BG
ES
CS
DA
DE
ET
EL
EN
FR
HR
IT
LV
LT
HU
MT
NL
PL
PT
RO
SK
SL
FI
SVInfo
- Referral date: 14-06-2021
- Show case reference
- Ruling date: 08-09-2022
References in this case
Highlight in text
GoEdizzjoni Provviżorja
SENTENZA TAL-QORTI TAL-ĠUSTIZZJA (Id-Disa’ Awla)
8 ta’ Settembru 2022 (*)
“ Rinviju għal deċiżjoni preliminari – Unjoni doganali – Kodiċi Doganali tal-Unjoni – Regolament (UE) Nru 952/2013 – Post ta’ tnissil tad-dejn doganali – Taxxa fuq il-valur miżjud (VAT) – Dirttiva 2006/112/KE – Artikolu 30 – Artikolu 60 – Artikolu 71(1) – Fatt taxxabbli u eżiġibbiltà tal-VAT fuq l-importazzjoni – Post ta’ tnissil tad-dejn fiskali – Konstatazzjoni tan-nuqqas ta’ osservanza ta’ obbligu impost mil-leġiżlazzjoni doganali tal-Unjoni – Determinazzjoni tal-post ta’ importazzjoni tal-oġġetti – Mezz ta’ trasport irreġistrat f’pajjiż terz u introdott fl-Unjoni Ewropea bi ksur tal-leġiżlazzjoni doganali”
Fil-Kawża C-368/21,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Finanzgericht Hamburg (il-Qorti tal-Finanzi ta’ Hamburg, il-Ġermanja), permezz ta’ deċiżjoni tat-2 ta’ Ġunju 2021, li waslet fil-Qorti tal-Ġustizzja fl-14 ta’ Ġunju 2021, fil-proċedura
R.T.
vs
Hauptzollamt Hamburg,
IL-QORTI TAL-ĠUSTIZZJA (Id-Disa’ Awla),
komposta minn S. Rodin, President tal-Awla, J.-C. Bonichot u O. Spineanu-Matei (Relatur), Imħallfin,
Avukat Ġenerali: G. Pitruzzella,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– għal R.T., minn Y. Özkan u U. Schrömbges, Rechtsanwälte,
– għall-Kummissjoni Ewropea, minn F. Clotuche-Duvieusart u J. Jokubauskaitė, kif ukoll minn R. Pethke, bħala aġenti,
wara li rat id-deċiżjoni meħuda, wara li nstema’ l-Avukat Ġenerali, li taqta’ l-kawża mingħajr konklużjonijiet,
tagħti l-preżenti
Sentenza
1 It-talba għal deċiżjoni preliminari tirrigwarda l-interpretazzjoni tal-Artikoli 30 u 60 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60), kif emendata permezz tad-Direttiva tal-Kunsill (UE) 2018/2057 tal-20 ta’ Diċembru 2018 (ĠU 2018, L 329, p. 3) (iktar ’il quddiem id-“Direttiva 2006/112”).
2 Din it-talba tressqet fil-kuntest ta’ kawża bejn R.T. u l-Hauptzollamt Hamburg (l-Uffiċċju Prinċipali Doganali ta’ Hamburg, il-Ġermanja, iktar ’il quddiem l-“Uffiċċju Doganali”) dwar l-impożizzjoni tat-taxxa fuq il-valur miżjud (VAT) fuq l-importazzjoni fuq vettura introdotta fit-territorju tal-Unjoni Ewropea bi ksur tal-leġiżlazzjoni doganali.
Il-kuntest ġuridiku
Id-dritt tal-Unjoni
Id-Direttiva 2006/112
3 Skont l-Artikolu 2(1)(d) tad-Direttiva 2006/112 huma suġġetti għall-VAT, b’mod partikolari, it-tranżazzjonijiet li ġejjin:
“[…]
(d) l-importazzjoni ta’ merkanzija.
[…]”
4 L-ewwel paragrafu tal-Artikolu 30 ta’ din id-direttiva jipprevedi:
“Importazzjoni ta' merkanzija” għandha tfisser id-dħul fil-Komunità ta' merkanzija li ma tinsabx f'ċirkolazzjoni ħielsa fit-tifsira ta' l-Artikolu 24 tat-Trattat.”
5 L-Artikolu 60 tal-istess direttiva, li jaqa’ taħt il-Kapitolu 4 tagħha, intitolat “Post ta’ l-importazzjoni ta’ merkanzija”, li jinsab taħt it-Titolu V, intitolat “Post ta’ operazzjonijiet taxxabbli”, jipprevedi:
“Il-post ta’ importazzjoni ta’ merkanzija għandu jkun l-Istat Membru li fit-territorju tiegħu tinsab il-merkanzija meta tidħol fil-Komunità.”
6 Taħt il-Kapitolu 4, intitolat “Post ta' importazzjoni ta' merkanzija”, tat-Titolu VI, intitolat “Avveniment li jagħti lok għal ħlas u imposizzjoni ta’ VAT”, l-Artikolu 71 tad-Direttiva 2006/112 huwa fformulat kif ġej:
“1. Meta, mad-dħul fil-Komunità, il-merkanzija titqiegħed taħt wieħed mill-arranġamenti jew sitwazzjonijiet msemmija fl-Artikoli 156, 276 u 277, jew taħt arranġamenti ta’ importazzjoni temporanji b’eżenzjoni totali tad-dazju fuq l-importazzjoni, jew taħt arranġamenti ta’ tra[n]żitu esterni, l-avveniment li jagħti lok għal ħlas iseħħ u l-VAT għandha tiġi imposta biss meta l-merkanzija ma tibqax taħt dawk l-arranġamenti jew sitwazzjonijiet.
Madankollu, meta l-merkanzija impurtata tkun soġġetta għal dazju doganali, […] l-avveniment li jagħti lok għal ħlas iseħħ u l-VAT għandha tiġi imposta meta jseħħ l-avveniment li jagħti lok għal ħlas fuqu u dawk id-dazji jkunu dovuti.
2. Meta merkanzija impurtata ma tkunx soġġetta għall-ebda mid-dazji msemmija fit-tieni subparagrafu tal-paragrafu 1, l-Istati Membri għandhom, rigward l-avveniment li jagħti lok għal ħlas u l-mument meta l-VAT issir dovuta, japplikaw id-dispożizzjonijiet li jkun hemm fis-seħħ li jirregolaw id-dazji doganali.”
Il-Kodiċi Doganali tal-Unjoni
7 Skont l-Artikolu 79(1) tar-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (ĠU 2013, L 269, p. 1, rettifiki fil-ĠU 2013, L 287, p. 90 u fil-ĠU 2016, L 267, p. 2 iktar ’il quddiem il-“Kodiċi Doganali”):
“1. Għal merkanzija soġġetta għal dazju tal-importazzjoni, jinħoloq dejn doganali fuq l-importazzjoni f'każ ta’ nuqqas ta’ konformità ma’ xi wieħed minn dawn li ġejjin:
(a) wieħed mill-obbligi stabbiliti fil-leġislazzjoni doganali dwar id-dħul ta’ merkanzija mhux tal-Unjoni fit-territorju doganali tal-Unjoni, it-tneħħija tagħha mis-superviżjoni doganali, jew il-moviment, l-ipproċessar, il-ħażna, il-ħażna temporanja, id-dħul temporanju ta' tali merkanzija fit-territorju jew it-tneħħija tagħha minnu;
[…]”
8 L-Artikolu 87, intitolat “Il-post fejn jinħoloq id-dejn doganali”, ta’ dan ir-regolament jipprovdi:
“1. Id-dejn doganali jinħoloq fil-post fejn tkun ippreżentata d-dikjarazzjoni doganali jew id-dikjarazzjoni ta' esportazzjoni mill-ġdid msemmija fl-Artikoli 77, 78 u 81.
Fil-każijiet l-oħrajn kollha, il-post fejn jinħoloq id-dejn doganali għandu jkun il-post fejn il-proċeduri ma kienux segwiti kif suppost.
Jekk mhux possibbli li jkun ddeterminat dak il-post, id-dejn doganali jinħoloq fil-post fejn l-awtoritajiet doganali jikkonkludu li l-merkanzija hi f’sitwazzjoni li fiha jinħoloq dejn doganali.
[…]
4. Jekk awtorità doganali tistabbilixxi li dejn doganali nħoloq taħt l-Artikolu 79 jew l-Artikolu 82 fi Stat Membru ieħor u l-ammont ta’ dazju tal-importazzjoni jew esportazzjoni li jikkorrispondi għal dak id-dejn huwa anqas minn EUR 10000, id-dejn doganali għandu jitqies li nħoloq fl-Istat Membru fejn tkun intlaħqet tali konklużjoni.”
Id-dritt Ġermaniż
9 L-Artikolu 21(2) tal-Umsatzsteuergesetz (il-Liġi dwar it-Taxxa fuq id-Dħul mill-Bejgħ), tal-21 ta’ Frar 2005 (BGBl. 2005 I, p. 386) jippreskrivi :
“Ir-regoli applikabbli għat-taxxa fuq id-dħul mill-bejgħ huma applikabbli, mutatis mutandis, għat-taxxa fuq id-dħul mill-bejgħ mill-importazzjoni; […]”
Il-kawża prinċipali u d-domandi preliminari
10 Fix-xahar ta’ Jannar 2019, R.T., residenti fil-Ġermanja, akkwista, fil-Ġeorġja, vettura u rreġistraha hemmhekk. Fix-xahar ta’ Marzu 2019, R.T. kien abbord din il-vettura mill-Ġeorġja lejn il-Ġermanja, billi għadda mit-Turkija, mill-Bulgarija, mis-Serbja, mill-Ungerija u mill-Awstrija, mingħajr ma ddikjara l-imsemmija vettura fl-uffiċċju doganali ta’ importazzjoni.
11 Fil-Ġermanja, R.T. uża l-vettura, li ġiet innotata fit-28 ta’ Marzu 2019, fil-kuntest ta’ kontroll minn unità ta’ kontroll tal-uffiċċju doganali. Ġie nnotat ukoll, fl-okkażjoni ta’ ksur tal-Kodiċi għat-Traffiku fit-Triq, fix-xahar ta’ Ottubru 2020.
12 Fit-13 ta’ Mejju 2019, l-uffiċċju doganali impona fuq R.T., permezz ta’ avviż ta’ ffissar tad-dazji fuq l-importazzjoni, ammont ta’ EUR 4 048.13 bħala dazji doganali u ammont ta’ EUR 8 460.59 bħala VAT fuq l-importazzjoni.
13 Peress li l-ilment tiegħu quddiem l-uffiċċju doganali ġie miċħud, R.T. ippreżenta, fid-9 ta’ Frar 2020, rikors għal annullament kontra dan l-avviż quddiem il-Finanzgericht Hamburg (il-Qorti tal-Finanzi ta’ Hamburg, il-Ġermanja). Matul il-proċedura, huwa ddeċieda li jikkontesta biss id-deċiżjoni li tiffissa l-ammont tal-VAT fuq l-importazzjoni.
14 Peress li ma hemmx dubji dwar il-kompetenza tal-awtoritajiet Ġermaniżi sabiex jirkupraw id-dejn doganali, il-qorti tar-rinviju tistaqsi jekk l-Uffiċċju Doganali għandux ukoll il-kompetenza li jiffissa l-ammont tal-VAT fuq l-importazzjoni. Skont din il-qorti, dan huwa l-każ jekk mill-interpretazzjoni tal-Artikoli 30 u 60 tad-Direttiva 2006/112 jirriżulta li l-post tal-importazzjoni jinsab fil-Ġermanja minkejja l-fatt li r-rikorrent fil-kawża prinċipali daħal fit-territorju tal-Unjoni fil-Bulgarija.
15 Fir-rigward tal-interpretazzjoni tal-Artikoli 30 u 60 tad-Direttiva 2006/112, li tirrigwarda l-kunċett u l-post tal-“importazzjoni”, il-qorti tar-rinviju hija tal-fehma li n-nuqqas ta’ osservanza tal-obbligi imposti mil-leġiżlazzjoni doganali mwettqa fi Stat Membru għandha l-effett li tnissel il-VAT fuq l-importazzjoni f’dan l-Istat Membru biss jekk il-merkanzija kkonċernata tkun ġiet importata wkoll f’dan l-Istat Membru, fis-sens tad-dritt dwar il-VAT.
16 Din il-qorti tqis li, konformement mal-ġurisprudenza tal-Qorti tal-Ġustizzja kif applikata mill-qrati tal-finanzi Ġermaniżi, il-post tal-importazzjoni, kif iddefinit fl-Artikolu 60 tad-Direttiva 2006/112, għandu, f’dan il-każ, jinsab fil-Bulgarija, peress li l-vettura hemmhekk intużat għall-ewwel darba. Għalhekk, bħala prinċipju, il-VAT fuq l-importazzjoni tnissel f’dan l-Istat Membru, ħlief jekk kellu jiġi aċċettat li din il-vettura kienet “intiża għall-konsum” fil-Ġermanja, b’applikazzjoni tal-insejament tas-sentenzi tat-2 ta’ Ġunju 2016, Eurogate Distribution u DHL Hub Leipzig, C-226/14 u C-228/14, EU:C:2016:405, punt 65; tal-1 ta’ Ġunju 2017, Wallenborn Transports, C-571/15, EU:C:2017:417, punt 54, kif ukoll tal-10 ta’ Lulju 2019, Federal Express Corporation Deutsche Niederlassung, C-26/18, EU:C:2019:579, punt 44.
17 Madankollu, skont il-qorti tar-rinviju, il-ġurisprudenza msemmija fil-punt preċedenti — li tistabbilixxi l-idea tad-destinazzjoni għall-konsum — ingħatat fir-rigward ta’ merkanzija li kienet ġiet ittrasportata, filwaqt li, fil-kawża prinċipali, din hija vettura użata bħala mezz ta’ trasport. F’dan ir-rigward, diversi qrati Ġermaniżi speċjalizzati fehmu l-ġurisprudenza msemmija iktar ’il fuq fis-sens li l-mezzi ta’ trasport jidħlu fiċ-ċirkwit ekonomiku tal-Unjoni fl-Istat Membru li fit-territorju tiegħu huma effettivament jintużaw għall-ewwel darba.
18 Skont dan l-approċċ, il-vettura tar-rikorrent fil-kawża prinċipali għandha għalhekk, skont il-qorti tar-rinviju, titqies li daħlet fiċ-ċirkwit ekonomiku tal-Unjoni fil-Bulgarija peress li huwa f’dan l-Istat Membru li din intużat għall-ewwel darba. Konsegwentement, huwa fil-Bulgarija li l-post tal-importazzjoni ta’ din il-vettura jinsab, fis-sens tal-Artikolu 60 tad-Direttiva 2006/112.
19 Madankollu, tali konklużjoni tidher li hija kuntrarja għal dik li tirriżulta mis-sentenza tat-3 ta’ Marzu 2021, Hauptzollamt Münster (Post ta’ tnissil tal-VAT) (C-7/20, EU:C:2021:161), li fiha l-Qorti tal-Ġustizzja ddeċidiet li, minkejja l-fatt li l-vettura kienet daħlet materjalment fit-territorju doganali tal-Unjoni mill-Bulgarija, din kienet effettivament intużat fil-Ġermanja, Stat Membru ta’ residenza tar-rikorrent fil-kawża prinċipali.
20 Fl-ipoteżi fejn il-post tal-importazzjoni tal-vettura inkwistjoni jkun jinsab fi Stat Membru ieħor li ma huwiex ir-Repubblika Federali tal-Ġermanja, il-qorti tar-rinviju tagħmel it-tieni domanda preliminari sabiex tkun taf jekk il-finzjoni tal-Artikolu 87(4) tal-Kodiċi Doganali tagħtix kompetenza lill-awtoritajiet doganali Ġermaniżi sabiex jistabbilixxu l-ammont tal-VAT fuq l-importazzjoni.
21 F’dan ir-rigward, din il-qorti tistaqsi dwar il-kwistjoni jekk l-applikazzjoni mutatis mutandis ta’ din id-dispożizzjoni, imposta fl-Artikolu 21(2) tal-Liġi dwar it-Taxxa fuq id-Dħul mill-Bejgħ, tiksirx id-Direttiva 2006/112.
22 F’dawn iċ-ċirkustanzi l-Finanzgericht Hamburg (il-Qorti tal-Finanzi ta’ Hamburg), iddeċidiet li tissospendi l-proċedimenti u li tagħmel is-segwenti domandi preliminari lill-Qorti tal-Ġustizzja:
“1) L-Artikoli 30 u 60 tad-Direttiva [2006/112] għandhom jiġu interpretati fis-sens li, għall-finijiet [tal-VAT], il-post tal-importazzjoni ta’ mezz tat-trasport irreġistrat fi Stat terz, li jkun iddaħħal fl-Unjoni Ewropea bi ksur tad-dispożizzjonijiet tad-dritt doganali, jinsab fl-Istat Membru li fih twettaq il-ksur tad-dritt doganali u li fih il-mezz tat-trasport intuża għall-ewwel darba fl-Unjoni bħala mezz tat-trasport, jew dan il-post jinsab fl-Istat Membru li fih jirrisjedi u juża l-vettura l-awtur tan-nuqqas ta’ osservanza tal-obbligi li joħorġu mid-dritt doganali?
2) Fil-każ li l-post tal-importazzjoni jkun Stat Membru differenti mir-Repubblika Federali tal-Ġermanja: ikun hemm ksur tad-Direttiva 2006/112, b’mod partikolari tal-Artikoli 30 u 60 tagħha, meta dispożizzjoni tad-dritt nazzjonali ta’ Stat Membru tiddikjara li l-Artikolu 87(4) [tal-Kodiċi Doganali] tal-Unjoni japplika [għall-VAT] imposta fuq l-importazzjoni?”
Fuq id-domandi preliminari
Fuq l-ewwel domanda
23 Permezz tal-ewwel domanda tagħha, il-qorti tar-rinviju tistaqsi, essenzjalment, jekk l-Artikoli 30 u 60 tad-Direttiva 2006/112 għandhomx jiġu interpretati fis-sens li, għall-finijiet tal-VAT, il-post tal-importazzjoni ta’ vettura rreġistrata fi Stat terz u introdotta fl-Unjoni bi ksur tal-leġiżlazzjoni doganali, jinsab fl-Istat Membru li fih twettaq dan il-ksur u fejn din il-vettura ntużat għall-ewwel darba fl-Unjoni, jew fl-Istat Membru li fih jirrisjedi u juża l-vettura l-awtur tan-nuqqas ta’ osservanza tal-obbligi li joħorġu mid-dritt doganali.
24 Skont l-Artikolu 2(1)(d) tad-Direttiva dwar il-VAT, l-importazzjonijiet ta’ merkanzija hija suġġetta għall-VAT. Skont l-ewwel paragrafu tal-Artikolu 30 ta’ din id-direttiva, titqies bħala importazzjoni ta’ merkanzija l-introduzzjoni fl-Unjoni ta’ merkanzija li ma huwiex f’ċirkulazzjoni libera. Fir-rigward tal-post tal-importazzjoni, l-Artikolu 60 tal-imsemmija direttiva jipprevedi li din isseħħ fl-Istat Membru li fit-territorju tiegħu tkun tinsab il-merkanzija fid-data li fiha tiddaħħal fl-Unjoni.
25 Meta l-merkanzija importata tkun suġġetta għal dazji doganali, it-tieni subparagrafu tal-Artikolu 71(1) tad-Direttiva 2006/112 jawtorizza lill-Istati Membri jorbtu l-fatt taxxabbli u l-eżiġibbiltà tal-VAT fuq l-importazzjoni ma’ dawk tad-dazji doganali. Fil-fatt, il-VAT fuq l-importazzjoni u d-dazji doganali għandhom karatteristiċi essenzjali komparabbli sa fejn dawn jitnisslu minħabba l-importazzjoni fl-Unjoni u l-importazzjoni sussegwenti tal-merkanzija fiċ-ċirkwit ekonomiku tal-Istati Membri (ara, f’dan is-sens, is-sentenza tas-7 ta’ April 2022, Kauno teritorinė muitinė, C-489/20, EU:C:2022:277, punt 47 u l-ġurisprudenza ċċitata).
26 Għalhekk, dejn tal-VAT jista’ jiżdied mad-dejn doganali jekk l-aġir illegali li ġġenera dan id-dejn ikun jippermetti li jiġi preżunt li l-merkanzija kkonċernata daħlet fiċ-ċirkwit ekonomiku tal-Unjoni u setgħet tiġi suġġetta għall-konsum, u għalhekk jiskatta l-fatt li jagħti lok għall-VAT (sentenza tas-7 ta’ April 2022, Kauno teritorinė muitinė, C-489/20, EU:C:2022:277, punt 48 u l-ġurisprudenza ċċitata).
27 Madankollu, din il-preżunzjoni tista’ tiġi kkonfutata jekk jiġi stabbilit li, minkejja n-nuqqasijiet ta’ konformità mal-leġiżlazzjoni doganali, li jwasslu għat-tnissil ta’ dejn doganali fuq l-importazzjoni fl-Istat Membru fejn twettqu dawn in-nuqqasijiet, ikun ġie introdott oġġett fiċ-ċirkwit ekonomiku tal-Unjoni fit-territorju ta’ Stat Membru ieħor, li fih dan l-oġġett kien maħsub għall-konsum. F’dan il-każ, l-avveniment li jagħti lok għall-VAT fuq l-importazzjoni jseħħ f’dan l-Istat Membru l-ieħor (sentenza tat-3 ta’ Marzu 2021, Hauptzollamt Münster (Post ta’ tnissil tal-VAT), C-7/20, EU:C:2021:161, punt 31 kif ukoll il-ġurisprudenza ċċitata).
28 Għalhekk, f’kawża li tirrigwarda merkanzija li kienet is-suġġett ta’ nuqqas ta’ konformità mal-leġiżlazzjoni doganali fit-territorju Ġermaniż, fejn din kienet ġiet ittrasportata minn ajruplan għal ieħor biss qabel ma ġiet ittrasportata lejn il-Greċja, il-Qorti tal-Ġustizzja kkunsidrat li huwa f’dan l-Istat Membru li l-merkanzija inkwistjoni kienet daħlet fiċ-ċirkwit ekonomiku tal-Unjoni u li l-VAT fuq l-importazzjoni relatata magħhom kienet inħolqot, peress li dan l-Istat Membru kien jikkostitwixxi d-destinazzjoni finali tagħhom kif ukoll il-post fejn kienu ġew ikkunsmati (ara, f’dan is-sens, is-sentenza tal-10 ta’ Lulju 2019, Federal Express Corporation Deutsche Niederlassung, C-26/18, EU:C:2019:579, punt 53).
29 Il-Qorti tal-Ġustizzja ddeċidiet ukoll li vettura partikolari, introdotta bi ksur tal-leġiżlazzjoni doganali, kellha titqies li daħlet fiċ-ċirkwit ekonomiku fl-Istat Membru ta’ residenza tal-persuna taxxabbli, peress li din il-vettura kienet effettivament intużat f’dan l-Istat Membru, anki jekk, matul il-vjaġġ tagħha minn pajjiż terz lejn dan l-Istat Membru, din il-vettura kienet materjalment daħlet fit-territorju doganali tal-Unjoni minn Stat Membru ieħor. Konsegwentement, huwa f’dan l-ewwel Stat Membru li l-VAT fuq l-importazzjoni kienet inħolqot (ara, f’dan is-sens, is-sentenza tat-3 ta’ Marzu 2021, Hauptzollamt Münster (Post ta’ tnissil tal-VAT), C-7/20, EU:C:2021:161, punti 34 u 35).
30 F’dan il-każ, mit-talba għal deċiżjoni preliminari, bla ħsara għal verifika mill-qorti tar-rinviju, jirriżulta li R.T., waqt il-vjaġġ tiegħu mill-Ġeorġja lejn il-Ġermanja mwettaq fix-xahar ta’ Marzu 2019, saq il-vettura tiegħu billi għadda mill-Bulgarija u sussegwentement mis-Serbja, mill-Ungerija u mill-Awstrija. R.T. għandu r-residenza tiegħu fil-Ġermanja fejn uża din il-vettura mix-xahar ta’ Marzu 2019 u, tal-inqas, sax-xahar ta’ Ottubru 2020.
31 Fid-dawl tal-insenjamenti tas-sentenza tat-3 ta’ Marzu 2021, Hauptzollamt Münster (Post ta’ tnissil tal-VAT), C-7/20, EU:C:2021:161 irrapportata fil-punt 29 ta’ din is-sentenza, għandu jiġi kkunsidrat li din il-vettura, minkejja l-ewwel użu tagħha u d-dħul fiżiku tagħha fit-territorju tal-Unjoni fil-Bulgarija għal finijiet ta’ tranżitu, effettivament intużat fl-Istat Membru tad-destinazzjoni tagħha, f’dan il-każ fil-Ġermanja. Konsegwentement, sa fejn il-vettura daħlet fiċ-ċirkwit ekonomiku tal-Unjoni f’dan l-aħħar Stat Membru, l-importazzjoni tagħha, skont l-Artikoli 30 u 60 tad-Direttiva 2006/112, seħħet fl-istess Stat Membru.
32 Din il-konklużjoni ma hijiex invalidata mill-fatt, stabbilita mill-qorti tar-rinviju, li l-ewwel użu tal-vettura fit-territorju tal-Unjoni bħala mezz ta’ trasport huwa ekwivalenti għall-“konsum” tagħha, li jagħti lok għall-VAT, fis-sens tas-sentenza tal-10 ta’ Lulju 2019, Federal Express Corporation Deutsche Niederlassung (C-26/18, EU:C:2019:579, punt 44), jew jikkostitwixxi, tal-inqas, stadju f’dan il-konsum, li jimplika li, f’dan il-każ, il-vettura kienet daħlet fiċ-ċirkwit ekonomiku tal-Unjoni fil-Bulgarija.
33 Fil-fatt, kif jirriżulta mis-sentenza tal-10 ta’ Lulju 2019, Federal Express Corporation Deutsche Niederlassung (C-26/18, EU:C:2019:579, punt 48), minkejja d-dħul materjali tagħha fi Stat Membru, merkanzija tista’ titqies li ġiet introdotta fiċ-ċirkwit ekonomiku tal-Unjoni fit-territorju ta’ Stat Membru ieħor meta huwa f’dan l-Istat Membru li dan l-oġġett kien “intiż għall-konsum”. F’dawn iċ-ċirkustanzi, il-Qorti tal-Ġustizzja kkonstatat li l-merkanzija inkwistjoni kienet daħlet fiċ-ċirkwit ekonomiku tal-Unjoni fl-Istat Membru tad-destinazzjoni finali tagħha u li, konsegwentement, il-VAT fuq l-importazzjoni relatata ma’ din l-merkanzija kienet tnisslet f’dan l-Istat Membru (ara, f’dan is-sens, is-sentenza tal-10 ta’ Lulju 2019, Federal Express Corporation Deutsche Niederlassung, C-26/18, EU:C:2019:579, punt 53).
34 Għalhekk, vettura rreġistrata f’pajjiż terz li, kif tosserva wkoll il-qorti tar-rinviju, ma tistax tiġi “kkonsmata”, iżda li ġiet użata mill-persuna taxxabbli sabiex tgħaddi minn dan il-pajjiż lejn l-Istat Membru ta’ residenza tagħha, fejn il-vettura effettivament u għal żmien twil intużat, tista’ titqies li daħlet fiċ-ċirkwit ekonomiku tal-Unjoni f’dan l-Istat Membru. Fil-fatt, minkejja li ma ġietx ittrasportata hija stess fl-imsemmi Stat Membru u li kienet intużat bħala mezz ta’ trasport fl-Istat Membru tad-dħul fiżiku tagħha fit-territorju tal-Unjoni, din il-merkanzija ntużat f’dan l-aħħar Stat Membru biss sabiex iċċaqalqet lejn l-Istat Membru tad-destinazzjoni finali tagħha għall-finijiet tal-użu effettiv u sostenibbli tagħha f’dan tal-aħħar. F’dan ir-rigward, għandu jiġi osservat li l-post ta’ residenza tal-utent jista’ jservi bħala indizju għal tali użu.
35 Fid-dawl tal-kunsiderazzjonijiet kollha preċedenti, ir-risposta għall-ewwel domanda għandha tkun li l-Artikoli 30 u 60 tad-Direttiva 2006/112 għandhom jiġu interpretati fis-sens li, għall-finijiet tal-VAT, il-post tal-importazzjoni ta’ vettura rreġistrata fi Stat terz u introdotta fl-Unjoni bi ksur tal-leġiżlazzjoni doganali, jinsab fl-Istat Membru li fih l-awtur tan-nuqqas ta’ osservanza tal-obbligi imposti mil-leġiżlazzjoni doganali jirresjedi u effettivament juża l-vettura.
Fuq it-tieni domanda
36 Fid-dawl tar-risposta għall-ewwel domanda, ma hemmx lok li tingħata risposta għat-tieni domanda.
Fuq l-ispejjeż
37 Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.
Għal dawn il-motivi, Il-Qorti tal-Ġustizzja (Id-Disa’ Awla) taqta’ u tiddeċiedi:
L-Artikoli 30 u 60 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud kif emendata permezz tad-Direttiva tal-Kunsill (UE) 2018/2057 tal-20 ta’ Diċembru 2018
għandhom jiġu interpretati fis-sens li:
għall-finijiet tat-taxxa fuq il-valur miżjud, il-post tal-importazzjoni ta’ vettura rreġistrata fi Stat terz u introdotta fl-Unjoni bi ksur tal-leġiżlazzjoni doganali, jinsab fl-Istat Membru li fih l-awtur tan-nuqqas ta’ osservanza tal-obbligi imposti mil-leġiżlazzjoni doganali jirresjedi u effettivament juża l-vettura.
Firem
* Lingwa tal-kawża: il-Ġermaniż.