BG
ES
CS
DA
DE
ET
EL
EN
FR
HR
IT
LV
LT
HU
MT
NL
PL
PT
RO
SK
SL
FI
SVInfo
- Referral date: 16-02-2022
- Show case reference
- Ruling date: 29-06-2023
References in this case
Highlight in text
GoEdizzjoni Provviżorja
SENTENZA TAL-QORTI TAL-ĠUSTIZZJA (It-Tmien Awla)
29 ta’ Ġunju 2023 (*)
“Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Skema speċjali għall-aġenziji tal-ivvjaġġar – Kamp ta’ applikazzjoni – Aggregatur ta’ servizzi ta’ akkomodazzjoni li jixtri tali servizzi għan-nom tiegħu stess u jerġa’ jbigħhom lil kummerċjanti oħra mingħajr servizzi addizzjonali”
Fil-Kawża C-108/22,
li għandha bħala suġġett talba għal deċiżjoni preliminari skont l-Artikolu 267 TFUE, imressqa min-Naczelny Sąd Administracyjny (il-Qorti Amministrattiva Suprema, il-Polonja), permezz ta’ deċiżjoni tas-26 ta’ Awwissu 2021, li waslet fil-Qorti tal-Ġustizzja fis-16 ta’ Frar 2022, fil-proċedura
Dyrektor Krajowej Informacji Skarbowej
vs
C. sp. z o.o., fi stralċ,
IL-QORTI TAL-ĠUSTIZZJA (It-Tmien Awla),
komposta minn M. Safjan, President tal-Awla, N. Jääskinen u M. Gavalec (Relatur), Imħallfin,
Avukat Ġenerali: A. Rantos,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– għall-Gvern Pollakk, minn B. Majczyna, bħala aġent,
– għall-Gvern Ċek, minn O. Serdula, M. Smolek u J. Vláčil, bħala aġenti,
– għall-Kummissjoni Ewropea, minn M. Ł. Habiak u J. Jokubauskaitė, bħala aġenti,
wara li rat id-deċiżjoni meħuda, wara li nstema’ l-Avukat Ġenerali, li taqta’ l-kawża mingħajr konklużjonijiet,
tagħti l-preżenti
Sentenza
1 It-talba għal deċizjoni preliminari tirrigwarda l-interpretazzjoni tal-Artikolu 306 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60, iktar ’il quddiem id-“Direttiva dwar il-VAT”).
2 Din it-talba tressqet fil-kuntest ta’ kawża bejn id-Dyrektor Krajowej Informacji Skarbowej (id-Direttur tal-Informazzjoni Nazzjonali tat-Teżor, il-Polonja) (iktar ’il quddiem l-“awtorità fiskali”) u C. Sp. z o.o., fi stalċ, dwar l-applikazzjoni tal-iskema speċjali ta’ taxxa fuq il-valur miżjud (VAT) applikabbli għall-aġenziji tal-ivvjaġġar għall-bejgħ mill-ġdid, minn C., f’isimha proprju, ta’ servizzi ta’ akkomodazzjoni lil persuni taxxabbli oħra mingħajr servizzi addizzjonali.
Il-kuntest ġuridiku
Id-dritt tal-Unjoni
3 It-titolu XII tad-Direttiva dwar il-VAT, iddedikat għall-“[I]skemi Speċjali”, jinkludi l-Kapitolu 3, intitolat “Skema speċjali għall-aġenti ta’ l-ivvjaġġar”, li fih jinsab l-Artikolu 306, li jipprevedi:
“1. L-Istati Membri għandhom japplikaw skema speċjali tal-VAT, skond dan il-Kapitolu, għal transazzjonijiet imwettqa minn aġenti ta’ l-ivjaġġar li jkollhom x’jaqsmu ma’ konsumaturi f’isimhom u li jużaw provvisti ta’ merkanzija jew servizzi pprovduti minn persuni taxxabbli oħrajn, fil-provvediment tal-faċilitajiet ta’ l-ivvjaġġar.
Din l-iskema speċjali m’għandhiex tapplika għall-aġenti ta’ l-ivvjaġġar li jaġixxu biss bħala intermedjarji u li għalihom japplika l-punt (ċ) ta’ l-ewwel paragrafu ta’ l-Artikolu 79 għall-finijiet tal-kalkulazzjoni ta’ l-ammont tat-taxxa.
2. Għall-finijiet ta’ dan il-Kapitolu, operaturi turistiċi għandhom jitqiesu bħala aġenti ta’ l-ivvjaġġar.”
4 L-Artikolu 307 ta’ din id-direttiva jipprevedi:
“Transazzjonijet li jsiru, skont il-kondizzjonijiet stabbiliti fl-Artikolu 306, mill-aġent ta’ l-ivvjaġġar fir–rigward ta’ vjaġġ għandhom ikunu kkunsidrati bħala servizz uniku pprovdut mill-aġent ta’ l-ivvaġġjar lill-vjaġġatur.
Is-servizz uniku għandu jkun taxxabbli fl-Istat Membru li fih l-aġent ta’ l-ivvjaġġar ikun stabilixxa n-negozju tiegħu jew għandu l-istabbiliment fiss minn fejn l-aġent ta’ l-ivvjaġġar wettaq il-provvista ta’ servizzi.”
5 Skont l-Artikolu 308 tal-imsemmija direttiva:
“L-ammont taxxabbli u l-prezz mingħajr VAT, fit-tifsira tal-punt (8) ta’ l-Artikolu 226, fir-rigward tas-servizz uniku pprovdut mill-aġent ta’ l-ivvjaġġar għandu jkun il-marġni ta’ l-aġent ta’ l-ivvjaġġar, jiġifieri, id-differenza bejn l-ammont totali, mingħajr VAT, li għandu jitħallas mill-vjaġġatur u l-ispiża reali għall-aġent ta’ l-ivvjaġġar tal-provvisti ta’ merkanzija jew servizzi pprovduti minn persuni taxxabbli oħrajn, fejn dawk it-transazzjonijiet huma għall-benefiċċju dirett tal-vjaġġatur.”
6 L-Artikolu 309 tal-istess direttiva jipprevedi:
“Jekk transazzjonijet fdati mill-aġent [aġenzija] ta’ l-ivvjaġġar lil persuni taxxabbli oħrajn huma mwettqa mit-tali persuni barra mill-Komunità [Ewropea], il-provvista ta’ servizzi mwettqa mill-aġent ta’ l-ivjaġġar għandha tkun trattat bħala attività intermedjarja eżenti skond l-Artikolu 153.
Jekk it-transazzjonijiet twettqu kemm ġewwa u barra mill-Komunità, hija biss il-parti tas-servizz ta’ l-aġent ta’ l-ivvjaġġar li għandha x’taqsam ma’ transazzjonijiet barra mill-Komunità li tista’ tkun eżentata.”
7 L-Artikolu 310 tad-Direttiva dwar il-VAT jipprevedi:
“Il-VAT imposta lill-aġent ta’ l–ivvjaġġar minn persuni taxxabbli oħra għal transazzjonijiet imsemmija fl-Artikolu 307 u li huma ta’ benefiċċju dirett għall-vjaġġatur m’għandhomx ikunu jistgħu jitnaqqsu jew tingħata rifużjoni fi kwalunkwe Stat Membru.”
Id-dritt Pollakk
8 L-Artikolu 119 tal-ustawa o podatku od towarów i usług (il-Liġi dwar it-Taxxa fuq l-Oġġetti u s-Servizzi), tal-11 ta’ Marzu 2004 (Dz. U. Nru 54, pożizzjoni 535, iktar ’il quddiem il-“Liġi dwar il-VAT”, jipprevedi:
“1. Il-bażi tat-taxxa applikabbli għall-provvisti ta’ servizzi tal-ivvjaġġar għandu jkun l-ammont tal-marġni mnaqqas bit-taxxa dovuta, bla ħsara għall-paragrafu 5.
2. Il-‘marġni’ msemmi fil-paragrafu 1 ifisser id-differenza bejn l-ammont li għandu jitħallas mir-riċevitur tas-servizz u l-prezz tax-xiri mill-persuna taxxabbli mingħand persuni taxxabbli oħra ta’ oġġetti u servizzi li huma ta’ benefiċċju dirett għall-vjaġġatur; ‘servizzi li huma ta’ benefiċċju dirett għall-vjaġġatur’ tfisser is-servizzi li jikkostitwixxu element mill-provvista, jiġifieri, b’mod partikolari, it-trasport, l-akkomodazzjoni, l-ikel, l-assigurazzjoni.
3. Il-paragrafu 1 għandu japplika indipendentement mir-riċevitur tas-servizzi ta’ vvjaġġar, meta l-persuna taxxabbli:
1) (imħassar)
2) taġixxi fir-rigward tar-riċevitur tas-servizzi f’isimha stess u għan-nom tagħha stess;
3) tixtri mingħand persuni taxxabbli oħra, għall-finijiet tal-provvista, oġġetti u servizzi li huma ta’ benefiċċju dirett għall-vjaġġatur;
4) (imħassar)
[...]”
Il-kawża prinċipali u d-domanda preliminari
9 C., kumpannija rregolata mid-dritt Pollakk suġġetta għall-VAT, teżerċita attività ekonomika bħala “aggregatur ta’ servizzi ta’ lukandi”. Fil-kuntest ta’ din l-attività, hija toffri lill-klijenti tagħha, jiġifieri entitajiet li jeżerċitaw attività kummerċjali, il-possibbiltà li jirriżervaw servizzi ta’ akkomodazzjoni f’lukandi u fi stabbilimenti oħra b’funzjoni simili li jinsabu fil-Polonja u barra mill-pajjiż.
10 Peress li C. ma għandhiex installazzjonijiet ta’ akkomodazzjoni proprji tagħha , hija tixtri, f’isimha stess u għan-nom tagħha stess, dawn is-servizzi ta’ akkomodazzjoni mingħand persuni oħra suġġetti għall-VAT, li hija mbagħad terġa’ tbigħ lill-klijenti tagħha.
11 Skont il-ħtiġijiet u l-aspettattivi ta’ dawn il-klijenti, hija tipprovdi wkoll pariri dwar l-għażla tal-akkomodazzjoni u assistenza għall-organizzazzjoni tal-vjaġġ. Madankollu, il-qorti tar-rinviju tirrileva li C. spiss tipprovdi biss servizz ta’ akkomodazzjoni. Il-prezz li bih din tal-aħħar terġa’ tbigħ dan is-servizz ta’ akkomodazzjoni jinkludi l-ispiża tax-xiri tal-imsemmi servizz u l-marġni tiegħu fil-forma ta’ prezz ta’ prenotazzjoni intiż sabiex ikopri l-ispejjeż tat-tranżazzjoni.
12 F’deċiżjoni fiskali maħruġa fis-27 ta’ April 2017, l-awtorità fiskali qieset li l-bejgħ mill-ġdid ta’ servizzi ta’ akkomodazzjoni pprovdut minn C. ma jaqax taħt il-kunċett ta’ “servizz tal-ivvjaġġar” imsemmi, essenzjalment, fl-Artikolu 119 tal-Liġi dwar il-VAT, kuntrarjament għal dak li kienet issostni din tal-aħħar. Fil-fatt, din l-awtorità qieset, essenzjalment, li, sabiex servizz jitqies li huwa servizz tal-ivvjaġġar, huwa għandu, inkwantu servizz kumpless li jinkludi grupp ta’ servizzi esterni u interni, ikun magħmul minn iktar minn provvista waħda. Issa, is-servizzi pprovduti minn C., li jkopru biss l-akkomodazzjoni, ma jistgħux jikkostitwixxu servizz tal-ivvjaġġar, għaliex dan ma huwiex tali servizz kumpless.
13 C. ikkontestat din id-deċiżjoni quddiem il-Wojewódzki Sąd Administracyjny we Wrocławiu (il-Qorti Amministrattiva Provinċjali ta’ Wrocław, il-Polonja) li, f’sentenza tas-16 ta’ Novembru 2017, iddikjarat ir-rikors fondat u ddeċidiet li s-servizzi pprovduti minn C. kellhom jiġu ntaxxati, inkwantu “servizzi tal-ivvjaġġar”, skont l-iskema speċjali prevista fl-Artikolu 119 tal-Liġi dwar il-VAT. Dik il-qorti bbażat ir-raġunament tagħha fuq interpretazzjoni letterali u kuntestwali ta’ din l-aħħar dispożizzjoni kif ukoll fuq il-fatt li din tittrasponi l-Artikolu 306 tad-Direttiva dwar il-VAT u li, konsegwentement, għandha tiġi applikata l-ġurisprudenza tal-Qorti tal-Ġustizzja tal-Unjoni Ewropea f’dan ir-rigward.
14 L-awtorità fiskali ppreżentat appell ta’ kassazzjoni kontra dik is-sentenza quddiem in-Naczelny Sąd Administracyjny (il-Qorti Amministrattiva Suprema, il-Polonja), li hija l-qorti tar-rinviju. Din l-awtorità tikkritika lill-qorti tal-ewwel istanza li kisret l-Artikolu 119(1) tal-Liġi dwar il-VAT sa fejn hija qieset li s-servizz ikkonċernat ma kellux jissodisfa r-rekwiżit ta’ kumplessità sabiex jiġi kklassifikat bħala “servizz tal-ivvjaġġar”. Skont l-awtorità fiskali, servizz ta’ akkomodazzjoni, propost waħdu, ma jikkostitwixxix servizz tal-ivvjaġġar u, għaldaqstant, ma jistax jibbenefika mill-iskema speċjali tal-aġenziji tal-ivvjaġġar, li tipprevedi impożizzjoni għall-VAT fuq il-marġni.
15 Adita b’dan l-appell, il-qorti tar-rinviju tqis li, sabiex jiġi ddeterminat jekk is-servizz inkwistjoni fil-kawża prinċipali jaqax taħt l-iskema speċjali prevista fl-Artikolu 119 tal-Liġi dwar il-VAT, għandu jiġi eżaminat b’mod partikolari l-Artikolu 306 tad-Direttiva dwar il-VAT. F’dan ir-rigward, il-qorti tar-rinviju tinvoka l-ġurisprudenza tal-Qorti tal-Ġustizzja li minnha jirriżulta essenzjalment li l-iskema speċjali stabbilita fl-Artikoli 306 sa 310 tad-Direttiva dwar il-VAT tapplika wkoll għas-servizzi ta’ akkomodazzjoni mibjugħa mingħajr servizzi addizzjonali. Il-qorti tar-rinviju tqis għalhekk li tali servizzi jistgħu jaqgħu taħt din l-iskema speċjali minkejja li ma humiex ta’ natura kumplessa.
16 Hija tispeċifika li din l-interpretazzjoni hija kompatibbli mal-prinċipju ta’ newtralità previst mid-Direttiva dwar il-VAT. Fil-fatt, li kieku l-bejgħ mill-ġdid ta’ servizzi ta’ akkomodazzjoni pprovduti mingħajr servizzi addizzjonali kien, għall-kuntrarju tal-bejgħ mill-ġdid ta’ tali servizzi flimkien ma’ servizzi addizzjonali, intaxxat skont ir-regoli ġenerali, il-prinċipju ta’ newtralità jkun miksur.
17 Madankollu, il-qorti tar-rinviju tqis li l-interpretazzjoni tad-dispożizzjoni kkonċernata tad-Direttiva dwar il-VAT mill-Qorti tal-Ġustizzja tippermetti li jitneħħew id-dubji li jeżistu fil-kawża li biha hija adita.
18 F’dawn iċ-ċirkustanzi, in-Naczelny Sąd Administracyjny (il-Qorti Amministrattiva Suprema) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domanda preliminari li ġejja:
“L-Artikolu 306 tad-Direttiva [dwar il-VAT] għandu jiġi interpretat li jista’ japplika għal persuna taxxabbli li hija konsolidatur ta’ servizzi ta’ lukandi li [t]ixtri kif ukoll tbigħ mill-ġdid servizzi ta’ akkomodazzjoni lil operaturi ekonomiċi oħra, fejn dawk it-tranżazzjonijiet ma huma akkumpanjati minn ebda servizz addizzjonali ieħor?”
Fuq id-domanda preliminari
19 Permezz tad-domanda preliminari tagħha, il-qorti tar-rinviju tistaqsi, essenzjalment, jekk l-Artikolu 306 tad-Direttiva dwar il-VAT għandux jiġi interpretat fis-sens li l-provvista ta’ persuna taxxabbli, li tikkonsisti fix-xiri ta’ servizzi ta’ akkomodazzjoni mingħand persuni taxxabbli oħra u fil-bejgħ mill-ġdid tagħhom lil operaturi ekonomiċi oħra, taqa’ taħt l-iskema speċjali tal-VAT applikabbli għall-aġenziji tal-ivvjaġġar, minkejja li dawn is-servizzi ma humiex akkumpanjati b’servizzi addizzjonali.
20 B’mod preliminari, għandu jiġi osservat li l-iskema speċjali tal-VAT applikabbli għall-aġenziji tal-ivvjaġġar, stabbilita fl-Artikoli 306 sa 310 tad-Direttiva dwar il-VAT, tinkludi regoli proprji għall-attività ta’ dawn l-aġenziji, li jidderogaw mis-sistema komuni tal-VAT. F’dan il-kuntest, il-Qorti tal-Ġustizzja ddeċidiet li, bħala eċċezzjoni mis-sistema komuni tad-Direttiva dwar il-VAT, din l-iskema speċjali għandha tiġi applikata biss sa fejn huwa neċessarju sabiex jintlaħaq l-għan tagħha (sentenza tad-19 ta’ Diċembru 2017, Skarpa Travel, C-422/17, EU:C:2018:1029, punti 24 u 27 kif ukoll il-ġurisprudenza ċċitata).
21 F’dan ir-rigward, l-għan essenzjali tar-regoli relatati mal-iskema speċjali tal-VAT applikabbli għat-tranżazzjonijiet tal-aġenziji tal-ivvjaġġar huwa li jiġu evitati d-diffikultajiet għall-operaturi ekonomiċi li jirriżultaw mill-prinċipji ġenerali tad-Direttiva dwar il-VAT rigward it-tranżazzjonijiet li jinvolvu l-provvista ta’ servizzi akkwistati mingħand terzi. Fil-fatt, l-applikazzjoni tar-regoli ordinarji dwar il-post ta’ tassazzjoni, il-bażi tat-taxxa u t-tnaqqis tat-taxxa tal-input tinvolvi, minħabba l-multipliċità tas-servizzi u l-postijiet fejn dawn is-servizzi jiġu pprovduti, diffikultajiet prattiċi għal dawn l-impriżi li jkunu tali li jostakolaw l-eżerċizzju tal-attività tagħhom (sentenzi tat-12 ta’ Novembru 1992, Van Ginkel, C-163/91, C-163/91, EU:C:1992:435, punt 14, u tal-25 ta’ Ottubru 2012, Kozak, C-557/11, EU:C:2012:672, punt 19).
22 B’mod iktar partikolari, skont l-Artikolu 306 tad-Direttiva dwar il-VAT, l-Istati Membri għandhom japplikaw l-imsemmija skema għat-tranżazzjonijiet tal-aġenziji tal-ivvjaġġar sa fejn dawn l-aġenziji jaġixxu f’isimhom stess fil-konfront tal-klijent u meta jużaw, għas-seħħ tal-vjaġġ, provvisti ta’ oġġetti u servizzi akkwistati mingħand persuni taxxabbli oħra.
23 F’dan il-każ, mit-talba għal deċiżjoni preliminari jirriżulta li C., inkwantu aggregatur ta’ servizzi ta’ lukandi, jixtri servizzi ta’ akkomodazzjoni f’ismu stess mingħand persuni taxxabbli oħra sabiex imbagħad jerġa’ jbigħhom lill-klijenti tiegħu, entitajiet li jeżerċitaw attività kummerċjali. Minn dan jirriżulta li kumpannija bħal C. tissodisfa l-kundizzjonijiet sostantivi previsti fl-Artikolu 306 tad-Direttiva dwar il-VAT sabiex tkun tista’ tibbenefika, bħala prinċipju, mill-iskema ta’ tassazzjoni speċjali prevista f’dan l-artikolu.
24 Barra minn hekk, għandu jiġi osservat li, fil-kuntest tal-attivitajiet tagħha, C. twettaq tranżazzjonijiet identiċi, jew mill-inqas komparabbli, għal dawk ta’ aġent tal-ivvjaġġar jew ta’ operatur turistiku. Għalhekk, il-qorti tar-rinviju tosserva li, skont il-ħtiġijiet u l-aspettattivi tal-klijenti tagħha, din il-kumpannija tipprovdi b’mod okkażjonali wkoll pariri dwar l-għażla tal-akkomodazzjoni u assistenza għall-organizzazzjoni tal-vjaġġi.
25 Madankollu, għandu jiġi evalwat jekk il-provvista ta’ servizzi ta’ akkomodazzjoni taqax taħt l-iskema speċjali tal-aġenziji tal-ivvjaġġar meta din ma tkunx akkumpanjata b’servizzi addizzjonali.
26 F’dan ir-rigward, mill-ġurisprudenza tal-Qorti tal-Ġustizzja jirriżulta li l-esklużjoni mill-kamp ta’ applikazzjoni tal-Artikolu 306 tad-Direttiva dwar il-VAT tas-servizzi pprovduti minn aġenzija tal-ivvjaġġar minħabba s-sempliċi fatt li huma jinkludu biss il-provvista ta’ akkomodazzjoni twassal għal skema fiskali kumplessa, li fiha r-regoli applikabbli fil-qasam tal-VAT jiddependu fuq l-elementi kostituttivi tas-servizzi offruti lil kull vjaġġatur. Tali skema fiskali tinjora l-għanijiet ta’ din id-direttiva (ara, f’dan is-sens, is-sentenza tad-19 ta’ Diċembru 2018, Alpenchalets Resorts, C-552/17, EU:C:2018:1032, punti 25 sa 28 u l-ġurisprudenza ċċitata).
27 Minn dan isegwi li l-provvista minn aġenzija tal-ivvjaġġar ta’ akkomodazzjoni għall-vaganzi taqa’ taħt din l-iskema ta’ tassazzjoni speċjali, anki jekk din il-provvista tinkludi biss l-akkomodazzjoni. F’dan ir-rigward, għandu jiġi osservat li, ladarba s-sempliċi provvista ta’ akkomodazzjoni għall-vaganzi mill-aġenzija tal-ivvjaġġar hija biżżejjed għall-applikazzjoni tal-iskema speċjali prevista fl-Artikoli 306 sa 310 tad-Direttiva dwar il-VAT, l-importanza ta’ kunsinni oħra ta’ oġġetti jew ta’ provvisti oħra ta’ servizzi, li eventwalment jakkumpanjaw din il-provvista ta’ akkomodazzjoni, ma tistax taffettwa l-klassifikazzjoni legali ta’ tali sitwazzjoni, jiġifieri li din taqa’ taħt l-iskema speċjali tal-aġenziji tal-ivvjaġġar. (ara, f’dan is-sens, is-sentenza tad-19 ta’ Diċembru 2018, Alpenchalets Resorts, C-552/17, EU:C:2018:1032, punti 29 u 33).
28 Għaldaqstant, il-Qorti tal-Ġustizzja ddeċidiet li l-Artikoli 306 sa 310 tad-Direttiva dwar il-VAT għandhom jiġu interpretati fis-sens li s-sempliċi tqegħid għad-dispożizzjoni minn aġenzija tal-ivvjaġġar ta’ akkomodazzjoni għall-vaganzi mikrija mingħand persuni taxxabbli oħra jew tali tqegħid għad-dispożizzjoni ta’ akkomodazzjoni għall-vaganzi akkumpanjata b’servizzi addizzjonali, indipendentement mill-importanza ta’ dawn is-servizzi addizzjonali, jikkostitwixxu, kull waħda minnhom, servizz uniku li jaqa’ taħt l-iskema speċjali għall-aġenziji tal-ivvjaġġar (sentenza tad-19 ta’ Diċembru 2018, Alpenchalets Resorts, C-552/17, EU:C:2018:1032, punt 35).
29 F’dan il-każ, mit-talba għal deċiżjoni preliminari jirriżulta li C. tbigħ servizzi ta’ akkomodazzjoni f’lukandi u fi stabbilimenti oħra li għandhom funzjoni simili, kemm fil-Polonja kif ukoll barra mill-pajjiż. Issa, il-ġurisprudenza tal-Qorti tal-Ġustizzja mogħtija fil-kuntest tal-provvista, minn aġenzija tal-ivvjaġġar, ta’ akkomodazzjoni għall-vaganzi, kif tirriżulta mill-punti 26 sa 28 ta’ din is-sentenza, hija intiża sabiex tirregola wkoll is-sitwazzjoni tal-bejgħ ta’ servizzi ta’ akkomodazzjoni f’lukandi u fi stabbilimenti oħra. F’dan ir-rigward, għandu b’mod partikolari jiġi speċifikat li d-diversità ġeografika tal-lukandi u tal-istabbilimenti li huma s-suġġett ta’ dawn is-servizzi tista’ minnha nfisha tikkawża diffikultajiet prattiċi li din l-iskema ta’ tassazzjoni speċjali hija intiża li tevita, konformement mal-ġurisprudenza msemmija fil-punt 21 ta’ din is-sentenza.
30 Fid-dawl ta’ dak li ntqal hawn fuq, ir-risposta għad-domanda magħmula għandha tkun li l-Artikolu 306 tad-Direttiva dwar il-VAT għandu jiġi interpretat fis-sens li l-provvista ta’ persuna taxxabbli, li tikkonsisti fix-xiri ta’ servizzi ta’ akkomodazzjoni mingħand persuni taxxabbli oħra u fil-bejgħ mill-ġdid tagħhom lil operaturi ekonomiċi oħra, taqa’ taħt l-iskema speċjali tal-VAT applikabbli għall-aġenziji tal-ivvjaġġar, minkejja li dawn is-servizzi ma jkunux akkumpanjati b’servizzi addizzjonali.
Fuq l-ispejjeż
31 Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.
Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi:
L-Artikolu 306 tad-Direttiva tal-Kunsill 2006/112/KE tat-28 ta’ Novembru dwar is-sistema komuni ta’ taxxa fuq il-valur miżjud,
għandu jiġi interpretat fis-sens li:
il-provvista ta’ persuna taxxabbli, li tikkonsisti fix-xiri ta’ servizzi ta’ akkomodazzjoni mingħand persuni taxxabbli oħra u fil-bejgħ mill-ġdid tagħhom lil operaturi ekonomiċi oħra, taqa’ taħt l-iskema speċjali tat-taxxa fuq il-valur miżjud applikabbli għall-aġenziji tal-ivvjaġġar, minkejja li dawn is-servizzi ma jkunux akkumpanjati b’servizzi addizzjonali.
Firem
* Lingwa tal-kawża: il-Pollakk.