Available languages

Taxonomy tags

Info

References in this case

Share

Highlight in text

Go

Edizzjoni Provviżorja

SENTENZA TAL-QORTI TAL-ĠUSTIZZJA (It-Tmien Awla)

8 ta’ Diċembru 2022 (*)

“Rinviju għal deċiżjoni preliminari – Taxxa fuq il-valur miżjud (VAT) – Direttiva 2006/112/KE – Il-punt (a) tal-Artikolu 42 – Artikolu 197(1)(ċ) – Il-punt 11a tal-Artikolu 226 – Artikolu 141 – Eżenzjoni – Tranżazzjoni triangolari – Indikazzjoni tad-destinatarju finali ta’ kunsinna bħala responsabbli għall-ħlas tal-VAT – Fatturi – Indikazzjoni ‘Inverżjoni tal-ħlas’ – Natura obbligatorja – Ommissjoni ta’ din l-indikazzjoni fuq fattura – Rettifika retroattiva tal-fattura”

Fil-Kawża C-247/21,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Verwaltungsgerichtshof (il-Qorti Amministrattiva, l-Awstrija), permezz ta’ deċiżjoni tat-8 ta’ April 2021, li waslet fil-Qorti tal-Ġustizzja fl-20 ta’ April 2021, fil-proċedura

Luxury Trust Automobil GmbH

vs

Finanzamt Österreich,

IL-QORTI TAL-ĠUSTIZZJA (It-Tmien Awla),

komposta minn K. Jürimäe (Relatriċi), Presidenta tat-Tielet Awla, li qiegħda taġixxi bħala President tat-Tmien Awla, N. Piçarra u N. Jääskinen, Imħallfin,

Avukat Ġenerali: J. Kokott,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–        għal Luxury Trust Automobil GmbH, minn M. Huber, konsulent tat-taxxa u accountant, u S. Lacha, konsulent tat-taxxa,

–        għall-Gvern Awstrijak, minn M. Augustin, A. Posch u J. Schmoll, bħala aġenti,

–        għall-Kummissjoni Ewropea, minn R. Pethke u V. Uher, bħala aġenti,

wara li semgħet il-konklużjonijiet tal-Avukata Ġenerali ppreżentati fis-seduta tal-14 ta’ Lulju 2022,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-punt (a) tal-Artikolu 42 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60), kif emendata bid-Direttiva tal-Kunsill 2010/45/UE tat-13 ta’ Lulju 2010 (ĠU 2010, L 189, p. 1) (iktar ’il quddiem id-“Direttiva dwar il-VAT”), moqri flimkien mal-Artikolu 197(1)(ċ) ta’ din id-direttiva, u tal-Artikolu 219a tal-imsemmija direttiva.

2        Din it-talba tressqet fil-kuntest ta’ tilwima bejn Luxury Trust Automobil GmbH u l-Finanzamt Österreich (l-Uffiċċju tat-Taxxa tal-Awstrija, iktar ’il quddiem l-“Uffiċċju tat-Taxxa”) dwar it-taxxa fuq il-valur miżjud (VAT) mitluba mingħand din il-kumpannija għas-sena fiskali 2014.

 Il-kuntest ġuridiku

 Id-dritt tal-Unjoni

 Id-Direttiva dwar il-VAT

3        L-Artikolu 2(1)(b)(i) tad-Direttiva dwar il-VAT jistipula:

“It-transazzjonijiet li ġejjin għandhom ikunu soġġetti għall-VAT:

[…]

(b)      l-akkwist intra-Komunitarju ta’ merkanzija magħmula bi ħlas fit-territorju ta’ Stat Membru minn:

(i)      persuna taxxabbli li tkun qed taġixxi b’dan il-mod, jew minn persuna legali mhux taxxabbli, fejn il-bejjiegħ huwa persuna taxxabbli li qed jaġixxi b’dan il-mod li mhux eliġibbli għall-eżenzjoni għal intrapriżi żgħar li hemm provvediment għaliha fl-Artikoli 282 sa 292 u li m’hijiex koperta mill-Artikoli 33 u 36”.

4        It-Titolu V ta’ din id-direttiva huwa intitolat “Post ta’ transazzjonijiet taxxabbli”. Taħt il-Kapitolu 2 ta’ dan it-titolu, l-Artikoli 40 sa 42 tal-imsemmija direttiva jiddefinixxu l-post ta’ akkwist intra-Komunitarju ta’ merkanzija.

5        Skont l-Artikolu 40 tal-istess direttiva, “[i]l-post ta’ l-akkwisizzjoni intra-Komunitarja tal-merkanzija għandu jitqies li jkun il-post fejn tkun il-merkanzija fil-ħin tal-wasla tal-merkanzija mibgħuta jew ittrasportata għand il-persuna li akkwistathom”.

6        L-Artikolu 41 tad-Direttiva dwar il-VAT jippreċiża:

“Mingħajr preġudizzju għall-Artikolu 40, il-post ta’ akkwist intra-Komunitarju ta’ merkanzija kif imsemmi fl-Artikolu 2(1)(b)(i) għandu jitqies li jinsab fit-territorju ta’ l-Istat Membru li ħareġ in-numru ta’ l-identifikazzjoni tal-VAT li permezz tiegħu l-persuna li qed takkwista l-merkanzija għamlet l-akkwist, sakemm il-persuna li takkwista l-merkanzija tistabbilixxi li ġiet applikata l-VAT għal dak l-akkwist skond l-Artikolu 40.

Jekk tiġi applikata l-VAT għall-akkwist skond l-ewwel paragrafu u sussegwentement applikata, skond l-Artikolu 40, għall-akkwist fl-Istat Membru li fih tispiċċa l-merkanzija mibgħuta jew ittrasportata, l-ammont taxxabbli għandu jitnaqqas skond il-każ fl-Istat Membru li ħareġ in-numru ta’ l-identifikazzjoni tal-VAT li permezz tiegħu l-persuna li tkun akkwistat il-merkanzija tkun għamlet l-akkwist.”

7        L-Artikolu 42 ta’ din id-direttiva huwa fformulat kif ġej:

“L-ewwel paragrafu ta’ l-Artikolu 41 m’għandux japplika u l-VAT għandha titqies li ġiet applikata għall-akkwist intra-Komunitarju ta’ merkanzija skond l-Artikolu 40 fejn ikunu sodisfatti l-kondizzjonijiet li ġejjin:

(a)      il-persuna li takkwista l-merkanzija tistabbilixxi li għamlet l-akkwist intra-Komunitarju għall-finijiet ta’ provvista sussegwenti, fit-territorju ta’ l-Istat Membru identifikat skond l-Artikolu 40, li għalih il-persuna li lilha tkun saret il-provvista ġiet innominata skond l-Artikolu 197 bħala responsabbli għall-ħlas tal-VAT;

(b)      il-persuna li tkun qed takkwista l-merkanzija tkun issodisfat l-obbligi stipulati fl-Artikolu 265 dwar is-sottomissjoni tad-dikjarazzjoni li tirrikapitola.”

8        It-Titolu IX tal-imsemmija direttiva huwa intitolat “Eżenzjonijiet”. Il-Kapitolu 4 ta’ dan it-titolu huwa ddedikat għall-eżenzjonijiet marbuta mat-tranżazzjonijiet intra-Komunitarji. It-Taqsima 2 ta’ dan il-kapitolu tirrigwarda l-eżenzjonijiet għall-akkwisti intra-Komunitarji ta’ merkanzija. Fi ħdan din it-taqsima, l-Artikolu 141 tal-istess direttiva jipprovdi:

“Kull Stat Membru għandu jieħu miżuri speċifiċi sabiex jiżgura li l-VAT ma tiġix imposta fuq l-akkwist intra-Komunitarju ta’ merkanzija fit-territorju tiegħu, magħmul skond l-Artikolu 40, fejn jiġu sodisfatti l-kondizzjonijiet li ġejjin:

(a)      l-akkwist ta’ merkanzija jsir minn persuna taxxabbli li mhix stabbilita fl-Istat Membru kkonċernat iżda li hi identifikata għall-iskopijiet tal-VAT fi Stat Membru ieħor;

(b)      l-akkwist ta’ merkanzija jsir bil-għan tal-provvista sussegwenti ta’ dik il-merkanzija, fl-Istat membru kkonċernat, mill-persuna taxxabbli msemmija fil-punt (a);

(ċ)      il-merkanzija hekk akkwistata mill-persuna taxxabbli msemmija fil-punt (a) hija mibgħuta jew ittrasportata direttament, minn Stat Membru li m’huwiex dak li fih din tkun identifikata għall-iskopijiet tal-VAT, lill-persuna li għaliha għandha twettaq il-provvista sussegwenti;

(d)      il-persuna li għaliha l-provvista sussegwenti għandha ssir hi persuna taxxabbli oħra, jew persuna legali mhux taxxabbli, li hi identifikata għall-iskopijiet tal-VAT fl-Istat Membru kkonċernat;

(e)      il-persuna msemmija fil-punt (d) ġiet innominata skond l-Artikolu 197 bħala obbligata li tħallas il-VAT dovuta fuq il-provvista magħmula mill-persuna taxxabbli li mhijiex stabbilita fl-Istat Membru li fih hi dovuta t-taxxa.”

9        Fi ħdan it-Titolu XI tad-Direttiva dwar il-VAT, intitolat “Obbligi ta’ persuni taxxabbli u ta’ ċerti persuni mhux taxxabbli”, l-Artikolu 197(1) tagħha jipprevedi:

“Il-VAT għandha titħallas mill-persuna li lilha hija fornuta l-merkanzija meta jiġu sodisfatti l-kondizzjonijiet li ġejjin:

(a)      it-transazzjoni taxxabbli hija provvista ta’ merkanzija magħmula skond il-kondizzjonijiet previsti fl-Artikolu 141.

(b)      il-persuna li lilha ssir il-provvista tal-merkanzija hija persuna oħra taxxabbli, jew persuna legali mhux taxxabbli, identifikata għall-finijiet tal-VAT fl-Istat Membru li fih titwettaq il-provvista;

(c)      il-fattura maħruġa mill-persuna taxxabbli li mhix stabbilita fl-Istat Membru tal-persuna li lilha tiġi fornuta l-merkanzija għandha ssir skont it-Taqsimiet 3 sa 5 tal-Kapitolu 3.”

10      L-Artikolu 219a ta’ din id-direttiva jiddisponi:

“Mingħajr preġudizzju għall-Artikoli 244 sa 248, għandu japplika dan li ġej:

1.      Il-fatturazzjoni għandha tkun soġġetta għar-regoli li japplikaw fl-Istat Membru fejn ikun meqjus li tkun saret il-provvista tal-merkanzija jew is-servizzi, skont id-dispożizzjonijiet tat-Titolu V.

2.      Permezz ta’ deroga mill-punt (1), il-fatturazzjoni għandha tkun soġġetta għar-regoli li japplikaw fl-Istat Membru li fih il-fornitur ikun stabbilixxa n-negozju tiegħu jew ikollu stabbiliment fiss li minnu ssir il-provvista jew, fin-nuqqas ta’ tali post ta’ stabbiliment jew stabbiliment fiss, l-Istat Membru fejn il-fornitur ikollu l-indirizz permanenti tiegħu jew li s-soltu jkun residenti fih, fejn:

a)      il-fornitur ma jkunx stabbilit fl-Istat Membru li fih il-provvista tal-merkanzija jew is-servizzi hija meqjusa li tkun saret, skont id-dispożizzjonijiet tat-Titolu V, jew l-istabbiliment tiegħu f’dak l-Istat Membru ma jintervjenix fil-provvista fis-sens tal-Artikolu 192a, u l-persuna responsabbli mill-ħlas tal-VAT tkun il-persuna li lilha jkunu ġew fornuti l-merkanzija jew is-servizzi.

Madankollu fejn il-klijent joħroġ il-fattura (awtofatturazzjoni), għandu japplika l-punt (1).

b)      il-provvista tal-merkanzija jew servizzi ma tkunx meqjusa li saret ġewwa l-Komunità, skont id-dispożizzjonijiet tat-Titolu V.”

11      Il-kontenut tal-fatturi huwa ppreċiżat fit-Taqsima 4 tal-Kapitolu 3 tat-Titolu XI tal-imsemmija direttiva. Fost id-dispożizzjonijiet ta’ din it-taqsima, l-Artikolu 226 tal-istess direttiva jistipula:

“Mingħajr preġudizzju għad-disposizzjonijiet partikolari stabbiliti f’din id-Direttiva, dawn id-dettalji li ġejjin biss huma meħtieġa għall-finijiet ta’ VAT fuq fatturi maħruġa skond l-Artikoli 220 u 221

[…]

(11a)      fejn il-klijent huwa responsabbli li jħallas il-VAT, ir-referenza ‘Inverżjoni tal-ħlas’;

[…]”

 Id-Direttiva 2010/45

12      Il-premessa 7 tad-Direttiva 2010/45 hija fformulata kif ġej:

“Ċerti rekwiżiti dwar l-informazzjoni li trid tiġi fornuta dwar il-fatturi għandhom ikunu emendati ħalli jippermettu kontroll fiskali aħjar, biex joħolqu trattament aktar uniformi bejn provvisti transkonfinali u lokali u biex jgħinu wkoll fil-promozzjoni tal-fatturazzjoni elettronika.”

 Id-dritt Awstrijak

13      L-Artikolu 3(8) tal-Umsatzsteuergesetz 1994 (il-Liġi dwar it-Taxxa fuq id-Dħul mill-Bejgħ tal-1994) tat-23 ta’ Awwissu 1994 (BGBl. 663/1994), fil-verżjoni tagħha applikabbli għall-2014 (BGBl. I, 112/2012) (iktar ’il quddiem l-“UStG 1994”), intitolat “Il-post tal-akkwist intra-Komunitarju”, huwa fformulat kif ġej:

“L-akkwist intra-Komunitarju jitwettaq fit-territorju tal-Istat Membru tal-wasla tal-merkanzija mibgħuta jew ittrasportata. Jekk ix-xerrej juża, fir-rapporti tiegħu mal-fornitur, numru ta’ identifikazzjoni tal-VAT maħruġ lilu minn Stat Membru ieħor, l-akkwist jitqies minħabba f’hekk li twettaq fit-territorju ta’ dan l-Istat Membru sakemm ix-xerrej ma jistabbilixxix li l-akkwist kien suġġett għall-VAT fl-Istat Membru indikat fl-ewwel sentenza. Fir-rigward tal-prova, l-Artikolu 16 għandu japplika mutatis mutandis.”

14      L-Artikolu 25 tal-UStG 1994, intitolat “Tranżazzjoni trijangolari”, jipprevedi:

“Kunċett

Artikolu 25(1) Tranżazzjoni trijangolari sseħħ meta tliet operaturi ta’ tliet Stat Membri differenti jwettqu tranżazzjonijiet li jirrigwardaw l-istess merkanzija, li din il-merkanzija tiġi mgħoddija direttament mill-ewwel fornitur lill-aħħar xerrej, u li l-kundizzjonijiet elenkati fil-paragrafu 3 jkunu ssodisfatti. L-istess japplika meta l-aħħar xerrej ikun persuna ġuridika li ma tkunx operatur jew li ma takkwistax il-merkanzija għall-impriża tagħha.

Post tal-akkwist intra-Komunitarju fil-każ ta’ tranżazzjoni trijangolari

(2)      L-akkwist intra-Komunitarju fis-sens tat-tieni sentenza tal-Artikolu 3(8) jitqies li jkun ġie suġġett għall-VAT meta l-operatur (xerrej) juri li dan jikkostitwixxi tranżazzjoni trijangolari u li huwa ssodisfa l-obbligi ta’ dikjarazzjoni tiegħu f’konformità mal-paragrafu 6. Jekk l-operatur ma jissodisfax l-obbligi ta’ dikjarazzjoni tiegħu, huwa jitlef il-benefiċċju tal-eżenzjoni b’mod retroattiv.

Eżenzjoni fil-każ ta’ akkwist intra-Komunitarju ta’ merkanzija

(3)      L-akkwist intra-Komunitarju jkun eżentat mill-VAT meta jiġu ssodisfatti l-kundizzjonijiet li ġejjin:

(a)      l-operatur (xerrej) ma jirrisjedix jew ma għandux is-sede tiegħu fit-territorju nazzjonali, iżda huwa identifikat għall-finijiet tal-VAT fit-territorju tal-Komunità;

(b)      l-akkwist jitwettaq bil-ħsieb ta’ kunsinna sussegwenti tal-operatur (xerrej) fit-territorju nazzjonali lil operatur jew persuna ġuridika li jkunu identifikati għall-finijiet tal-VAT fit-territorju nazzjonali;

(c)      il-merkanzija akkwistata tkun ġejja minn Stat Membru ieħor li ma jkunx dak li fih l-operatur (xerrej) ikun identifikat għall-finijiet tal-VAT;

(d)      is-setgħa ta’ dispożizzjoni fuq il-merkanzija akkwistata tiġi trażmessa direttament mill-ewwel operatur jew l-ewwel xerrej lill-aħħar xerrej (destinatarju);

(e)      it-taxxa tkun dovuta mid-destinatarju f’konformità mal-paragrafu 5.

Fatturazzjoni mix-xerrej

(4)      Il-fatturazzjoni hija suġġetta għar-regoli tal-Istat Membru minn fejn ix-xerrej jopera l-impriża tiegħu. Jekk il-kunsinna titwettaq mill-istabbiliment tax-xerrej, id-dritt applikabbli jkun dak tal-Istat Membru li fih ikun jinsab l-istabbiliment. Jekk id-destinatarju tas-servizz li lilu hija ttrasferita r-responsabbiltà għall-ħlas tat-taxxa jiffattura permezz ta’ nota ta’ kreditu, il-fatturazzjoni hija suġġetta għar-regoli tal-Istat Membru li fih titwettaq il-kunsinna.

Jekk id-dispożizzjonijiet ta’ din il-liġi federali jkunu applikabbli għall-fatturazzjoni, din barra minn hekk ikollha tinkludi l-indikazzjonijiet li ġejjin:

–        riferiment ċar dwar l-eżistenza ta’ tranżazzjoni trijangolari intra-Komunitarja u l-kwalità ta’ persuna responsabbli għall-ħlas tat-taxxa tal-aħħar xerrej,

–        in-numru ta’ identifikazzjoni tal-VAT li l-operatur (xerrej) juża biex iwettaq l-akkwist intra-Komunitarju u l-kunsinna sussegwenti tal-merkanzija, u

–        in-numru ta’ identifikazzjoni tal-VAT tad-destinatarju tal-kunsinna

Persuna responsabbli għall-ħlas tat-taxxa

(5)      Fil-każ ta’ tranżazzjoni trijangolari, it-taxxa tkun dovuta mid-destinatarju tal-kunsinna taxxabbli meta l-fattura maħruġa mix-xerrej tikkorrispondi għall-paragrafu 4.

L-obbligi tax-xerrej

(6)      Sabiex jissodisfa l-obbligi ta’ dikjarazzjoni tiegħu fis-sens tal-paragrafu 2, l-operatur għandu jsemmi, fid-dikjarazzjoni rikapitolattiva, l-indikazzjonijiet li ġejjin:

–        in-numru ta’ identifikazzjoni tal-VAT fit-territorju nazzjonali li bih wettaq l-akkwist intra-Komunitarju u l-kunsinna sussegwenti tal-merkanzija;

–        in-numru ta’ identifikazzjoni tal-VAT tad-destinatarju tal-kunsinna sussegwenti mwettqa mill-operatur, li nħariġlu fl-Istat Membru ta’ destinazzjoni tal-merkanzija mibgħuta jew ittrasportata;

–        għal kull wieħed minn dawn id-destinatarji, l-ammont totali tal-kunsinni mwettqa b’dan il-mod mill-operatur fl-Istat Membru ta’ destinazzjoni tal-merkanzija mibgħuta jew ittrasportata. Dawn l-ammonti għandhom jiġu indikati għat-trimestru ċivili li matulu jkun beda l-obbligu fiskali.

L-obbligi tad-destinatarju

(7)      Sabiex tiġi kkalkolata t-taxxa konformement mal-Artikolu 20, l-ammont stabbilit għandu jiżdied bl-ammont dovut skont il-paragrafu 5.”

 Il-kawża prinċipali u d-domandi preliminari

15      Luxury Trust Automobil hija kumpannija b’responsabbiltà limitata stabbilita fl-Awstrija li teżerċita attivitajiet ta’ intermedjazzjoni u ta’ bejgħ ta’ vetturi lussużi f’diversi pajjiżi, kemm fl-Unjoni Ewropea kif ukoll f’pajjiżi terzi.

16      Matul l-2014, Luxury Trust Automobil xtrat diversi vetturi mingħand fornitur stabbilit fir-Renju Unit li hija biegħet mill-ġdid lill-kumpannija M s. r. o. (iktar ’il quddiem il-“kumpannija M”), li hija stabbilita fir-Repubblika Ċeka. Dawn il-vetturi ġew ittrasportati direttament mir-Renju Unit lejn ir-Repubblika Ċeka.

17      L-impriżi involuti f’dawn il-kunsinni saru bin-numru ta’ identifikazzjoni tal-VAT tal-Istat ta’ sede tagħhom. Tliet fatturi maħruġa minn Luxury Trust Automobil u datati b’Marzu 2014 (iktar ’il quddiem il-“fatturi kontenzjużi”) kienu jsemmu n-numru ta’ identifikazzjoni tal-VAT Awstrijak ta’ din il-kumpannija, in-numru ta’ identifikazzjoni tal-VAT Ċek tal-kumpannija M u n-numru ta’ identifikazzjoni tal-VAT tal-fornitur stabbilit fir-Renju Unit. Dawn il-fatturi kienet tinkludi l-indikazzjoni “Tranżazzjoni trijangolari intra-Komunitarja eżentata”.

18      Fid-dikjarazzjoni rikapitolattiva għal Marzu 2014, Luxury Trust Automobil indikat in-numru ta’ identifikazzjoni tal-VAT Ċek tal-kumpannija M u ddikjarat li dawn kienu tranżazzjonijiet triangolari intra-Komunitarji.

19      Madankollu, fil-kuntest ta’ verifika fiskali, ġie kkonstatat li s-sistema tat-tranżazzjoni triangolari ma kinitx applikabbli peress li, kuntrarjament għal dak li jippreskrivi l-Artikolu 25(4) tal-UStG 1994, il-fatturi kontenzjużi ma kien fihom l-ebda indikazzjoni dwar it-trasferiment tad-dejn fiskali. Għalhekk kien hemm tranżazzjoni triangolari difettuża li ma setgħetx tiġi rregolarizzata a posteriori. Fid-dawl tal-użu tan-numru ta’ identifikazzjoni tal-VAT Awstrijak ta’ Luxury Trust Automobil, għandha tiġi aċċettata l-eżistenza ta’ akkwist intra-Komunitarju fl-Awstrija, skont l-Artikolu 3(8) tal-UStG 1994. Huwa abbażi ta’ dawn l-elementi li l-Uffiċċju tat-Taxxa ffissa, permezz ta’ deċiżjoni tal-25 ta’ April 2016, il-VAT dovuta minn Luxury Trust Automobil għall-2014.

20      Il-qorti tar-rinviju tindika li, wara din il-verifika fiskali, Luxury Trust Automobil irrettifikat il-fatturi kontenzjużi permezz ta’ noti rettifikattivi tat-23 ta’ Mejju 2016 billi żiedet ma’ dawn il-fatturi indikazzjoni dwar it-trasferiment tad-dejn fiskali lill-kumpannija M. Madankollu, il-prova tal-ħruġ effettiv ta’ dawn in-noti rettifikattivi lil din il-kumpannija ma teżistix. Barra minn hekk, din tal-aħħar hija kklassifikata bħala “Missing Trader” mill-Uffiċċju tat-Taxxa Ċek. Fil-fatt, minkejja li l-kumpannija M kienet ġiet irreġistrata fir-Repubblika Ċeka għall-finijiet tal-VAT matul il-perijodu ta’ eżekuzzjoni tal-kunsinni inkwistjoni, l-Uffiċċju tat-Taxxa Ċek ma rnexxilux jikkuntattjaha u l-kumpannija M la ddikjarat u lanqas ħallset il-VAT fir-Repubblika Ċeka fir-rigward ta’ dawn il-kunsinni.

21      Id-deċiżjoni tal-Uffiċċju tat-Taxxa tal-25 ta’ April 2016 kienet is-suġġett ta’ lment li ġie miċħud mill-Finanzamt Baden Mödling (l-Uffiċċju tat-Taxxa ta’ Baden Mödling, l-Awstrija). Sussegwentement, Luxury Trust Automobil ippreżentat appell quddiem il-Bundesfinanzgericht (il-Qorti Federali tal-Finanzi, l-Awstrija).

22      Skont dik il-qorti, l-applikazzjoni tad-dispożizzjonijiet dwar it-tranżazzjonijiet triangolari ma hijiex obbligatorja f’sitwazzjoni bħal dik imsemmija fl-Artikolu 25(1) tal-UStG 1994. Ix-xerrej intermedjarju ta’ tranżazzjoni triangolari, bħal, f’dan il-każ, Luxury Trust Automobil, għandu d-dritt jagħżel jekk, fir-rigward ta’ kunsinna speċifika, huwa jixtieqx li dawn id-dispożizzjonijiet jiġu applikati. Dan id-dritt għandu jiġi eżerċitat fil-mument tat-twettiq tat-tranżazzjoni inkwistjoni.

23      F’dan il-kuntest, jekk dan ix-xerrej intermedjarju jixtieq jikseb l-eżenzjoni ta’ akkwist intra-Komunitarju fl-Istat Membru ta’ destinazzjoni u t-trasferiment tad-dejn fiskali relatat ma’ dan l-akkwist lid-destinatarju finali ta’ din tal-aħħar, huwa għandu jistabbilixxi fattura li tinkludi l-indikazzjonijiet imsemmija fl-Artikolu 25(4) tal-UStG 1994. Issa, l-indikazzjoni li l-aħħar xerrej huwa responsabbli għall-ħlas tal-VAT, prevista f’din id-dispożizzjoni, ma tidhirx fil-fatturi kontenzjużi.

24      Konsegwentement, l-Artikolu 25 tal-UStG 1994 ma huwiex applikabbli, b’tali mod li t-tranżazzjoni inkwistjoni għandha tiġi ttrattata fid-dawl tad-dispożizzjonijiet ġenerali ta’ din il-liġi. Skont dawn, peress li Luxury Trust Automobil użat in-numru ta’ identifikazzjoni tal-VAT Awstrijak tagħha, hija wettqet akkwist intra-Komunitarju fl-Awstrija. L-akkwist għandu għalhekk jitqies li sar fl-Awstrija sakemm din il-kumpannija turi li dan l-akkwist ġie ntaxxat fir-Repubblika Ċeka. Peress li din il-kundizzjoni ma ġietx issodisfatta, l-imsemmija kumpannija ma jkollhiex dritt għat-tnaqqis tal-VAT tal-input fir-rigward tal-imsemmi akkwist.

25      Luxury Trust Automobil ippreżentat rikors għal Reviżjoni kontra s-sentenza tal-Bundesfinanzgericht (il-Qorti Federali tal-Finanzi) quddiem il-Verwaltungsgerichtshof (il-Qorti Amministrattiva, l-Awstrija), li hija l-qorti tar-rinviju f’din il-kawża.

26      Il-kawża prinċipali tirrigwarda t-taxxa dovuta skont it-tieni sentenza tal-Artikolu 3(8) tal-UStG 1994, jiġifieri t-taxxa addizzjonali ta’ akkwist intra-Komunitarju meqjus bħala tali minħabba l-użu ta’ numru ta’ identifikazzjoni tal-VAT Awstrijak.

27      F’dan il-kuntest, il-Verwaltungsgerichtshof (il-Qorti Amministrattiva) tqajjem tliet diffikultajiet.

28      L-ewwel, din il-qorti tikkonstata li mill-ewwel paragrafu tal-Artikolu 41 tad-Direttiva dwar il-VAT jirriżulta li akkwist intra-Komunitarju jitqies li seħħ fit-territorju tal-Istat Membru li jkun ħareġ in-numru ta’ identifikazzjoni tal-VAT użat għall-finijiet ta’ dan l-akkwist. Madankollu, skont l-Artikolu 42 ta’ din id-direttiva, dan ma huwiex il-każ meta d-destinatarju ta’ kunsinna sussegwenti jkun ġie indikat bħala l-persuna responsabbli għall-ħlas tal-VAT skont l-Artikolu 197 tal-imsemmija direttiva.

29      F’dan ir-rigward, l-Artikolu 197(1)(ċ) tad-Direttiva dwar il-VAT jipprevedi li l-fattura relatata ma’ tali tranżazzjoni għandha tiġi stabbilita skont id-dispożizzjonijiet tat-Taqsimiet 3 sa 5 tal-Kapitolu 3 tat-Titolu XI ta’ din id-direttiva.

30      Għalhekk, ikun hemm “indikazzjoni” tad-destinatarju ta’ kunsinna bħala l-persuna responsabbli għall-ħlas tal-VAT, fis-sens tal-Artikolu 42 tal-imsemmija direttiva, meta l-fattura tinkludi indikazzjoni bħal dik imsemmija fil-punt 11a tal-Artikolu 226 tal-istess direttiva, jiġifieri l-indikazzjoni “Inverżjoni tal-ħlas”.

31      Madankollu, il-qorti tar-rinviju tikkunsidra li għalkemm il-premessa 7 tad-Direttiva 2010/45 timmilita favur osservanza stretta tad-dispożizzjonijiet dwar il-fatturazzjoni, l-għan tal-indikazzjoni “Inverżjoni tal-ħlas” fil-fatturi relatati ma’ tranżazzjonijiet triangolari huwa li jiġi żgurat li l-aħħar xerrej fil-kuntest ta’ tali tranżazzjoni jkun jista’ jirrikonoxxi b’mod ċar u faċli li d-dejn fiskali ġie ttrasferit lilu. Issa, skont din il-qorti, dan l-għan jista’ jiġi żgurat ukoll permezz tal-indikazzjoni “tranżazzjoni trijangolari intra-Komunitarja eżentata” li tinsab fil-fatturi kontenzjużi, u dan iktar u iktar jekk jittieħed inkunsiderazzjoni l-fatt li dawn ma jindikaw l-ebda ammont ta’ VAT, iżda li l-ammont imsemmi fuq dawn il-fatturi huwa indikat espressament bħala l-“ammont nett tal-fattura”.

32      F’dawn iċ-ċirkustanzi, ma huwiex eskluż li l-indikazzjoni inizjali li tinsab fil-fatturi kontenzjużi tista’ tissodisfa l-kundizzjonijiet previsti mid-dritt tal-Unjoni għall-indikazzjoni tad-destinatarju ta’ kunsinna bħala l-persuna responsabbli għall-ħlas tal-VAT.

33      It-tieni, jekk dan ma jkunx il-każ, il-qorti tar-rinviju tirrileva li, fil-punt 49 tas-sentenza tal-Qorti tal-Ġustizzja tad-19 ta’ April 2018, Firma Hans Bühler (C-580/16, EU:C:2018:261), din l-aħħar qorti ddeċidiet li l-punt (a) tal-Artikolu 42 tad-Direttiva dwar il-VAT jirrigwarda l-kundizzjoni sostantiva meħtieġa sabiex akkwist bħal dak inkwistjoni fil-kawża li tat lok għal dik is-sentenza jitqies bħala suġġett għall-VAT, konformement mal-Artikolu 40 ta’ din id-direttiva. Għall-kuntrarju, il-punt (b) tal-Artikolu 42 tal-imsemmija direttiva jispeċifika l-modalitajiet relatati mal-prova tat-taxxa fl-Istat Membru ta’ destinazzjoni, li għandhom jitqiesu bħala kundizzjonijiet formali.

34      Waħda mill-kundizzjonijiet sostantivi skont il-punt (a) tal-Artikolu 42 teżiġi li d-destinatarju ta’ kunsinna bis-saħħa tal-Artikolu 197 tad-Direttiva dwar il-VAT ikun ġie indikat bħala l-persuna responsabbli għall-ħlas tal-VAT fuq il-fattura relatata ma’ din il-kunsinna.

35      F’dawn iċ-ċirkustanzi, il-fatturi għandhom, fir-rigward ta’ tnaqqis tat-taxxa tal-input, jitqiesu li jikkostitwixxu kundizzjonijiet formali li jistgħu, bħala regola ġenerali, jiġu kkoreġuti, peress li r-rettifika tapplika retroattivament għas-sena li matulha l-fattura ġiet inizjalment stabbilita. Barra minn hekk, anki jekk il-VAT tkun ġiet iffatturata b’mod żbaljat, fattura tista’ tiġi rrettifikata jekk l-awtur tagħha juri l-bona fide tiegħu jew ikun kompletament elimina, fi żmien xieraq, ir-riskju ta’ telf ta’ dħul mit-taxxa.

36      Madankollu, il-qorti tar-rinviju tistaqsi jekk tali possibbiltà ta’ rettifika teżistix ukoll fir-rigward ta’ kundizzjoni sostantiva, u dan iktar u iktar meta l-applikazzjoni tal-leġiżlazzjoni dwar it-tranżazzjonijiet triangolari ma tkunx vinkolanti, peress li l-persuni taxxabbli jistgħu jiddeċiedu li ma jużawx is-sistema ta’ semplifikazzjoni stabbilita minn din il-leġiżlazzjoni.

37      F’dan il-kuntest, għandu jiġi ddeterminat ukoll jekk huwiex biżżejjed li l-awtur ta’ fattura jirrettifikaha u jibgħatha lid-destinatarju tal-kunsinna inkwistjoni jew jekk huwiex meħtieġ, barra minn hekk, li r-rettifika tasal għand dan tal-aħħar. L-effett retroattiv eventwali ta’ tali rettifika għandu wkoll jiġi ddeterminat, konformement mas-sentenza tal-15 ta’ Settembru 2016, Senatex (C-518/14, EU:C:2016:691).

38      It-tielet, il-qorti tar-rinviju tirrileva li Luxury Trust Automobil tinvoka l-applikabbiltà tad-dritt Ċek. Dan tal-aħħar, kuntrarjament għad-dritt Awstrijak, ma jeżiġix li l-fatturi jinkludu riferiment għat-trasferiment tad-dejn fiskali. Id-determinazzjoni tad-dritt applikabbli teħtieġ madankollu l-interpretazzjoni tal-Artikolu 219a tad-Direttiva dwar il-VAT.

39      F’dawn iċ-ċirkustanzi, il-Verwaltungsgerichtshof (il-Qorti Amministrattiva) iddeċidiet li tissospendi l-proċedura quddiemha u li tagħmel lill-Qorti tal-Ġustizzja d-domandi preliminari li ġejjin:

“1.      L-Artikolu 42(a) tad-Direttiva [dwar il-VAT] flimkien mal-Artikolu 197(1)(c) ta’ din id-direttiva […] għandu jiġi interpetat fis-sens li jitqies li jkun hemm indikazzjoni tad-destinatarju tal-kunsinna bħala l-persuna taxxabbli meta l-fattura, li ma tindika ebda ammont tat-taxxa fuq il-valur miżjud, tirreferi għal ‘tranżazzjoni triangolari intraKomunitarja eżentata’?

2)      Fil-każ ta’ risposta fin-negattiv għall-ewwel domanda:

a)      Tali indikazzjoni fil-fattura tista’ tiġi validament emendata retroattivament (permezz ta’ ‘tranżazzjoni triangolari intraKomunitarja skont l-Artikolu 25 tal-[UStG 1994]. Id-dejn fiskali huwa ttrasferit lejn id-destinatarju tal-provvista’)?

b)      Sabiex emenda tkun effettiva, huwa neċessarju li d-destinatarju tal-fattura jirċievi l-fattura emendata?

c)      L-effett tal-emenda japplika retroattivament mid-data tal-fattura oriġinali?

3.      L-Artikolu 219a tad-Direttiva [dwar il-VAT] għandu jiġi interpretat fis-sens li għandhom jiġu applikati r-regoli dwar il-fatturazzjoni tal-Istat Membru li r-regoli tiegħu jkunu applikabbli jekk ‘akkwirent’ ma jkunx (għadu) ġie indikat fuq il-fattura bħala l-persuna taxxabbli jew għandhom jiġu applikati r-regoli tal-Istat Membru li jkunu applikabbli jekk l-indikazzjoni ta’ ‘akkwirent’ bħala l-persuna taxxabbli titqies li hija valida?”

 Fuq id-domandi preliminari

 Fuq l-ewwel domanda

40      Permezz tal-ewwel domanda tagħha, il-qorti tar-rinviju tistaqsi, essenzjalment, jekk il-punt (a) tal-Artikolu 42 tad-Direttiva dwar il-VAT, moqri flimkien mal-Artikolu 197(1)(ċ) ta’ din id-direttiva, għandux jiġi interpretat fis-sens li, fil-kuntest ta’ tranżazzjoni trijangolari, ix-xerrej finali huwa indikat b’mod validu bħala l-persuna responsabbli għall-ħlas tal-VAT meta l-fattura maħruġa mix-xerrej intermedjarju ma tinkludix l-indikazzjoni “Inverżjoni tal-ħlas”.

41      Preliminarjament, għandu jitfakkar li tranżazzjoni triangolari hija tranżazzjoni li permezz tagħha oġġett jiġi kkunsinnat minn fornitur, identifikat għall-finijiet tal-VAT fl-ewwel Stat Membru, lil xerrej intermedjarju, identifikat għall-finijiet tal-VAT fit-tieni Stat Membru, li, min-naħa tiegħu, jikkunsinna dan l-oġġett lil xerrej finali, identifikat għall-finijiet tal-VAT fit-tielet Stat Membru, fejn l-imsemmi oġġett jiġi direttament ittrasportat mill-ewwel Stat Membru għat-tielet Stat Membru.

42      Din it-tranżazzjoni triangolari tista’ tibbenefika minn sistema derogatorja għar-regola, stabbilita fl-Artikolu 2(1)(b) tad-Direttiva dwar il-VAT, li tipprovdi li l-akkwisti intra-Komunitarji ta’ merkanzija mwettqa bi ħlas fit-territorju ta’ Stat Membru huma suġġetti għall-VAT (ara, f’dan is-sens, is-sentenza tad-19 ta’ April 2018, Firma Hans Bühler, C-580/16, EU:C:2018:261, punt 27).

43      Din is-sistema derogatorja tikkonsisti, minn naħa, fl-eżenzjoni tal-akkwist intra-Komunitarju mwettaq mix-xerrej intermedjarju, li huwa identifikat għall-finijiet tal-VAT fit-tieni Stat Membru u, min-naħa l-oħra, fil-posponiment tal-intaxxar ta’ dan l-akkwist fil-livell tax-xerrej finali, stabbilit u identifikat għall-finijiet tal-VAT fit-tielet Stat Membru, fejn ix-xerrej intermedjarju jkun eżentat mill-obbligu ta’ identifikazzjoni għall-VAT f’dan l-aħħar Stat Membru. L-imsemmija sistema tirriżulta mir-rabta bejn ir-regola prevista fl-Artikolu 40 ta’ din id-direttiva u d-deroga li tirriżulta mill-Artikolu 42 tagħha.

44      Fil-fatt, l-Artikolu 40 tad-Direttiva dwar il-VAT jistabbilixxi r-regola li l-post ta’ tassazzjoni ta’ akkwist intraKomunitarju huwa l-post fejn tinsab il-merkanzija fil-mument tal-wasla tal-ispedizzjoni jew tat-trasport lejn ix-xerrej. Sabiex tiġi ggarantita l-applikazzjoni korretta ta’ din ir-regola, l-Artikolu 41 ta’ din id-direttiva jipprevedi li, meta x-xerrej ma jistabbilixxix li l-akkwist kien suġġett għall-VAT skont l-Artikolu 40 tal-imsemmija direttiva, il-post tal-akkwist intra-Komunitarju jitqies li jinsab fit-territorju tal-Istat Membru li ħareġ in-numru ta’ identifikazzjoni tal-VAT li taħtu x-xerrej ikun wettaq l-akkwist.

45      L-Artikolu 42 tal-istess direttiva jidderoga mill-applikazzjoni tal-imsemmija regola fil-kuntest tat-tranżazzjonijiet triangolari ddefiniti fl-Artikolu 141 tad-Direttiva dwar il-VAT meta, minn naħa, ix-xerrej jistabbilixxi li wettaq l-akkwist intra-Komunitarju inkwistjoni għall-finijiet ta’ kunsinna sussegwenti, imwettqa fit-territorju tal-Istat Membru ddeterminat konformement mal-Artikolu 40 ta’ din id-direttiva u li għaliha d-destinatarju ġie indikat bħala l-persuna responsabbli għall-ħlas tat-taxxa konformement mal-Artikolu 197 tal-imsemmija direttiva, u meta, min-naħa l-oħra, ix-xerrej ikun issodisfa l-obbligi relatati mal-preżentazzjoni tad-dikjarazzjoni rikapitolattiva previsti fl-Artikolu 265 tal-istess direttiva.

46      Konformement mal-Artikolu 197(1)(ċ) tad-Direttiva dwar il-VAT, il-fattura maħruġa mix-xerrej intermedjarju għandha titfassal konformement mad-dispożizzjonijiet tat-Taqsimiet 3 sa 5 tal-Kapitolu 3 tat-Titolu XI ta’ din id-direttiva. Fost dawn id-dispożizzjonijiet, il-punt 11a tal-Artikolu 226 tal-imsemmija direttiva jimponi li l-fattura jkun fiha l-indikazzjoni “Inverżjoni tal-ħlas” meta x-xerrej jew id-detentur ikun responsabbli għall-ħlas tal-VAT.

47      F’dan il-kuntest, sabiex tingħata risposta għall-ewwel domanda, għandhom jittieħdu inkunsiderazzjoni mhux biss il-kliem tal-punt (a) tal-Artikolu 42 tad-Direttiva dwar il-VAT, iżda wkoll il-kuntest tiegħu u l-għanijiet li għandhom jintlaħqu mil-leġiżlazzjoni li minnha tagħmel parti din id-dispożizzjoni (ara, f’dan is-sens, is-sentenza tad-19 ta’ April 2018, Firma Hans Bühler, C-580/16, EU:C:2018:261, punt 33).

48      L-ewwel, f’dak li jirrigwarda l-formulazzjoni tal-Artikolu 42 tad-Direttiva dwar il-VAT, minn din jirriżulta, minn naħa, li din hija deroga mill-ewwel paragrafu tal-Artikolu 41 ta’ din id-direttiva u, min-naħa l-oħra, li l-applikazzjoni ta’ din id-deroga hija suġġetta għall-fatt li jiġu ssodisfatti ż-żewġ kundizzjonijiet kumulattivi previsti f’dawn il-punti (a) u (b) tal-Artikolu 42 (ara, f’dan is-sens, is-sentenza tad-19 ta’ April 2018, Firma Hans Bühler, C-580/16, EU:C:2018:261, punt 45).

49      Filwaqt li l-punt (a) tal-Artikolu 42 tad-Direttiva dwar il-VAT jippreċiża l-kundizzjoni sostantiva meħtieġa sabiex akkwist imwettaq fil-kuntest ta’ tranżazzjoni triangolari jitqies bħala suġġett għall-VAT konformement mal-Artikolu 40 ta’ din id-direttiva, il-punt (b) tal-Artikolu 42 tal-imsemmija direttiva jistabbilixxi l-kundizzjonijiet formali li skonthom il-prova tat-tassazzjoni fl-Istat Membru ta’ destinazzjoni tat-trasport jew tal-ispedizzjoni intra-Komunitarja għandha tiġi prodotta (ara, f’dan is-sens, is-sentenza tad-19 ta’ April 2018, Firma Hans Bühler, C-580/16, EU:C:2018:261, punt 49).

50      It-tieni, fir-rigward tal-kuntest tal-Artikolu 42 tad-Direttiva dwar il-VAT, mill-ġurisprudenza tal-Qorti tal-Ġustizzja jirriżulta li dan l-artikolu jippreċiża u jikkompleta l-kundizzjonijiet għall-applikazzjoni tal-miżura ta’ semplifikazzjoni prevista fl-Artikolu 141 ta’ din id-direttiva (ara, f’dan is-sens, is-sentenza tad-19 ta’ April 2018, Firma Hans Bühler, C-580/16, EU:C:2018:261, punt 37). Issa kemm il-punt (a) tal-Artikolu 42 tad-Direttiva dwar il-VAT kif ukoll il-punt (e) tal-Artikolu 141 ta’ din id-direttiva jirreferu għall-Artikolu 197 tal-imsemmija direttiva, li min-naħa tiegħu jimponi l-osservanza tad-dispożizzjonijiet tal-Kapitolu 3 tat-Titolu XI tal-istess direttiva, li minnu l-Artikolu 226 ta’ din tal-aħħar jagħmel parti.

51      Minn dan isegwi li, fil-kuntest speċifiku tas-sistema derogatorja applikabbli għat-tranżazzjonijiet triangolari, ix-xerrej intermedjarju ta’ tranżazzjoni triangolari ma jistax jissostitwixxi indikazzjoni oħra bl-indikazzjoni “Inverżjoni tal-ħlas” filwaqt li l-punt 11a tal-Artikolu 226 tad-Direttiva dwar il-VAT espressament jimponi din l-indikazzjoni.

52      It-tielet, l-għanijiet imfittxija mis-sistema derogatorja msemmija fl-Artikoli 42 u 141 tad-Direttiva dwar il-VAT isostnu din l-interpretazzjoni.

53      Fil-fatt, għalkemm l-għan tal-Artikolu 141 ta’ din id-direttiva huwa li jiġi evitat li x-xerrej intermedjarju jkollu jissodisfa obbligi ta’ identifikazzjoni u ta’ dikjarazzjoni fl-Istat Membru ta’ destinazzjoni tal-merkanzija (sentenza tad-19 ta’ April 2018, Firma Hans Bühler, C-580/16, EU:C:2018:261, punt 41), l-Artikoli 41 u 42 tal-imsemmija direttiva huma intiżi li jiggarantixxu l-issuġġettar għall-VAT tal-akkwist intra-Komunitarju inkwistjoni fil-livell tax-xerrej finali, filwaqt li tiġi evitata t-tassazzjoni doppja ta’ din it-tranżazzjoni (sentenza tad-19 ta’ April 2018, Firma Hans Bühler, C-580/16, EU:C:2018:261, punt 50).

54      Issa, kif l-Avukata Ġenerali rrilevat fil-punt 46 tal-konklużjonijiet tagħha, ir-raġuni wara l-indikazzjonijiet li fattura għandha tinkludi skont l-Artikolu 226 tad-Direttiva dwar il-VAT hija li d-destinatarju tagħha jiġi informat bil-klassifikazzjoni legali tat-tranżazzjoni mwettqa mill-emittent tagħha. Dan l-għan huwa iktar u iktar imperattiv meta dan l-emittent iqis li, eċċezzjonalment, ma huwiex huwa iżda d-destinatarju tal-kunsinna li huwa responsabbli għall-ħlas tal-VAT.

55      Peress li s-sistema derogatorja prevista fl-Artikoli 42 u 141 tad-Direttiva dwar il-VAT hija fakultattiva, hija l-formalità meħtieġa fil-punt 11a tal-Artikolu 226 ta’ din id-direttiva li tippermetti li jiġi ggarantit li d-destinatarju finali ta’ kunsinna jsir jaf bl-obbligi fiskali tiegħu. Fil-fatt, il-karatteristika tal-mekkaniżmu tal-awtolikwidazzjoni tirrigwarda preċiżament il-fatt li jekk ma jseħħ l-ebda ħlas tal-VAT bejn il-fornitur u l-persuna taxxabbli destinatarja ta’ kunsinna, dan huwa għaliex din tal-aħħar hija responsabbli għall-ħlas ta’ din it-taxxa fir-rigward ta’ din il-kunsinna (ara, f’dan is-sens, is-sentenza tat-2 ta’ Lulju 2020, Terracult, C-835/18, EU:C:2020:520, punt 22). Għaldaqstant, ma jistax ikun hemm inċertezza f’dan ir-rigward.

56      Fid-dawl tal-motivi preċedenti, ir-risposta li għandha tingħata għall-ewwel domanda hija li l-punt (a) tal-Artikolu 42 tad-Direttiva dwar il-VAT, moqri flimkien mal-Artikolu 197(1)(ċ) ta’ din id-direttiva, għandu jiġi interpretat fis-sens li, fil-kuntest ta’ tranżazzjoni triangolari, ix-xerrej finali ma jkunx ġie indikat b’mod validu bħala l-persuna responsabbli għall-ħlas tal-VAT meta l-fattura maħruġa mix-xerrej intermedjarju ma tinkludix l-indikazzjoni “Inverżjoni tal-ħlas”, imsemmija fil-punt 11a tal-Artikolu 226 tal-imsemmija direttiva.

 Fuq it-tieni domanda

57      Permezz tat-tieni domanda tagħha, il-qorti tar-rinviju tistaqsi, essenzjalment, jekk il-punt 11a tal-Artikolu 226 tad-Direttiva dwar il-VAT għandux jiġi interpretat fis-sens li l-ommissjoni, fuq fattura, tal-indikazzjoni “Inverżjoni tal-ħlas” meħtieġa minn din id-dispożizzjoni tista’ tiġi rrettifikata sussegwentement biż-żieda ta’ indikazzjoni li tispeċifika li din il-fattura tikkonċerna tranżazzjoni triangolari intra-Komunitarja u li d-dejn fiskali huwa ttrasferit lid-destinatarju tal-kunsinna.

58      Fil-każ ta’ risposta pożittiva għal din it-tieni domanda, din il-qorti tistaqsi, minn naħa, jekk il-validità ta’ tali rettifika hijiex suġġetta għall-fatt li hija tasal għand id-destinatarju tagħha u, min-naħa l-oħra, jekk il-fattura hekk irrettifikata għandhiex effett retroattiv fid-data tal-fattura inizjali.

59      F’dan ir-rigward, għandu jitfakkar li, għalkemm il-Qorti tal-Ġustizzja rrikonoxxiet li l-prinċipju fundamentali ta’ newtralità tal-VAT jeżiġi li t-tnaqqis jew ir-rimbors tal-VAT tal-input jingħata minkejja li l-persuni taxxabbli jkunu naqsu milli jissodisfaw ċerti rekwiżiti proċedurali, dan huwa suġġett għall-kundizzjoni li r-rekwiżiti sostantivi jkunu ġew barra minn hekk issodisfatti (ara, f’dan is-sens, is-sentenzi tas-27 ta’ Settembru 2007, Collée, C-146/05, EU:C:2007:549, punt 31; tad-19 ta’ April 2018, Firma Hans Bühler, C-580/16, EU:C:2018:261, punti 50 u 51, kif ukoll tal-21 ta’ Ottubru 2021, Wilo Salmson France, C-80/20, EU:C:2021:870, punt 76).

60      Fil-fatt, it-tranżazzjonijiet inkwistjoni għandhom jiġu ntaxxati billi jittieħdu inkunsiderazzjoni l-karatteristiċi oġġettivi tagħhom (ara, f’dan is-sens, is-sentenza tas-27 ta’ Settembru 2007, Collée, C-146/05, EU:C:2007:549, punt 30 u l-ġurisprudenza ċċitata).

61      Konsegwentement, ma jistax ikun hemm kwistjoni ta’ rettifika tal-fattura meta tkun nieqsa kundizzjoni għall-applikazzjoni tas-sistema derogatorja applikabbli għat-tranżazzjonijiet triangolari, bħall-indikazzjoni meħtieġa fil-punt 11a tal-Artikolu 226 tad-Direttiva dwar il-VAT. Kif l-Avukata Ġenerali rrilevat fil-punti 57 u 61 tal-konklużjonijiet tagħha, it-twettiq a posteriori ta’ kundizzjoni ta’ applikazzjoni neċessarja għat-trasferiment tad-dejn tal-VAT lid-destinatarju ta’ kunsinna ma jikkostitwixxix rettifika. Huwa l-ewwel ħruġ tal-fattura rikjesta, li ma jistax ikollha effett retroattiv.

62      Fid-dawl tal-kunsiderazzjonijiet preċedenti, ir-risposta li għandha tingħata għat-tieni domanda hija li l-punt 11a tal-Artikolu 226 tad-Direttiva dwar il-VAT għandu jiġi interpretat fis-sens li l-ommissjoni, fuq fattura, tal-indikazzjoni “Inverżjoni tal-ħlas” meħtieġa minn din id-dispożizzjoni ma tistax tiġi rrettifikata sussegwentement biż-żieda ta’ indikazzjoni li tispeċifika li din il-fattura tikkonċerna tranżazzjoni triangolari intra-Komunitarja u li d-dejn fiskali huwa ttrasferit lid-destinatarju tal-kunsinna.

 Fuq it-tielet domanda

63      Permezz tat-tielet domanda tagħha, il-qorti tar-rinviju tistaqsi, essenzjalment, jekk l-Artikolu 219a tad-Direttiva dwar il-VAT għandux jiġi interpretat fis-sens li jimponi li jiġu applikati d-dispożizzjonijiet dwar il-fatturazzjoni tal-Istat Membru tax-xerrej intermedjarju jew dawk tal-Istat Membru tax-xerrej finali.

64      Il-qorti tar-rinviju tistaqsi dwar dan il-punt għaliex, fil-kuntest tal-kawża prinċipali, Luxury Trust Automobil issostni li huwa d-dritt Ċek li għandu jiġi applikat. Issa dan ma jeżiġix li l-fatturi jinkludu riferiment għat-trasferiment tad-dejn fiskali.

65      Madankollu, mir-risposti mogħtija għall-ewwel żewġ domandi jirriżulta li r-risposta għat-tielet domanda ma jistax ikollha effett fuq l-eżitu tal-kawża prinċipali.

66      Fil-fatt, minħabba l-assenza tal-indikazzjoni “Inverżjoni tal-ħlas” fil-fatturi kontenzjużi, l-indikazzjoni tax-xerrej finali bħala l-persuna responsabbli għall-ħlas tal-VAT ma saritx b’mod validu. Ix-xerrej intermedjarju għandu, konsegwentement, jitqies bħala l-persuna responsabbli għall-ħlas ta’ din it-taxxa fl-Istat Membru li jkun ħariġlu n-numru ta’ identifikazzjoni li huwa uża għall-finijiet tal-akkwist intra-Komunitarju inkwistjoni, konformement mal-ewwel paragrafu tal-Artikolu 41 tad-Direttiva dwar il-VAT.

67      Fi kwalunkwe każ, ir-rekwiżiti stabbiliti fl-Artikolu 42, fil-punt (e) tal-Artikolu 141 u fil-punt 11a tal-Artikolu 226 tad-Direttiva dwar il-VAT ma jistgħux ivarjaw minn Stat Membru għal ieħor. Il-qorti tar-rinviju għandha l-obbligu li tinterpreta d-dritt applikabbli għall-kawża prinċipali, kemm jekk jirrigwarda d-dritt tal-Istat Membru tax-xerrej intermedjarju jew dak tax-xerrej finali, konformement mad-dritt tal-Unjoni (ara, b’analoġija, is-sentenza tat-18 ta’ Novembru 2020, DelayFix, C-519/19, EU:C:2020:933, punt 51).

68      Għaldaqstant, fid-dawl tal-motivi preċedenti, ma hemmx lok li tingħata risposta għat-tielet domanda.

 Fuq l-ispejjeż

69      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li għandha tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, minbarra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi:

1)      Il-punt (a) tal-Artikolu 42 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud, kif emendata bid-Direttiva tal-Kunsill 2010/45/UE tat-13 ta’ Lulju 2010, moqri flimkien mal-Artikolu 197(1)(ċ) tad-Direttiva 2006/112, kif emendata,

għandu jiġi interpretat fis-sens li:

fil-kuntest ta’ tranżazzjoni triangolari, ix-xerrej finali ma jkunx ġie indikat b’mod validu bħala l-persuna responsabbli għall-ħlas tat-taxxa fuq il-valur miżjud (VAT) meta l-fattura maħruġa mix-xerrej intermedjarju ma tinkludix l-indikazzjoni “Inverżjoni tal-ħlas”, imsemmija fil-punt 11a tal-Artikolu 226 tad-Direttiva 2006/112, kif emendata.

2)      Il-punt 11a tal-Artikolu 226 tad-Direttiva 2006/112, kif emendata bid-Direttiva 2010/45,

għandu jiġi interpretat fis-sens li:

l-ommissjoni, fuq fattura, tal-indikazzjoni “Inverżjoni tal-ħlas” meħtieġa minn din id-dispożizzjoni, ma tistax tiġi rrettifikata sussegwentement biż-żieda ta’ indikazzjoni li tispeċifika li din il-fattura tikkonċerna tranżazzjoni triangolari intra-Komunitarja u li d-dejn fiskali huwa ttrasferit lid-destinatarju tal-kunsinna.

Firem

*      Lingwa tal-kawża: il-Ġermaniż.