Available languages

Taxonomy tags

Info

References in this case

Share

Highlight in text

Go

Edizzjoni Provviżorja

SENTENZA TAL-QORTI TAL-ĠUSTIZZJA (L-Għaxar Awla)

6 ta’ Ottubru 2022 (*)

“Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Tnaqqis tal-VAT tal-input imħallsa – Oġġetti u servizzi użati mill-persuna taxxabbli għall-ħolqien ta’ beni kapitali – Artikoli 184 sa 187 – Aġġustament tat-tnaqqis – Obbligu ta’ aġġustament tat-tnaqqis tal-VAT fil-każ ta’ tpoġġija fi stralċ ta’ din il-persuna taxxabbli u tat-tħassir ta’ din tal-aħħar mir-reġistru tal-persuni taxxabbli suġġetti għall-VAT”

Fil-Kawża C-293/21,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mil-Lietuvos vyriausiasis administracinis teismas (il-Qorti Amministrattiva Suprema tal-Litwanja), permezz ta’ deċiżjoni tat-28 ta’ April 2021, li waslet fil-Qorti tal-Ġustizzja fis-7 ta’ Mejju 2021, fil-proċedura

UAB “Vittamed technologijos”, fi stralċ,

vs

Valstybinė mokesčių inspekcija,

fil-preżenza ta’:

Kauno apskrities valstybinė mokesčių inspekcija,

IL-QORTI TAL-ĠUSTIZZJA (L-Għaxar Awla),

komposta minn I. Jarukaitis, President tal-Awla, D. Gratsias u Z. Csehi (Relatur), Imħallfin,

Avukat Ġenerali: T. Ćapeta,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–        għall-Gvern Litwan, minn K. Dieninis u V. Kazlauskaitė-Švenčionienė, bħala aġenti,

–        għall-Kummissjoni Ewropea, minn J. Jokubauskaitė u L. Lozano Palacios, bħala aġenti,

wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikoli 184 sa 187 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, u rettifika fil-ĠU 2007, L 335, p. 60, iktar ’il quddiem id-“Direttiva tal-VAT”).

2        Din it-talba tressqet fil-kuntest ta’ tilwima bejn UAB “Vittamed technologijos”, fi stralċ (iktar ’il quddiem “Vittamed”), u l-Valstybinė mokesčių inspekcija prie Lietuvos Respublikos finansų ministerijos (l-Ispezzjoni Fiskali Nazzjonali fi Ħdan il-Ministeru għall-Finanzi tar-Repubblika tal-Litwanja), dwar l-obbligu ta’ aġġustament tat-tnaqqis tat-taxxa fuq il-valur miżjud (VAT) fir-rigward ta’ oġġetti u ta’ servizzi li fir-rigward tagħhom kien ġie eżerċitat id-dritt għal tnaqqis u li kien ġie miksub għall-finijiet ta’ ħolqien ta’ beni kapitali li finalment ma ġewx użati u ma kinux ser ikunu użati għall-attività ekonomika ntaxxata intiża, minħabba d-deċiżjoni ta’ tpoġġija fi stralċ tal-persuna taxxabbli u tat-tħassir ta’ din tal-aħħar mir-reġistru tal-persuna taxxabbli suġġetti għall-VAT.

 Il-kuntest ġuridiku

 Id-dritt tal-Unjoni

3        L-Artikolu 167 tad-Direttiva tal-VAT huwa fformulat kif ġej:

“Dritt ta’ tnaqqis iseħħ fil-ħin meta t-taxxa mnaqqsa tiġi imposta.”

4        L-Artikolu 168(a) ta’ din id-direttiva jipprevedi:

“Sakemm il-merkanzija [oġġetti] u s-servizzi jintużaw għall-iskopijiet tat-transazzjonijiet taxxabbli ta’ persuna taxxabbli, il-persuna taxxabbli għandha tkun intitolata, fl-Istat Membru li fih twettaq dawn it-transazzjonijiet, li tnaqqas mll-VAT li għandha tħallas dan li ġej:

(a)      il-VAT dovuta jew imħallsa f’dak l-Istat Membru rigward provvisti li sarulha ta’ merkanzija jew servizzi, li twettqu jew li għad iridu jitwettqu minn persuna taxxabli oħra”.

5        Il-Kapitolu 5 tat-Titolu X tal-imsemmija direttiva, intitolat “Aġġustament tat-tnaqqis”, jinkludi, b’mod partikolari, l-Artikoli 184 sa 187.

6        L-Artikolu 184 ta’ din l-istess direttiva jipprevedi:

“It-tnaqqis inizjali għandu jiġi aġġustat fejn dan ikun ogħla jew inqas minn dak li għalih il-persuna taxxabbli kienet intitolata.”

7        L-Artikolu 185 tad-Direttiva tal-VAT jipprovdi:

“1.      L-aġġustament għandu, b’mod partikolari, isir fejn, wara li ssir id-denunzja tal-VAT, isir xi tibdil fil-fatturi użati biex jiddeterminaw l-ammont li għandu jitnaqqas, per eżempju fejn ix-xirjiet huma kkanċellati jew hu miksub roħs fil-prezzijiet.

2.      Bħala deroga mill-paragrafu 1, m’għandu jsir l-ebda aġġustament fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ distruzzjoni, telf jew serq tal–proprjetà li ġie ppruvat jew ikkonfermat kif imiss, jew fil-każ ta’ merkanzija riżervata għall-iskop ta’ għoti ta’ rigali ta’ valur żgħir jew ta’ l-għoti ta’ kampjuni, kif speċifikat fl-Artikolu 16.

Madanakollu, fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ serq, l-Istati Membri jistgħu jeħtieġu li jsir aġġustament.”

8        L-Artikolu 186 ta’ din id-direttiva jistabbilixxi:

“L-Istati Membri għandhom jistabbilixxu r-regoli dettaljati għall-applikazzjoni ta’ l-Artikoli 184 u 185.”

9        L-Artikolu 187 tal-imsemmija direttiva jistabbilixxi:

“1.      Fil–każ ta’ merkanzija [beni] kapitali, l-aġġustment għandu jkun mifrux fuq ħames snin inkluża dik meta l-merkanzija kienet akkwistata jew iffabbrikata.

Madankollu, l-Istati Membri jistgħu jibbażaw l-aġġustament fuq perijodu ta’ ħames snin sħaħ li jibda miż-żmien meta l-merkanzija hija użata għall-ewwel darba.

Fil–każ ta' proprjetà [beni kapitali] immobbli akkwistata bħala merkanzija kapitali, il-perijodu ta’ aġġustament jista’ jiġi estiż sa 20 sena.

2.      L-aġġustament annwali għandu jsir biss fir-rigward ta’ wieħed minn ħamsa tal-VAT imposta fuq il-merkanzija kapitali, jew, jekk il-perijodu ta’ referenza ġie estiż, fir-rigward tal-frazzjoni korrispondenti tiegħu.

L-aġġustament imsemmi fl-ewwel subparagrafu għandu jsir abbażi tal-varjazzjonijet fid-dritt għal tnaqqis fi snin sussegwenti b’ relazzjoni għal dik fis-sena li fiha l-merkanzija kienet akkwistata, iffabbrikata jew, fejn hu xieraq, użata għall-ewwel darba.”

 Id-dritt Litwan

10      Il-punt 1 tal-Artikolu 58(1) tal-Lietuvos Respublikos pridėtinės vertės mokesčio įstatymas (il-Liġi tar-Repubblika tal-Litwanja dwar it-Taxxa fuq il-Valur Miżjud), tal-5 ta’ Marzu 2002 (Žin., 2002, Nru 35-1271), fil-verżjoni tagħha applikabbli għall-fatti fil-kawża prinċipali (iktar ’il quddiem il-“Liġi dwar il-VAT”), jipprovdi:

“Persuna suġġetta għall-VAT għandha d-dritt li tnaqqas il-VAT tal-input imħallsa u/jew fuq l-importazzjoni ta’ oġġetti u/jew servizzi, bil-kundizzjoni li dawn l-oġġetti u/jew servizzi jkunu maħsuba li jintużaw fil-kuntest tal-attivitajiet li ġejjin tal-persuna taxxabbli għall-VAT:

[...] provvista ta’ oġġetti u/jew provvista ta’ servizzi li fuqhom il-VAT hija taxxabbli [...]”

11      L-Artikolu 66(2) tal-Liġi dwar il-VAT jipprevedi:

“Meta l-oġġetti u/jew is-servizzi li fuqhom il-VAT (u, fil-każ fejn dawn l-oġġetti u/jew servizzi huma maħluqa mill-persuna stess, il-VAT applikata fuq dawk użati għal dan il-ħolqien) tal-input imħallsa u/jew il-VAT fuq l-importazzjoni tkun tnaqqset totalment jew parzjalment, huma użati għal attività oħra għajr dik imsemmija fl-Artikolu 58(1) ta’ din il-liġi jew huma mitlufa, ikun hemm lok li jsir aġġustament tat-tnaqqis tal-VAT, fid-dikjarazzjoni tal-VAT li tikkorrispondi għall-perijodu taxxabbli li matulu ġew rikonoxxuti ċ-ċirkustanzi msemmija iżjed ’il fuq billi jżid l-ammont tal-VAT pagabbli lill-baġit jew billi jitnaqqas l-ammont tal-VAT rimborsabbli minn dan il-baġit konsegwentement [...]”

12      L-Artikolu 69(1) tal-Liġi dwar il-VAT jipprovdi:

“Meta persuna titħassar mir-reġistru tal-persuni taxxabbli suġġetti għall-VAT jew meta persuna taxxabbli suġġetta għall-VAT tkun suġġetta għal stralċ, it-tnaqqis tal-VAT għandu jiġi aġġustat, konformement mal-proċedura stabbilita fl-Artikoli 66 u 67 ta’ din il-liġi, fid-dikjarazzjoni tal-VAT tal-persuna li titħassar minn dan ir-reġistru jew li hija fi stralċ, u l-VAT tal-input imħallsa u/jew fuq l-importazzjoni titnaqqas fuq l-oġġetti u/jew is-servizzi, inklużi l-oġġetti kapitali, li ma jibqgħux jintużaw fil-kuntest tal-attivitajiet imsemmija fl-Artikolu 58(1) ta’ din il-liġi, hija reintegrata fil-baġit”.

 Il-kawża prinċipali u d-domanda preliminari

13      Vittamed hija kumpannija stabbilita fil-Litwanja li għandha bħala attività tagħha t-twettiq ta’ riċerka fix-xjenzi tekniċi u l-applikazzjonijiet prattiċi tagħhom.

14      Mill-1 ta’ Marzu 2012, din il-kumpannija ma wettqet l-ebda kunsinna ta’ oġġetti jew provvista ta’ servizzi suġġetti għall-VAT.

15      Vittamed akkwistat, fl-2012 u fl-2013, b’mod partikolari, oġġetti u servizzi fil-kuntest tat-twettiq ta’ proġett internazzjonali ffinanzjat mill-Unjoni Ewropea, li l-għan tiegħu kien il-ħolqien ta’ prototip ta’ apparat mediku dijanjostiku u ta’ sorveljanza kif ukoll il-kummerċjalizzazzjoni ulterjuri tiegħu fis-suq. B’hekk inħarġu tmien fatturi fil-konfront tagħha. Hija naqqset EUR 87 987 bħala VAT tal-input imħallsa relatata mal-kunsinna ta’ dawn l-oġġetti u ma’ dawn il-provvisti ta’ servizzi. Il-proġett ikkonċernat tlesta fil-31 ta’ Diċembru 2013.

16      Vittamed użat l-imsemmija oġġetti u servizzi billi ħolqot beni kapitali intanġibbli (liċenzji) u tanġibbli (prototipi ta’ apparat). Hija xtaqet tuża dawn il-beni kapitali fil-kuntest tal-attività futura tagħha ntaxxata.

17      Ladarba dan il-proġett intemm, Vittamed ġarrbet snin finanzjarji ta’ defiċit, fl-2014 u fl-2015, u t-telf preċedenti rreġistrat minn din il-kumpannija żdied kontinwament. Fid-dawl ta’ dawn is-snin finanzjarji ta’ defiċit kif ukoll tan-nuqqas ta’ ordnijiet u ta’ dħul potenzjali, ġie deċiż li ma jibqgħux jiġu segwiti l-attivitajiet ta’ din il-kumpannija. Għal din ir-raġuni, l-uniku azzjonist ta’ Vittamed ħa d-deċiżjoni, fix-xahar ta’ Awwissu 2015, li jqiegħed fi stralċ l-istess kumpannija, wara li kkonstata li l-attivitajiet xjentifiċi innovattivi ta’ din tal-aħħar ma kinux ser ikunu vijabbli.

18      Fl-10 ta’ Settembru 2015, Vittamed kisbet l-istatus legali ta’ “persuna ġuridika fi stralċ”.

19      Fit-23 ta’ Settembru ta’ wara, Vittamed ressqet talba għat-tħassir mir-reġistru tal-persuni taxxabbli suġġetti għall-VAT u ppreżentat dikjarazzjoni tal-VAT li kellha tiġi ppreżentata minn persuna mħassra mir-reġistru tal-persuni taxxabbli suġġetti għall-VAT, fir-rigward tal-aħħar perijodu taxxabbli, mill-1 ta’ Settembru sat-23 ta’ Settembru 2015. F’din id-dikjarazzjoni tal-VAT, Vittamed ma aġġustatx it-tnaqqis tal-VAT fir-rigward tal-bilanċ tal-oġġetti jew tas-servizzi kollha li kienu għadhom mhux mibjugħa.

20      Fl-istess jum, Vittamed tħassret mir-reġistru tal-persuni taxxabbli għall-VAT.

21      Skont ordni ta’ kontroll tat-28 ta’ Diċembru 2017, Vittamed kienet suġġetta għal kontroll fiskali mill-Kauno apskrities valstybinė mokesčių inspekcija (l-Ispettorat Fiskali Nazzjonali tad-Distrett ta’ Kaunas, il-Litwanja).

22      Permezz ta’ deċiżjoni tal-24 ta’ Jannar 2019, l-Ispettorat Fiskali Nazzjonali tad-Distrett ta’ Kaunas ikkonstata, essenzjalment, li, meta ttieħdet id-deċiżjoni li jitqiegħed fi stralċ Vittamed, hija din tal-aħħar li għandha taġġusta t-tnaqqis tal-VAT tal-input imħallsa u li ddaħħal mill-ġdid fil-baġit il-VAT relatata mal-oġġetti jew mas-servizzi akkwistati li ma jintużawx għal attivitajiet suġġetti għall-VAT. Konsegwentement, hija imponiet fuq Vittamed il-ħlas ta’ ammont addizzjonali ta’ EUR 87 987 bħala VAT addizzjonali, flimkien ma’ ammont ta’ EUR 30 427 bħala interessi moratorji, kif ukoll dak ta’ multa fl-ammont ta’ EUR 8 798, li jikkorrispondi għal 10 % tal-VAT dovuta.

23      Vittamed ikkontestat din id-deċiżjoni quddiem l-Ispettorat Fiskali Nazzjonali għall-Ministeru għall-Finanzi tar-Repubblika tal-Litwanja, għar-raġuni li, skont il-ġurisprudenza tal-Qorti tal-Ġustizzja, meta l-ispejjeż jintefqu fil-kuntest tal-preparazzjoni ta’ attività ekonomika, it-tnaqqis tal-VAT tal-input imħallsa jista’ jintalab anki meta din l-attività ekonomika ma titkompliex u li finalment it-tranżazzjonijiet taxxabbli previsti ma seħħewx.

24      Permezz tad-deċiżjoni tad-19 ta’ April 2019, l-Ispettorat Fiskali Nazzjonali fi Ħdan il-Ministeru għall-Finanzi tar-Repubblika tal-Litwanja żamm id-deċiżjoni tal-Ispezzjoni Fiskali Nazzjonali tad-Distrett ta’ Kaunas.

25      Vittamed ressqet ilment quddiem il-Mokestinių ginčų komisija prie Lietuvos Respublikos Vyriausybės (il-Kummissjoni tat-Tilwim Fiskali mal-Gvern tar-Repubblika tal-Litwanja). Permezz ta’ deċiżjoni tal-20 ta’ Ġunju 2019, din tal-aħħar ċaħdet dan l-ilment bħala infondat.

26      Vittamed ippreżentat rikors kontra din id-deċiżjoni quddiem il-Vilniaus apygardos administracinis teismas (il-Qorti Amministrattiva Reġjonali ta’ Vilnjus, il-Litwanja), liema ġie miċħud permezz ta’ sentenza tal-10 ta’ Ottubru 2019.

27      Vittamed ippreżentat appell minn din is-sentenza quddiem il-Lietuvos vyriausiasis administracinis teismas (il-Qorti Amministrattiva Suprema tal-Litwanja), li hija l-qorti tar-rinviju.

28      Il-qorti tar-rinviju tesponi d-dubji tagħha dwar l-eżistenza ta’ obbligu ta’ aġġustament tat-tnaqqis tal-VAT fit-tilwima fil-kawża prinċipali, minkejja l-fatt li l-azzjonist uniku tal-persuna taxxabbli ddeċieda li jpoġġi lil din tal-aħħar fi stralċ u li din il-persuna taxxabbli kienet, bħala konsegwenza ta’ din id-deċiżjoni, ressqet talba għat-tħassir mir-reġistru tal-persuni taxxabbli suġġetti għall-VAT, li ġiet issodisfatta. F’dan ir-rigward, hija tenfasizza kontradizzjoni apparenti fil-ġurisprudenza tal-Qorti tal-Ġustizzja.

29      Minn naħa, filwaqt li tagħmel riferiment, qabelxejn, għall-punt 20 tas-sentenza tad-9 ta’ Lulju 2020, Finanzamt Bad Neuenahr-Ahrweiler (C-374/19, EU:C:2020:546), il-qorti tar-rinviju tfakkar li l-mekkaniżmu ta’ aġġustament previst fl-Artikoli 184 sa 187 tad-Direttiva tal-VAT għandu l-għan li jistabbilixxi relazzjoni mill-qrib u diretta bejn id-dritt għal tnaqqis tal-VAT tal-input imħallsa u l-użu tal-oġġetti jew tas-servizzi kkonċernati għal tranżazzjonijiet tal-output taxxabbli. Sussegwentement, billi bbażat ruħha fuq il-punt 38 tas-sentenza tal-11 ta’ April 2018, SEB bankas (C-532/16, EU:C:2018:228), din il-qorti tirrileva li, fil-kuntest tas-sistema komuni tal-VAT, huma biss it-taxxi tal-input imposti fuq l-oġġetti jew is-servizzi użati mill-persuni taxxabbli għall-finijiet tat-tranżazzjonijiet taxxabbli tagħhom li jistgħu jitnaqqsu. F’dan ir-rigward, l-imsemmija qorti tippreċiża li, skont il-punt 56 tas-sentenza tal-31 ta’ Mejju 2018, Kollroß u Wirtl (C-660/16 u C-661/16, EU:C:2018:372), l-Artikolu 185(1) tad-Direttiva tal-VAT jistabbilixxi l-prinċipju li tali aġġustament għandu b’mod partikolari jsir meta tibdil tal-elementi meħuda inkunsiderazzjoni għad-determinazzjoni tal-ammont ta’ dan it-tnaqqis isir wara d-dikjarazzjoni tal-VAT. Fl-aħħar nett, l-istess qorti tiċċita l-punti 44 sa 46 tas-sentenza tat-12 ta’ Novembru 2020, ITH Comercial Timişoara (C-734/19, EU:C:2020:919), sabiex tosserva li din ir-relazzjoni stretta u diretta li għandha teżisti bejn id-dritt għal tnaqqis tal-VAT tal-input imħallsa u t-twettiq ta’ tranżazzjonijiet taxxabbli previsti tinkiser jekk il-persuna taxxabbli ma jkollhiex iktar l-intenzjoni li tuża l-oġġetti u s-servizzi kkonċernati għal tranżazzjonijiet tal-output taxxabbli jew tużahom sabiex twettaq tranżazzjonijiet eżenti.

30      Il-qorti tar-rinviju tinnota f’dan ir-rigward li l-adozzjoni tad-deċiżjoni tal-azzjonist uniku tal-persuna taxxabbli kkonċernata li tqiegħed lil din tal-aħħar fi stralċ u t-talba għat-tħassir mir-reġistru tal-persuni taxxabbli għall-VAT imressqa minn din il-persuna taxxabbli jikkonfermaw b’mod oġġettiv li l-imsemmija persuna taxxabbli ma tkunx tixtieq tuża iktar l-oġġetti jew is-servizzi li fir-rigward tagħhom il-VAT imħallsa tkun tnaqqset fil-kuntest ta’ attivitajiet ekonomiċi taxxabbli, li jikkostitwixxi modifika, wara d-dikjarazzjoni tal-VAT, tal-elementi meħuda inkunsiderazzjoni għad-determinazzjoni tal-ammont tat-tnaqqis, fis-sens tal-Artikolu 185(1) tad-Direttiva tal-VAT. Din il-qorti tirrileva li tali evalwazzjoni hija kompatibbli mal-Artikolu 69(1) tal-Liġi dwar il-VAT.

31      Min-naħa l-oħra, il-qorti tar-rinviju tirreferi għall-ġurisprudenza li tirriżulta mis-sentenzi tal-15 ta’ Jannar 1998, Ghent Coal Terminal, (C-37/95, EU:C:1998:1, punti 19 u 20), tat-28 ta’ Frar 2018, Imofloresmira – Investimentos Imobiliários, (C-672/16, EU:C:2018:134, punti 40 u 42), kif ukoll tas-17 ta’ Ottubru 2018, Ryanair, (C-249/17, EU:C:2018:834, punt 25), li tipprovdi li d-dritt għal tnaqqis jibqa’, fil-prinċipju, akkwistat anki jekk, sussegwentement, minħabba ċirkustanzi indipendenti mir-rieda tagħha, il-persuna taxxabbli ma tużax oġġetti u servizzi li taw lok għal tnaqqis fil-kuntest ta’ tranżazzjonijiet taxxabbli, filwaqt li tenfasizza li persuna taxxabbli żżomm id-dritt għal tnaqqis, meta dan id-dritt jitnissel, anki jekk din il-persuna taxxabbli ma setgħetx, għal raġunijiet indipendenti, tuża l-oġġetti u s-servizzi fl-oriġini tat-tnaqqis fil-kuntest ta’ tranżazzjonijiet taxxabbli. Hija tqis li huwa possibbli li jitqies, skont din il-ġurisprudenza, li, ħlief fil-każ imsemmi fit-tieni subparagrafu tal-Artikolu 185(2) tad-Direttiva tal-VAT, id-dritt għal tnaqqis tal-VAT inizjali huwa miżmum u li ma jeżisti ebda obbligu li jsir aġġustament tal-VAT fil-każ fejn l-oġġetti jew is-servizzi ma jkunux intużaw matul l-attività ekonomika kkonċernata minħabba ċirkustanzi indipendenti mir-rieda tal-persuna taxxabbli.

32      Il-qorti tar-rinviju tistaqsi f’dan ir-rigward dwar jekk id-deċiżjoni ta’ tqegħid fi stralċ tal-persuna taxxabbli kif ukoll it-talba għat-tħassir mir-reġistru tal-persuni taxxabbli suġġetti għall-VAT, li huma ppreżentati, bħala prinċipju, minn din il-persuna taxxabbli, fuq inizjattiva tagħha stess, jippermettux li tiġi kkaratterizzata l-eżistenza ta’ “ċirkustanzi indipendenti mir-rieda” tal-persuna taxxabbli, fis-sens tal-ġurisprudenza ċċitata fil-punt 31 ta’ din is-sentenza. Hija tosserva li, f’dan il-każ, Vittamed indikat li d-deċiżjoni li titpoġġa fi stralċ kienet ittieħdet minħabba telf f’żieda kostanti, in-nuqqas ta’ ordnijiet u dħul potenzjali kif ukoll dubji tal-azzjonist uniku fir-rigward tal-profittabbiltà tal-attività ekonomika prevista. L-amministrazzjoni fiskali u l-istituzzjonijiet l-oħra aditi bit-tilwima fil-kawża prinċipali kkunsidraw li d-deċiżjoni tal-azzjonist uniku ta’ Vittamed li jpoġġi fi stralċ din, kienet ġiet adottata mingħajr ma pprovda l-iċken prova tal-fatt li l-attivitajiet ta’ Vittamed ma kinux profittabbli u li din id-deċiżjoni kif ukoll it-talba għat-tħassir mir-reġistru tal-persuni taxxabbli suġġetti għall-VAT ma kinux jikkostitwixxu “ċirkustanzi indipendenti mir-rieda” ta’ Vittamed, fis-sens tal-ġurisprudenza ċċitata fil-punt 31 ta’ din is-sentenza.

33      Madankollu, filwaqt li tirreferi għall-punt 35 tas-sentenza tat-12 ta’ Novembru 2020, ITH Comercial Timişoara (C-734/19, EU:C:2020:919), il-qorti tar-rinviju tfakkar li mill-ġurisprudenza tal-Qorti tal-Ġustizzja jirriżulta li ma huwiex il-kompitu tal-amministrazzjoni fiskali li tevalwa l-fondatezza tal-motivi li wasslu lil persuna taxxabbli tirrinunzja għall-attività ekonomika inizjalment prevista, sakemm is-sistema komuni tal-VAT tiggarantixxi n-newtralità fir-rigward tal-piż fiskali tal-attivitajiet ekonomiċi kollha, irrispettivament mill-għanijiet jew mir-riżultati tagħhom, bil-kundizzjoni li dawn l-attivitajiet ikunu fil-prinċipju huma stess suġġetti għal VAT.

34      Konsegwentement, il-qorti tar-rinviju tistaqsi kif għandha tiġi ddeterminata l-eżistenza ta’ “ċirkustanzi indipendenti mir-rieda ta’ persuna taxxabbli”, fis-sens tal-ġurisprudenza ċċitata fil-punt 31 ta’ din is-sentenza, fiċ-ċirkustanzi tat-tilwima fil-kawża prinċipali. B’mod partikolari, hija tixtieq tkun taf jekk sempliċi dikjarazzjoni tal-persuna taxxabbli hijiex suffiċjenti għall-finijiet ta’ tali klassifikazzjoni jew jekk huwiex ġeneralment neċessarju li jiġu evalwati dawn iċ-ċirkustanzi meta l-oġġetti jew is-servizzi ma jkunux intużaw u qatt ma jkunu ser jintużaw minħabba t-tpoġġija fi stralċ ta’ din il-persuna taxxabbli.

35      Fl-aħħar nett, il-qorti tar-rinviju tosserva li l-Qorti tal-Ġustizzja indikat, fil-punt 25 tas-sentenza tas-17 ta’ Ottubru 2018 Ryanair (C-249/17, EU:C:2018:834), li d-dritt għal tnaqqis, ladarba tnissel, jibqa’ kweżit anki jekk, sussegwentement, l-attività ekonomika prevista ma twettqitx u, għaldaqstant, ma tatx lok għal tranżazzjonijiet taxxabbli “jew” li l-persuna taxxabbli ma setgħetx tuża l-oġġetti jew is-servizzi li taw lok għal tnaqqis fil-kuntest ta’ tranżazzjonijiet taxxabbli minħabba ċirkustanzi indipendenti mir-rieda tagħha. Skont il-qorti tar-rinviju, l-użu tal-konġunzjoni ta’ koordinazzjoni “jew” f’dan il-punt 25 huwa intiż sabiex issir distinzjoni bejn żewġ sitwazzjonijiet distinti minn naħa, dik fejn l-attivitajiet ekonomiċi ma jkunux twettqu wara li jkun tnissel id-dritt għal tnaqqis u, min-naħa l-oħra, dik fejn l-oġġetti jew is-servizzi li fir-rigward tagħhom ikun ġie eżerċitat id-dritt għal tnaqqis ma jkunux intużaw fil-kuntest ta’ attivitajiet ekonomiċi. Issa, il-fatt li oġġetti jew servizzi ma ntużawx “minħabba ċirkustanzi indipendenti mir-rieda ta’ persuna taxxabbli” huwa msemmi biss fit-tieni każ, li ma jkoprix it-tpoġġija fi stralċ ta’ persuna taxxabbli, skont il-qorti tar-rinviju. Din tal-aħħar tirreferi, f’dan ir-rigward, għas-sentenza tad-29 ta’ Frar 1996, INZO (C-110/94, EU:C:1996:67).

36      F’dawn iċ-ċirkustanzi, il-Lietuvos vyriausiasis administracinis teismas (il-Qorti Amministrattiva Suprema tal-Litwanja) iddeċidiet li tissospendi l-proċeduri u li tagħmel lill-Qorti tal-Ġustizzja d-domanda preliminari li ġejja:

“L-Artikoli 184 sa 187 tad-Direttiva [tal-VAT] għandhom jiġu interpretati fis-sens li, persuna taxxabbli hija (jew ma hijiex) marbuta li taġġusta t-tnaqqis ta’ taxxa fuq il-valur miżjud (VAT) imposta fuq ix-xiri ta’ oġġetti u servizzi bil-għan tal-produzzjoni ta’ beni kapitali fil-każ fejn dawn il-beni ma jkunux iktar intiżi biex jintużaw matul attivitajiet ekonomiċi taxxabbli għaliex is-sid (azzjonist) tal-persuna taxxabbli jiddeċiedi li jpoġġiha fi stralċ u din il-persuna taxxabbli tippreżenta talba biex titneħħa mir-reġistru tal-persuni suġġetti għall-VAT?

Ir-risposta għal din id-domanda tiġi affettwata mir-raġunijiet wara d-deċiżjoni ta’ tpoġġija fi stralċ tal-persuna taxxabbli, jiġifieri l-fatt li d-deċiżjoni li l-persuna titpoġġa fi stralċ ittieħdet minħabba żieda fit-telf, l-assenza ta’ ordnijiet u d-dubji tal-azzjonist fir-rigward tal-profittabbiltà tal-attività ekonomika ppjanata (intiża)?”

 Fuq id-domanda preliminari

37      Permezz tad-domanda tagħha, minn naħa, il-qorti tar-rinviju tistaqsi, essenzjalment, jekk l-Artikoli 184 sa 187 tad-Direttiva tal-VAT għandhom jiġu interpretati fis-sens li persuna taxxabbli għandha l-obbligu li taġġusta t-tnaqqis tal-VAT tal-input imħallsa u relatata mal-akkwist ta’ oġġetti jew ta’ servizzi intiżi sabiex jipproduċu beni kapitali, fil-każ fejn, minħabba d-deċiżjoni tal-proprjetarju jew tal-azzjonist uniku ta’ din il-persuna taxxabbli li tpoġġi din tal-aħħar fi stralċ, kif ukoll it-talba u l-kisba tat-tneħħija tal-imsemmija persuna taxxabbli mir-reġistru tal-persuni taxxabbli suġġetti għall-VAT, il-beni kapitali maħluqa ma ġewx użati fil-kuntest ta’ attivitajiet ekonomiċi taxxati u ma humiex ser ikunu qatt. Min-naħa l-oħra, hija tistaqsi, essenzjalment, jekk ir-raġunijiet li jippermettu li tiġi ġġustifikata d-deċiżjoni ta’ tpoġġija fi stralċ tal-istess persuna taxxabbli u, għaldaqstant, l-abbandun tal-attività ekonomika taxxabbli prevista, bħal telf f’żieda kostanti, in-nuqqas ta’ ordnijiet u d-dubji tal-azzjonist tal-persuna taxxabbli fir-rigward tal-profittabbiltà tal-attività ekonomika prevista, għandhomx effett fir-rigward tal-obbligu ta’ din tal-aħħar li taġġusta t-tnaqqis tal-VAT ikkonċernat. Fl-aħħar nett, hija tistaqsi jekk is-sempliċi dikjarazzjoni mill-persuna taxxabbli kkonċernata dwar l-eżistenza ta’ dawn il-motivi hijiex suffiċjenti jew jekk, għall-kuntrarju, l-eżistenza tal-imsemmija motivi għandhiex tiġi stabbilita permezz ta’ provi.

38      Fl-ewwel lok, skont ġurisprudenza stabbilita tal-Qorti tal-Ġustizzja, id-dritt tal-persuni taxxabbli li jnaqqsu mill-VAT li huma għandhom iħallsu l-VAT tal-input dovuta jew imħallsa għall-oġġetti akkwistati u għas-servizzi rċevuti minnhom tal-input jikkostitwixxi prinċipju fundamentali tas-sistema komuni tal-VAT stabbilita mil-leġiżlazzjoni tal-Unjoni (sentenza tat-12 ta’ April 2018, Biosafe - Indústria de Reciclagens, C-8/17, EU:C:2018:249, punt 27 u l-ġurisprudenza ċċitata).

39      Is-sistema tat-tnaqqis hija intiża sabiex tillibera lill-persuna taxxabbli kompletament mill-piż tal-VAT dovuta jew imħallsa fil-kuntest tal-attivitajiet ekonomiċi tagħha kollha. Is-sistema komuni tal-VAT, konsegwentement, tiggarantixxi n-newtralità f’dak li jirrigwarda l-oneru fiskali tal-attivitajiet ekonomiċi kollha, irrispettivament mill-għanijiet jew mir-riżultati ta’ dawn l-attivitajiet, bil-kundizzjoni li l-imsemmija attivitajiet ikunu, bħala prinċipju, huma nnifishom suġġetti għall-VAT (sentenza tad-9 ta’ Lulju 2020, Finanzamt Bad Neuenahr-Ahrweiler, C-374/19, EU:C:2020:546, punt 18).

40      Kif il-Qorti tal-Ġustizzja enfasizzat repetutament, id-dritt għal tnaqqis previst fl-Artikoli 167 et seq. tad-Direttiva dwar il-VAT jagħmel parti integrali mill-mekkaniżmu tal-VAT u fil-prinċipju ma jistax jiġi limitat. B’mod partikolari, dan id-dritt jiġi eżerċitat immedjatament għat-taxxi kollha imposti fuq it-tranżazzjonijiet tal-input imwettqa (sentenza tal-12 ta’ April 2018, Biosafe - Indústria de Reciclagens, C-8/17, EU:C:2018:249, punti 29 u l-ġurisprudenza ċċitata).

41      Fis-sistema komuni tal-VAT, jistgħu jitnaqqsu biss it-taxxi tal-input fuq oġġetti jew servizzi użati mill-persuni taxxabbli għall-finijiet tat-tranżazzjonijiet taxxabbli tagħhom. It-tnaqqis tat-taxxi tal-input huwa marbut mal-ġbir tat-taxxi tal-output (sentenza tad-9 ta’ Lulju 2020, Finanzamt Bad Neuenahr-Ahrweiler, C-374/19, EU:C:2020:546, punt 21 u l-ġurisprudenza ċċitata).

42      Għandu jitfakkar li huwa x-xiri tal-oġġetti jew tas-servizzi minn persuna taxxabbli li taġixxi bħala tali li jiddetermina l-applikazzjoni tas-sistema tal-VAT u, għaldaqstant, tal-mekkaniżmu ta’ tnaqqis. L-użu li jsir mill-oġġetti jew mis-servizzi, jew li huwa maħsub għalihom, jiddetermina biss il-portata tat-tnaqqis inizjali li din il-persuna taxxabbli għandha dritt għalih skont l-Artikolu 168 tad-Direttiva tal-VAT u l-portata ta’ eventwali aġġustamenti matul il-perijodi sussegwenti, iżda ma jaffettwax it-tnissil tad-dritt għal tnaqqis (sentenza tat-12 ta’ Novembru 2020, ITH Comercial Timișoara, C-734/19, EU:C:2020:919, punt 33 u l-ġurisprudenza ċċitata).

43      Il-Qorti tal-Ġustizzja ddeċidiet repetutament ukoll li d-dritt għal tnaqqis, ladarba twieled, jibqa’ kweżit anki jekk, sussegwentement, l-attività ekonomika prevista ma twettqitx u, għaldaqstant, ma tatx lok għal tranżazzjonijiet taxxabbli (sentenzi tad-29 ta’ Frar 1996, INZO, C-110/94, EU:C:1996:67, punt 20, u tas-17 ta’ Ottubru 2018, Ryanair, C-249/17, EU:C:2018:834, punt 25), jew jekk, minħabba ċirkustanzi li ma humiex relatati mal-volontà tagħha, il-persuna taxxabbli ma setgħetx tuża l-oġġetti jew is-servizzi li taw lok għal tnaqqis fil-kuntest ta’ tranżazzjonijiet taxxabbli (sentenzi tal-15 ta’ Jannar 1998, Ghent Coal Terminal, C-37/95, EU:C:1998:1, punt 20; tas-17 ta’ Ottubru 2018, Ryanair, C-249/17, EU:C:2018:834, punt 25, kif ukoll tat-12 ta’ Novembru 2020, ITH Comercial Timişoara, C-734/19, EU:C:2020:919, punt 34 u l-ġurisprudenza ċċitata).

44      Interpretazzjoni oħra tkun kuntrarja għall-prinċipju tan-newtralità tal-VAT fir-rigward tal-piż fiskali tal-impriża. Din tkun tista’ toħloq, fit-trattament fiskali tal-istess attivitajiet ta’ investiment, differenzi mhux iġġustifikati bejn impriżi li diġà jwettqu tranżazzjonijiet taxxabbli u oħrajn li qegħdin ifittxu, permezz ta’ investimenti, li jibdew attivitajiet li jkunu sors ta’ tranżazzjonijiet taxxabbli. Bl-istess mod, ikunu stabbiliti wkoll differenzi arbitrarji bejn dawn l-impriżi tal-aħħar sa fejn l-aċċettazzjoni definittiva tat-tnaqqis tkun tiddependi mill-kwistjoni ta’ jekk tali investimenti jirriżultawx fi tranżazzjonijiet intaxxati jew le (sentenzi tad-29 ta’ Frar 1996, INZO, C-110/94, EU:C:1996:67, punt 22, kif ukoll tas-17 ta’ Ottubru 2018, Ryanair, C-249/17, EU:C:2018:834, punt 25).

45      Madankollu, fir-rigward tal-kwistjoni dwar kif il-prinċipju enfasizzat fis-sentenza tad-29 ta’ Frar 1996, INZO (C-110/94, EU:C:1996:67), li jgħid li d-dritt għal tnaqqis jinkiseb anki jekk tiġi mitmuma attività qabel ma tagħti lok għal tranżazzjonijiet taxxabbli, għandu jiġi kkombinat mar-regoli tad-Direttiva tal-VAT relatati mal-aġġustament tat-tnaqqis, għandu jitfakkar li l-Qorti tal-Ġustizzja, minn naħa, iddeċidiet li l-mekkaniżmu ta’ aġġustament previst fl-Artikoli 184 sa 187 tad-Direttiva tal-VAT jagħmel parti mis-sistema ta’ tnaqqis tal-VAT stabbilita minn din id-direttiva u għandha l-għan li tistabbilixxi relazzjoni stretta u diretta bejn id-dritt għal tnaqqis tal-VAT tal-input imħallsa u l-użu tal-oġġetti u tas-servizzi kkonċernati għal tranżazzjonijiet intaxxati fl-output. Min-naħa l-oħra, il-Qorti tal-Ġustizzja fakkret li, meta oġġetti jew servizzi akkwistati minn persuna taxxabbli jintużaw għall-bżonnijiet ta’ tranżazzjonijiet eżentati jew li ma jaqgħux fil-kamp ta’ applikazzjoni tal-VAT, ma jkun hemm la l-ġbir tat-taxxa tal-output u lanqas tnaqqis tat-taxxa tal-input (digriet tat-18 ta’ Mejju 2021, Skellefteå Industrihus, C-248/20, EU:C:2021:394, punt 42 u l-ġurisprudenza ċċitata).

46      Barra minn hekk, il-Qorti tal-Ġustizzja fakkret li l-Artikolu 184 tad-Direttiva tal-VAT jiddefinixxi t-tnissil tal-obbligu ta’ aġġustament tal-VAT bl-iktar mod wiesa’ possibbli u li l-formulazzjoni tiegħu ma teskludi a priori ebda ipoteżi prevedibbli ta’ tnaqqis indebitu, peress li l-portata ġenerali tal-obbligu ta’ aġġustament hija kkonfermata mil-lista espressa tal-eċċezzjonijiet previsti fl-Artikolu 185(2) ta’ din id-direttiva (ara, f’dan is-sens, id-digriet tat-18 ta’ Mejju 2021, Skellefteå Industrihus, C-248/20, EU:C:2021:394, punt 43 u l-ġurisprudenza ċċitata).

47      Barra minn hekk, il-Qorti tal-Ġustizzja indikat li, meta, minħabba ċirkustanzi indipendenti mir-rieda tagħha, il-persuna taxxabbli ma tużax servizz jew oġġett bħal immobbli, li jkun ta lok għal tnaqqis fil-kuntest ta’ tranżazzjonijiet taxxabbli, ma huwiex biżżejjed, sabiex tiġi stabbilita l-eżistenza ta’ “tibdil”, fis-sens tal-Artikolu 185 tad-Direttiva tal-VAT, li tali immobbli baqa’ vojt, wara x-xoljiment ta’ kuntratt ta’ kiri li huwa s-suġġett tiegħu, anki jekk dan iseħħ, anki jekk jiġi pprovat li din il-persuna taxxabbli għandha dejjem l-intenzjoni li tuża din l-attività ntaxxata u tieħu l-passi neċessarji għal dan l-effett, għaliex din terġa’ tirrestrinġi d-dritt għal tnaqqis permezz ta’ dispożizzjonijiet applikabbli fil-qasam ta’ aġġustamenti (sentenza tat-28 ta’ Frar 2018, Imofloresmira - Investimentos Imobiliários, C-672/16, EU:C:2018:134, punt 47; digriet tat-18 ta’ Mejju 2021, Skellefteå Industrihus, C-248/20, EU:C:2021:394, punt 44).

48      Għalhekk, jekk il-persuna taxxabbli ma jkollhiex iktar l-intenzjoni li tuża l-oġġetti jew is-servizzi kkonċernati sabiex twettaq tranżazzjonijiet taxxabbli tal-output jew tużahom sabiex twettaq tranżazzjonijiet eżentati, ħaġa li hija l-qorti tar-rinviju li għandha tivverifika, ir-relazzjoni stretta u diretta li għandha teżisti bejn id-dritt għal tnaqqis tal-VAT tal-input imħallsa u t-twettiq ta’ tranżazzjonijiet taxxabbli previsti hija miksura, u għandha tagħti lok għall-applikazzjoni tal-mekkaniżmu ta’ aġġustament previst fl-Artikoli 184 sa 187 tad-Direttiva tal-VAT (ara, f’dan is-sens, id-digriet tat-18 ta’ Mejju 2021, Skellefteå Industrihus, C-248/20, EU:C:2021:394, punti 45 u 46 u l-ġurisprudenza ċċitata).

49      F’dan il-każ, mit-talba għal deċiżjoni preliminari jirriżulta li, minħabba li tpoġġiet fi stralċ, minn naħa, u t-tħassir tagħha mir-reġistru tal-persuni taxxabbli mill-VAT, min-naħa l-oħra, il-persuna taxxabbli kkonċernata ma għandhiex iktar l-intenzjoni li tuża l-beni kapitali maħluqa għall-finijiet ta’ tranżazzjonijiet taxxabbli, u dan b’mod definittiv. Peress li din is-sitwazzjoni hija kkonfermata, fatt li madankollu għandu jiġi vverifikat mill-qorti tar-rinviju, għandu jiġi kkonstatat li r-“relazzjoni mill-qrib u diretta”, fis-sens tal-ġurisprudenza mfakkra fil-punt 45 ta’ din is-sentenza, li għandha teżisti bejn id-dritt għal tnaqqis tal-VAT tal-input imħallsa u t-twettiq ta’ tranżazzjonijiet intaxxati tal-output, hija tterminata, u li l-mekkaniżmu ta’ aġġustament previst fl-Artikoli 184 sa 187 tad-Direttiva tal-VAT għandu japplika.

50      Madankollu, għandu jiġi enfasizzat li jista’ jkun mod ieħor fil-każ fejn it-tpoġġija fi stralċ tal-persuna taxxabbli kkonċernata madankollu wassal għat-twettiq ta’ tranżazzjonijiet taxxabbli, pereżempju l-bejgħ ta’ assi għall-finijiet tat-tneħħija tad-dejn tagħha, anki jekk dan ma jaqax taħt l-attività ekonomika inizjalment prevista minn din il-persuna taxxabbli.

51      F’dan ir-rigward, il-Qorti tal-Ġustizzja ddeċidiet li l-attività li għandha tiġi kkunsidrata fiha nnifisha, indipendentement mill-għanijiet jew mir-riżultati tagħha, is-sempliċi fatt li l-ftuħ ta’ proċedura ta’ falliment fir-rigward ta’ persuna taxxabbli jbiddel, skont il-modalitajiet previsti f’dan ir-rigward fid-dritt intern, l-għanijiet tat-tranżazzjonijiet ta’ din il-persuna taxxabbli, fis-sens li dawn l-għanijiet ma jinkludux iktar l-isfruttament sostenibbli tal-impriża tagħha, iżda jirrigwardaw biss l-istralċ tagħha għall-finijiet tal-likwidazzjoni tad-dejn segwit mix-xoljiment tagħha, ma jistax, fih innifsu, jaffettwa n-natura ekonomika tat-tranżazzjonijiet imwettqa fil-kuntest ta’ din l-impriża (sentenza tat-3 ta’ Ġunju 2021, Administraţia Judeţeană a Finanţelor Publice Suceava et C-182/20, EU:C:2021:442, punt 38).

52      Għaldaqstant, il-Qorti tal-Ġustizzja taqta’ u tiddeċiedi li l-Artikoli 184 sa 186 tad-Direttiva dwar il-VAT jipprekludu leġiżlazzjoni jew prassi nazzjonali li biha l-ftuħ ta’ proċedura ta’ falliment fir-rigward ta’ operatur ekonomiku, li jimplika l-istralċ tal-assi tiegħu favur il-kredituri tiegħu, iwassal awtomatikament għall-obbligu ta’ dan l-operatur li jaġġusta t-tnaqqis tal-VAT li huwa jkun wettaq għal oġġetti u servizzi akkwistati qabel ma jkun tqiegħed taħt falliment, meta l-ftuħ ta’ din il-proċedura ma tkunx ta’ natura li tostakola l-attività ekonomika tal-imsemmi operatur, fis-sens tal-Artikolu 9 ta’ din id-direttiva, tiġi segwita b’mod partikolari għall-finijiet tal-istralċ tal-impriża kkonċernata (sentenza tat-3 ta’ Ġunju 2021, Administraţia Judeţeană a Finanţelor Publice Suceava et C-182/20, EU:C:2021:442, punt 45).

53      F’dan il-każ, mit-talba għal deċiżjoni preliminari jirriżulta li l-oġġetti jew is-servizzi tal-persuna taxxabbli baqgħu “mhux mibjugħa”, fatt li madankollu għandu jiġi vverifikat mill-qorti tar-rinviju.

54      Fid-dawl tal-kunsiderazzjonijiet preċedenti, ir-risposta għall-ewwel parti tad-domanda magħmula għandha tkun li l-Artikoli 184 sa 187 tad-Direttiva tal-VAT għandhom jiġu interpretati fis-sens li persuna taxxabbli għandha l-obbligu li taġġusta t-tnaqqis tal-VAT tal-input imħallsa relatata mal-akkwist ta’ oġġetti jew ta’ servizzi intiżi sabiex jipproduċu beni kapitali, fil-każ fejn, minħabba d-deċiżjoni tal-proprjetarju jew tal-azzjonist uniku ta’ din il-persuna taxxabbli li tpoġġi din tal-aħħar fi stralċ, kif ukoll tat-talba u l-ksib ta’ tħassir tal-imsemmija persuna taxxabbli mir-reġistru tal-persuna taxxabbli suġġetti għal VAT, il-beni kapitali maħluqa ma ġewx użati fil-kuntest ta’ attivitajiet ekonomiċi ntaxxati u li mhux ser ikunu qatt, li huwa l-obbligu tal-qorti tar-rinviju li tivverifika.

55      Fit-tieni lok, skont il-ġurisprudenza tal-Qorti tal-Ġustizzja, l-Artikoli 167, 168, 184 u 185 tad-Direttiva tal-VAT għandhom jiġu interpretati fis-sens li d-dritt għal tnaqqis tal-VAT tal-input fuq oġġetti jew servizzi akkwistati sabiex jitwettqu tranżazzjonijiet taxxabbli jinżamm meta l-proġetti kapitali inizjalment previsti jkunu ġew abbandunati minħabba ċirkustanzi indipendenti mir-rieda tal-persuna taxxabbli u meta ma jkunx hemm lok li ssir aġġustament ta’ din il-VAT jekk il-persuna taxxabbli jkollha dejjem l-intenzjoni li tuża dawn l-oġġetti għall-finijiet ta’ attività ntaxxata (sentenza tat-12 ta’ Novembru 2020, ITH Comercial Timişoara (C-734/19, EU:C:2020:919, punt 46).

56      L-applikazzjoni ta’ din il-ġurisprudenza tippreżumi li l-persuna taxxabbli dejjem ikollha l-intenzjoni li tuża l-imsemmija oġġetti jew servizzi għall-finijiet ta’ tranżazzjonijiet taxxabbli, kundizzjoni li ma tidhirx issodisfatta f’każ bħal dak tat-tilwima fil-kawża prinċipali, fejn, kif jirriżulta mit-talba għal deċiżjoni preliminari, il-persuna taxxabbli tpoġġiet fi stralċ u tħassret mir-reġistru tal-persuni taxxabbli suġġetti għall-VAT.

57      Għalhekk, il-fatt li t-tpoġġija fi stralċ tal-persuna taxxabbli u, għaldaqstant, l-abbandun tal-attività ekonomika taxxabbli prevista jistgħu eventwalment jiġu ġġustifikati minn motivi li jistgħu jiġu kklassifikati bħala ċirkustanzi li ma jaqgħux taħt ir-rieda tagħha ma jaffettwax l-obbligu ta’ din tal-aħħar li taġġusta t-tnaqqis tal-VAT.

58      Barra minn hekk, ma huwiex il-kompitu tal-amministrazzjoni fiskali li tevalwa l-fondatezza tal-motivi li wasslu lill-persuna taxxabbli tirrinunzja għall-attività ekonomika inizjalment prevista, peress li s-sistema komuni tal-VAT tiggarantixxi n-newtralità fir-rigward tal-piż fiskali tal-attivitajiet ekonomiċi kollha, irrispettivament mill-għanijiet jew mir-riżultati tagħhom, bil-kundizzjoni li dawn l-attivitajiet ikunu, bħala prinċipju, huma stess suġġetti għall-VAT (sentenza tat-12 ta’ Novembru 2020, ITH Comercial Timişoara, C-734/19, EU:C:2020:919, punt 35 u l-ġurisprudenza ċċitata).

59      Fid-dawl ta’ din il-ġurisprudenza, ma huwiex neċessarju li tiġi eżaminata t-tieni parti tad-domanda għall-kumplament, jew il-kwistjoni dwar jekk is-sempliċi dikjarazzjoni tar-raġunijiet li ġġustifikaw id-deċiżjoni li l-persuna taxxabbli titpoġġa fi stralċ, hijiex suffiċjenti.

60      Fid-dawl tal-kunsiderazzjonijiet preċedenti, ir-risposta għat-tieni parti tad-domanda magħmula għandha tkun li r-raġunijiet li jippermettu li tiġi ġġustifikata d-deċiżjoni ta’ tpoġġija fi stralċ tal-istess persuna taxxabbli, u, għaldaqstant, l-abbandun tal-attività ekonomika taxxabbli prevista, bħal telf f’żieda kostanti, in-nuqqas ta’ ordnijiet u d-dubji tal-azzjonist tal-persuna taxxabbli fir-rigward tal-profittabbiltà tal-attività ekonomika prevista, huma irrilevanti fir-rigward tal-obbligu ta’ din tal-aħħar li taġġusta t-tnaqqis tal-VAT ikkonċernat, peress li din il-persuna taxxabbli ma għandhiex iktar l-effett li tuża l-imsemmija beni kapitali għall-finijiet tat-tranżazzjonijiet intaxxati.

61      Fid-dawl tal-kunsiderazzjonijiet kollha preċedenti, ir-risposta għad-domanda magħmula għandha tkun li l-Artikoli 184 sa 187 tad-Direttiva tal-VAT tal-input imħallsa u relatata mal-akkwist ta’ oġġetti jew ta’ servizzi intiżi sabiex jipproduċu beni kapitali, fil-każ fejn, minħabba d-deċiżjoni tal-proprjetarju jew tal-azzjonist uniku ta’ din il-persuna taxxabbli li tpoġġi din tal-aħħar fi stralċ, kif ukoll tat-talba u l-ksib tat-tħassir tal-imsemmi persuna taxxabbli mir-reġistru tal-persuni taxxabbli suġġetti għall-VAT, il-beni kapitali maħluqa ma ġewx użati fil-kuntest ta’ attivitajiet ekonomiċi ntaxxati u mhux ser ikunu qatt. Ir-raġunijiet li jippermettu li tiġi ġġustifikata d-deċiżjoni ta’ tpoġġija fi stralċ tal-istess persuna taxxabbli, u, għaldaqstant, l-abbandun tal-attività ekonomika taxxabbli prevista, bħal telf f’żieda kostanti, in-nuqqas ta’ ordnijiet u d-dubji tal-azzjonist tal-persuna taxxabbli fir-rigward tal-profittabbiltà tal-attività ekonomika prevista, huma irrilevanti fir-rigward tal-obbligu ta’ din tal-aħħar li taġġusta t-tnaqqis tal-VAT ikkonċernat, peress li din il-persuna taxxabbli ma għandhiex iktar l-intenzjoni, u dan b’mod definittiv, li tuża’ l-imsemmija beni kapitali għall-finijiet tat-tranżazzjonijiet intaxxati.

 Dwar l-ispejjeż

62      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (L-Għaxar Awla) taqta’ u tiddeċiedi:

L-Artikoli 184 sa 187 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud,

għandhom jiġu interpretati fis-sens li:

persuna taxxabbli għandha l-obbligu li taġġusta t-tnaqqis tat-taxxa fuq il-valur miżjud (VAT) tal-input imħallsa relatata mal-akkwist ta’ oġġetti jew ta’ servizzi intiżi sabiex jipproduċu beni kapitali, fil-każ fejn, minħabba d-deċiżjoni tal-proprjetarju jew tal-azzjonist uniku ta’ din il-persuna taxxabbli li tpoġġi din tal-aħħar fi stralċ, kif ukoll tat-talba u l-ksib tat-tħassir tal-imsemmi persuna taxxabbli mir-reġistru tal-persuni taxxabbli suġġetti għall-VAT, il-beni kapitali maħluqa ma ġewx użati fil-kuntest ta’ attivitajiet ekonomiċi ntaxxati u mhux ser ikunu qatt.

Ir-raġunijiet li jippermettu li tiġi ġġustifikata d-deċiżjoni ta’ tpoġġija fi stralċ tal-istess persuna taxxabbli, u, għaldaqstant, l-abbandun tal-attività ekonomika taxxabbli prevista, bħal telf f’żieda kostanti, in-nuqqas ta’ ordnijiet u d-dubji tal-azzjonist tal-persuna taxxabbli fir-rigward tal-profittabbiltà tal-attività ekonomika prevista, huma irrilevanti fir-rigward tal-obbligu ta’ din tal-aħħar li taġġusta t-tnaqqis tal-VAT ikkonċernat, peress li din il-persuna taxxabbli ma għandhiex iktar l-intenzjoni, u dan b’mod definittiv, li tuża’ l-imsemmija beni kapitali għall-finijiet tat-tranżazzjonijiet intaxxati.

Firem

*      Lingwa tal-kawża: il-Litwan.