal-injam ma jkunux sostitwibbli għal dawn it-tipi l-oħra ta’ injam użat bħala ħatab, liema fatt għandu jiġi vverifikat mill-qorti tar-rinviju.

 Fuq l-ispejjeż

48      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Is-Sitt Awla) taqta’ u tiddeċiedi:

1)      L-Artikolu 122 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud għandu jiġi interpretat fis-sens li l-kunċett ta’ injam użat bħala ħatab, fis-sens ta’ dan l-artikolu, jindika l-injam kollu li, fid-dawl tal-karatteristiċi oġġettivi tiegħu, ikun intiż esklużivament sabiex jiġi maħruq.

2)      L-Artikolu 122 tad-Direttiva 2006/112 għandu jiġi interpretat fis-sens li Stat Membru li, skont dan l-artikolu, jistabbilixxi rata mnaqqsa ta’ taxxa fuq il-valur miżjud għall-kunsinni ta’ injam użat bħala ħatab jista’ jillimita l-kamp ta’ applikazzjoni tagħha għal ċerti kategoriji ta’ kunsinni ta’ injam użat bħala ħatab billi jirreferi għan-Nomenklatura Magħquda, bla ħsara għall-osservanza tal-prinċipju ta’ newtralità fiskali.

3)      Il-prinċipju ta’ newtralità fiskali għandu jiġi interpretat fis-sens li ma jipprekludix li d-dritt nazzjonali jeskludi l-kunsinna ta’ biċċiet tal-injam mill-benefiċċju tar-rata mnaqqsa tat-taxxa fuq il-valur miżjud, filwaqt li jagħti dan il-benefiċċju lill-kunsinni ta’ tipi oħra ta’ injam użat bħala ħatab, sakemm, mill-perspettiva tal-konsumatur medju, il-biċċiet tal-injam ma jkunux sostitwibbli għal dawn it-tipi l-oħra ta’ injam użat bħala ħatab, liema fatt għandu jiġi vverifikat mill-qorti tar-rinviju.

Firem

*      Lingwa tal-kawża: il-Ġermaniż.