BG
ES
CS
DA
DE
ET
EL
EN
FR
HR
IT
LV
LT
HU
MT
NL
PL
PT
RO
SK
SL
FI
SVInfo
- Referral date: 30-06-2022
- Show case reference
- Opinion date: 07-09-2023
- Ruling date: 11-01-2024
References in this case
Highlight in text
GoEdizzjoni Provviżorja
SENTENZA TAL-QORTI TAL-ĠUSTIZZJA (It-Tmien Awla)
11 ta’ Jannar 2024 (*)
“Rinviju għal deċiżjoni preliminari – Sistema komuni ta’ taxxa fuq il-valur miżjud (VAT) – Direttiva 2006/112/KE – Anness IV – Il-punt 2 – Dispożizzjonijiet temporanji għal servizzi partikolari li jinvolvu xogħol intensiv – Rata mnaqqsa tal-VAT applikabbli għas-servizzi ta’ rinnovazzjoni u ta’ tiswija ta’ residenzi privati – Kunċett ta’ ‘residenzi privati’”
Fil-Kawża C-433/22,
li għandha bħala suġġett talba għal deċiżjoni preliminari skont l-Artikolu 267 TFUE, imressqa mis-Supremo Tribunal Administrativo (il-Qorti Amministrattiva Suprema, il-Portugall), permezz ta’ deċiżjoni tat-8 ta’ Ġunju 2022, li waslet fil-Qorti tal-Ġustizzja fit-30 ta’ Ġunju 2022, fil-proċedura
Autoridade Tributária e Aduaneira
vs
HPA – Construções SA,
IL-QORTI TAL-ĠUSTIZZJA (It-Tmien Awla),
komposta minn K. Jürimäe, Presidenta tat-Tielet Awla, li qiegħda taġixxi bħala Presidenta tat-Tmien Awla (Relatriċi), M. Safjan u M. Gavalec, Imħallfin,
Avukat Ġenerali: J. Kokott,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– għall-Gvern Portugiż, minn P. Barros da Costa, C. Bento u A. Rodrigues, bħala aġenti,
– għall-Kummissjoni Ewropea, minn M. Björkland u I. Melo Sampaio, bħala aġenti,
wara li semgħet il-konklużjonijiet tal-Avukata Ġenerali ppreżentati fis-seduta tas-7 ta’ Settembru 2023,
tagħti l-preżenti
Sentenza
1 It-talba għal deċiżjoni preliminari tirrigwarda l-interpretazzjoni tal-punt 2 tal-Anness IV tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, rettifika fil-ĠU 2007, L 335, p. 60), iktar ’il quddiem id-“Direttiva dwar il-VAT”).
2 Din it-talba tressqet fil-kuntest ta’ tilwima bejn l-Autoridade Tributária e Aduaneira (l-Awtorità tat-Taxxa u tad-Dwana, il-Portugall, iktar ’il quddiem l-“awtorità tat-taxxa”) u HPA – Construções SA (iktar ’il quddiem “HPA”) dwar ir-rata tat-taxxa fuq il-valur miżjud (VAT) applikabbli għas-servizzi ta’ restawrazzjoni ta’ ċerti proprjetajiet immobbli mwettqa minn din il-kumpannija.
Il-kuntest ġuridiku
Id-dritt tal-Unjoni
3 Id-Direttiva dwar il-VAT tinkludi t-Titolu VIII, bit-titolu “Rati”, li jinkludi l-Kapitolu 2, bit-titolu “Struttura u livelli ta’ rati”, li fih jinsabu, b’mod partikolari, l-Artikoli 96 u 98.
4 L-Artikolu 96 ta’ din id-direttiva jipprevedi:
“L-Istati Membri għandhom japplikaw rata standard ta’ VAT, li għandha tiġi ffissata minn kull Stat Membru bħala persentaġġ ta’ l-ammont taxxabbli u li għandha tkun l-istess għall-provvista ta’ merkanzija u għall-provvista ta’ servizzi.”
5 L-Artikolu 98(1) u (2) tal-imsemmija direttiva huwa fformulat kif ġej:
“1. L-Istati Membri jistgħu japplikaw jew rata mnaqqsa waħda jew żewġ rati mnaqqsa.
2. Ir-rati mnaqqsa għandhom japplikaw biss għall-provvisti ta’ merkanzija jew servizzi fil-kategoriji stabbiliti fl-Anness III.”
6 It-Titolu VIII tal-istess direttiva jinkludi l-Kapitolu 3, bit-titolu “Disposizzjonijiet temporanji għal servizzi partikolari li jinvolvu xogħol intensiv”, li fih jinsabu, b’mod partikolari, l-Artikoli 106 u 107 tad-Direttiva dwar il-VAT. Sussegwentement għall-fatti tal-tilwima fil-kawża prinċipali, il-Kapitolu 3 tat-Titolu VIII u l-Anness IV ta’ din id-direttiva tħassru permezz tad-Direttiva tal-Kunsill 2009/47/KE tal-5 ta’ Mejju 2009 li temenda d-Direttiva 2006/112/KE dwar rati mnaqqsa tat-taxxa fuq il-valur miżjud (ĠU 2009, L 116, p. 18).
7 L-Artikolu 106 tad-Direttiva dwar il-VAT jipprovdi:
“Il-Kunsill [tal-Unjoni Ewropea] jista’, billi jaġixxi b’mod unanimu fuq proposta mill-Kummissjoni [Ewropea], jawtorizza lill-Istati Membri kollha li japplikaw l-aktar tard sal-31 ta’ Diċembru 2010 r-rati mnaqqsa previsti fl-Artikolu 98 għal servizzi elenkati fl-Anness IV.
Ir-rati mnaqqsa jistgħu jiġu applikati għal servizzi minn mhux aktar minn tnejn mill-kategoriji stabbiliti fl-Anness IV.
F’każi eċċezzjonali, Stat Membru jista’ jiġi awtorizzat li japplika r-rata mnaqqsa għal servizzi minn tlieta minn dawk il-kategoriji.”
8 L-Artikolu 107 ta’ din id-direttiva jipprevedi:
“Is-servizzi msemmija fl-Artikolu 106 għandhom jissodisfaw il-kondizzjonijiet li ġejjin:
(a) għandhom jinvolvu xogħol intensiv;
(b) għandhom fil-biċċa l-kbira jiġu pprovduti direttament lill-konsumaturi aħħarin;
[...]”
9 L-Anness IV tal-imsemmija direttiva jinkludi l-lista tas-servizzi msemmija fl-Artikolu 106 tal-istess direttiva. Il-punt 2 ta’ dan l-anness huwa fformulat kif ġej:
“rinovazzjoni u tiswija ta’ djar [residenzi] privati, għajr il-materjal li jiffurmaw parti sinifikanti mill-valur tas-servizz ipprovdut”.
Id-dritt Portugiż
10 L-Artikolu 18(1) tal-Código do Imposto sobre o Valor Acrescentado (il-Kodiċi tat-Taxxa fuq il-Valur Miżjud), fil-verżjoni tiegħu applikabbli għat-tilwima fil-kawża prinċipali (iktar ’il quddiem il-“Kodiċi tal-VAT”), jipprevedi:
“Ir-rati tat-taxxa huma dawn li ġejjin:
a) għall-importazzjonijiet, il-kunsinni ta’ oġġetti u l-provvisti ta’ servizzi inklużi fil-Lista I annessa ma’ din il-liġi, ir-rata hija ta’ 5 %;
[...]
c) għall-importazzjonijiet, il-kunsinni ta’ oġġetti u l-provvisti ta’ servizzi l-oħra, ir-rata hija ta’ 21 %.”
11 Il-punt 2.24 tal-Lista I annessa mal-Kodiċi tal-VAT jipprovdi:
“Il-kuntratt għal xogħlijiet għal finijiet ta’ titjib, ta’ rikostruzzjoni, ta’ rinnovazzjoni, ta’ rranġar, ta’ tiswija u ta’ konservazzjoni ta’ proprjetajiet immobbli u ta’ partijiet awtonomi ta’ proprjetà immobbli għal użu residenzjali, bl-eċċezzjoni tas-servizzi ta’ tindif, ta’ manutenzjoni ta’ spazji ekoloġiċi u ta’ kuntratti għal xogħlijiet li jirrigwardaw proprjetajiet immobbli li jkopru t-totalità jew parti mill-elementi li jikkonsistu f’pixxini, saunas, tennis courts, courts tal-golf jew tal-minigolf u installazzjonijiet simili.
Ir-rata mnaqqsa ma tapplikax għall-materjali inkorporati, sakemm il-valur tagħhom ma jaqbiżx l-20 % tal-valur totali tas-servizz ipprovdut.”
12 Għall-finijiet tal-interpretazzjoni tal-espressjoni “proprjetajiet immobbli u [...] partijiet awtonomi ta’ proprjetà immobbli għal użu residenzjali” użata f’dan il-punt tal-Lista I annessa mal-Kodiċi tal-VAT, l-awtorità tat-taxxa adottat linji gwida permezz, b’mod partikolari, taċ-Ċirkulari Nru 30025 tas-7 ta’ Awwissu 2000. Skont din iċ-ċirkulari, il-proprjetà immobbli tkun titqies bħala għal użu residenzjali “jekk, fil-bidu tax-xogħlijiet u wara t-tlestija tagħhom, hija tibqa’ effettivament tintuża bħala residenza privata”.
Il-kawża prinċipali u d-domanda preliminari
13 HPA hija kumpannija kummerċjali li l-għan tagħha huwa, b’mod partikolari, li tipprovdi servizzi ta’ kostruzzjoni u ta’ konklużjoni ta’ kuntratti għal xogħlijiet. Matul is-sena 2007, din il-kumpannija kkonkludiet ħames kuntratti għal xogħlijiet għall-finijiet tal-iżvilupp mill-ġdid ta’ bini urban ma’ tliet kumpanniji kummerċjali, proprjetarji ta’ proprjetajiet immobbli li kienu s-suġġett tax-xogħlijiet previsti mill-imsemmija kuntratti.
14 Fuq il-fatturi għas-servizzi ta’ rinnovazzjoni u ta’ tiswija mwettqa fil-kuntest tal-istess kuntratti, HPA applikat rata mnaqqsa tal-VAT ta’ 5 %, skont il-punt 2.24 tal-Lista I annessa mal-Kodiċi tal-VAT.
15 Fid-19 ta’ Jannar 2011, HPA kienet is-suġġett ta’ ispezzjoni tat-taxxa relatata mas-sena 2007 mid-Direção de Finanças de Lisboa (id-Direttorat Finanzjarju ta’ Lisbona, il-Portugall). Din l-ispezzjoni kienet intiża li tiddetermina jekk il-kundizzjonijiet previsti għall-applikazzjoni ta’ din ir-rata mnaqqsa kinux issodisfatti, b’mod partikolari dik relatata man-neċessità li s-suġġett tat-twettiq ta’ servizzi għandu jkun proprjetajiet immobbli għal użu residenzjali.
16 Wara l-imsemmija spezzjoni, peress li HPA ma setgħetx tibbenefika mill-imsemmija rata mnaqqsa, is-Serviço de Finanças de Sintra-1 (l-Uffiċċju tat-Taxxa ta’ Sintra-1, il-Portugall) bagħat lil din il-kumpannija, fl-10 ta’ Mejju 2011, avviż ta’ aġġustament tal-VAT għal ammont addizzjonali tal-VAT li kellu jitħallas li jammonta għal EUR 374 750.77.
17 HPA kkontestat dan l-avviż ta’ aġġustament quddiem it-Tribunal Administrativo e Fiscal de Sintra (il-Qorti Amministrattiva u Fiskali ta’ Sintra, il-Portugall). Permezz ta’ sentenza tas-26 ta’ Ġunju 2020, dik il-qorti laqgħet ir-rikors ta’ din il-kumpannija u annullat l-imsemmi avviż ta’ aġġustament. L-awtorità tat-taxxa ppreżentat rikors kontra dik s-sentenza quddiem is-Supremo Tribunal Administrativo (il-Qorti Amministrattiva Suprema, il-Portugall), li hija l-qorti tar-rinviju.
18 Quddiem dik il-qorti, l-awtorità tat-taxxa sostniet li l-punt 2.24 tal-Lista I annessa mal-Kodiċi tal-VAT, hekk kif interpretat miċ-Ċirkulari Nru 30025 tas-7 ta’ Awwissu 2000, japplika biss għas-servizzi ta’ rinnovazzjoni ta’ proprjetajiet immobbli li effettivament jintużaw bħala residenza, kemm qabel kif ukoll wara t-twettiq tal-imsemmija servizzi. Ir-rata mnaqqsa tal-VAT prevista f’dan il-punt 2.24 tal-Lista I annessa mal-Kodiċi tal-VAT għalhekk ma hijiex applikabbli għal servizzi ta’ rinnovazzjoni li jirrigwardaw proprjetajiet immobbli li, bħal dawk li kienu s-suġġett tal-ħames kuntratti għal xogħlijiet imsemmija fil-punt 13 ta’ din is-sentenza, huma biss “intiżi” għal użu għal finijiet residenzjali, fis-sens li huma approvati għal dan l-għan iżda li ma humiex effettivament użati bħala residenza fil-mument tal-provvista ta’ dawn is-servizzi.
19 Peress li l-punt 2.24 tal-Lista I annessa mal-Kodiċi tal-VAT ittraspona l-punt 2 tal-Anness IV tad-Direttiva dwar il-VAT fid-dritt Portugiż, l-imsemmija qorti tqis li huwa neċessarju li l-Qorti tal-Ġustizzja tintalab tinterpreta din l-aħħar dispożizzjoni. Skont l-istess qorti, huwa neċessarju, b’mod partikolari, li jiġu ċċarati ċ-ċirkustanzi li fihom provvista ta’ servizzi ta’ rinnovazzjoni tista’ tibbenefika mir-rata mnaqqsa applikabbli għall-attivitajiet ta’ “rinovazzjoni u [ta’] tiswija ta’ djar [residenzi] privati”, imsemmija fl-imsemmija dispożizzjoni tad-Direttiva dwar il-VAT.
20 F’dan ir-rigward, il-qorti tar-rinviju tirrileva li l-Qorti tal-Ġustizzja ddeċidiet, fis-sentenza tal-5 ta’ Mejju 2022, DSR – Montagem e Manutenção de Ascensores e Escadas Rolantes, (C-218/21, EU:C:2022:355), li l-punt 2 tal-Anness IV tad-Direttiva dwar il-VAT, minn naħa, kien ikopri żewġ attivitajiet distinti, jiġifieri t-tiswija u r-rinnovazzjoni, u, min-naħa l-oħra, kien japplika għal residenzi privati, jiġifieri proprjetajiet immobbli li jservu bħala residenza privata u li ma humiex użati għal finijiet kummerċjali jew ta’ servizz jew għal okkupazzjonijiet temporanji, bħal-lukandi. Madankollu, il-Qorti tal-Ġustizzja ma ddeċidietx dwar l-interpretazzjoni tal-kunċett ta’ “residenzi privati”.
21 F’dawn iċ-ċirkustanzi, is-Supremo Tribunal Administrativo (il-Qorti Amministrattiva Suprema) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:
“Il-punt 2 tal-Anness IV tad-[Direttiva dwar il-VAT], jipprekludi dispożizzjoni nazzjonali li tipprovdi li r-rata mnaqqsa tal-VAT tista’ tiġi applikata biss għal kuntratti ta’ xogħlijiet ta’ tiswija u rinnovazzjoni ta’ proprjetà immobbli f’residenzi privati li fihom ikunu qed jgħixu n-nies fil-mument meta dawn ix-xogħlijiet ikunu qed iseħħu?”
Fuq id-domanda preliminari
22 Permezz tad-domanda tagħha, il-qorti tar-rinviju tistaqsi, essenzjalment, jekk il-punt 2 tal-Anness IV tad-Direttiva dwar il-VAT għandux jiġi interpretat fis-sens li jipprekludi leġiżlazzjoni nazzjonali li tipprevedi l-applikazzjoni ta’ rata mnaqqsa tal-VAT għal servizzi ta’ tiswija u ta’ rinnovazzjoni ta’ residenzi privati bil-kundizzjoni li dawn effettivament jintużaw bħala residenza fid-data li fiha jseħħu dawn ix-xogħlijiet.
23 Sat-tħassir tiegħu permezz tad-Direttiva 2009/47, il-punt 2 tal-Anness IV tad-Direttiva dwar il-VAT, moqri flimkien mal-Artikolu 106 ta’ din id-direttiva, kien jawtorizza lill-Istati Membri japplikaw rata mnaqqsa tal-VAT għas-servizzi relatati mar-“rinovazzjoni u tiswija ta’ djar [residenzi] privati, għajr il-materjali li jiffurmaw parti sinifikanti mill-valur tas-servizz ipprovdut”.
24 Fl-assenza ta’ riferiment għad-dritt tal-Istati Membri u ta’ definizzjoni rilevanti fid-Direttiva dwar il-VAT, il-kliem użat fil-punt 2 tal-Anness IV tal-imsemmija direttiva għandu jiġi interpretat b’mod uniformi u indipendentement mill-klassifikazzjonijiet użati fl-Istati Membri, konformement mat-tifsira normali tiegħu fil-lingwaġġ ta’ kuljum, filwaqt li jittieħdu inkunsiderazzjoni l-kuntest li fih dan jintuża u l-għanijiet imfittxija mil-leġiżlazzjoni li dan jagħmel parti minnha (sentenza tal-5 ta’ Mejju 2022, DSR – Montagem e Manutenção de Ascensores e Escadas Rolantes, C-218/21, EU:C:2022:355, punt 29 u l-ġurisprudenza ċċitata).
25 Għaldaqstant, fir-rigward, fl-ewwel lok, tat-tifsira normali tal-kliem użat f’din id-dispożizzjoni u, b’mod partikolari, tal-espressjoni “djar [residenzi] privati”, għandu jiġi rrilevat li l-kelma “residenza” tindika ġeneralment proprjetà immobbli, jew mobbli, jew parti minnha, intiża għal użu residenzjali u li għalhekk isservi bħala residenza għal persuna waħda jew iktar. Barra minn hekk, l-aġġettiv “privat” jippermetti li ssir distinzjoni mir-residenzi mhux privati, bħar-residenzi għall-persunal jew ukoll lukandi (sentenza tal-5 ta’ Mejju 2002,DSR – Montagem e Manutenção de Ascensores e Escadas Rolantes, C-218/21, EU:C:2022:355, punt 34).
26 Minn dan jirriżulta li s-servizzi ta’ rinnovazzjoni u ta’ tiswija msemmija fil-punt 2 tal-Anness IV tad-Direttiva dwar il-VAT għandhom jirrigwardaw proprjetajiet użati għal finijiet ta’ residenza privata, filwaqt li s-servizzi relatati mal-proprjetajiet użati għal finijiet oħra, bħal finijiet kummerċjali, ma humiex koperti minn din id-dispożizzjoni (sentenza tal-5 ta’ Mejju 2022, DSR – Montagem e Manutenção de Ascensores e Escadas Rolantes, C-218/21, EU:C:2022:355, punt 35).
27 Sa fejn, konformement mal-ġurisprudenza mfakkra fil-punti 25 u 26 ta’ din is-sentenza, is-servizzi msemmija fil-punt 2 tal-Anness IV tad-Direttiva dwar il-VAT jirrigwardaw proprjetajiet li jservu bħala residenza għal persuna waħda jew iktar u li jintużaw għal finijiet ta’ residenza privata, mill-formulazzjoni ta’ din id-dispożizzjoni jirriżulta li din tal-aħħar tirreferi għall-użu effettiva ta’ dawn il-proprjetajiet għal finijiet residenzjali. Fil-fatt, kemm il-kunċett ta’ residenza kif ukoll ir-rekwiżit ta’ użu ta’ proprjetà jirreferu għal użu konkret tagħha.
28 Għaldaqstant, għandu jitqies, fid-dawl tal-formulazzjoni tal-punt 2 tal-Anness IV tad-Direttiva dwar il-VAT, li, minn naħa, proprjetà immobbli li, filwaqt li tibbenefika minn awtorizzazzjoni għal finijiet residenzjali, ma hijiex użata b’mod effettiv għal dan l-għan fid-data li fiha s-servizzi ta’ rinnovazzjoni jew ta’ tiswija inkwistjoni jitwettqu ma taqax taħt il-kamp ta’ applikazzjoni ta’ din id-dispożizzjoni. Min-naħa l-oħra, huma esklużi mill-kamp ta’ applikazzjoni tal-imsemmija dispożizzjoni s-servizzi ta’ rinnovazzjoni jew ta’ tiswija li jirrigwardaw proprjetajiet li, fid-data tat-twettiq ta’ dawn is-servizzi, jintużaw mill-proprjetarju tagħhom għal finijiet kummerċjali jew ta’ investiment.
29 Fit-tieni lok, il-kuntest li taħtu jaqa’ l-punt 2 tal-Anness IV tad-Direttiva dwar il-VAT jikkorrobora l-interpretazzjoni li tgħid li r-rata mnaqqsa tal-VAT tapplika biss għal servizzi ta’ rinnovazzjoni u ta’ tiswija li għandhom bħala suġġett proprjetajiet li effettivament jintużaw għal finijiet residenzjali.
30 Fatt, l-ewwel nett, din id-dispożizzjoni, sa fejn tippermetti l-applikazzjoni ta’ rata mnaqqsa tal-VAT, tikkostitwixxi deroga mill-prinċipju tal-applikazzjoni tar-rata normali u għalhekk għandha tiġi interpretata b’mod strett (ara, f’dan is-sens, is-sentenzi tad-19 ta’ Diċembru 2019, Segler-Vereinigung Cuxhaven, C-715/18, EU:C:2019:1138, punt 25, kif ukoll tal-5 ta’ Mejju 2022, DSR – Montagem e Manutenção de Ascensores e Escadas Rolantes, C-218/21, EU:C:2022:355, punt 40).
31 It-tieni nett, minn qari flimkien tal-Artikoli 106 u 107 tad-Direttiva dwar il-VAT jirriżulta li, sabiex ikunu jistgħu jibbenefikaw minn rata mnaqqsa tal-VAT, is-servizzi elenkati fil-punt 2 tal-Anness IV ta’ din id-direttiva kellhom jiġu fil-parti l-kbira pprovduti direttament lill-konsumaturi finali. Issa, servizz ta’ rinnovazzjoni jew ta’ tiswija pprovdut lil kumpannija jew lil persuna fiżika li tkun il-proprjetarja ta’ residenza intiża li tintuża għal finijiet residenzjali mingħajr ma din ir-residenza madankollu effettivament tintuża għal dawn il-finijiet ma jistax jitqies li ġie pprovdut lil konsumatur finali, u lanqas servizz ta’ rinnovazzjoni pprovdut lil kumpannija jew lil persuna fiżika li tuża, fl-eżerċizzju tal-attività professjonali tagħha, proprjetà għal finijiet kummerċjali u mhux bħala residenza.
32 Fit-tielet lok, hekk kif jirriżulta mill-punti 31 sa 33 tal-konklużjonijiet tal-Avukata Ġenerali, interpretazzjoni tal-punt 2 tal-Anness IV tad-Direttiva dwar il-VAT fis-sens li biss is-servizzi ta’ rinnovazzjoni u ta’ tiswija li għandhom bħala suġġett proprjetajiet effettivament użati bħala residenza fid-data tat-twettiq tax-xogħlijiet jaqgħu taħt il-kamp ta’ applikazzjoni ta’ din id-dispożizzjoni hija konformi mal-għanijiet imfittxija mill-adozzjoni ta’ rata mnaqqsa, li hija intiża li tiffavorixxi lill-konsumatur.
33 Fil-fatt, għal imprenditur li għandu d-dritt li jnaqqas il-VAT tal-input, ma huwiex rilevanti jekk il-provvisti ta’ servizzi ta’ rinnovazzjoni jew ta’ tiswija humiex intaxxati bir-rata normali jew bir-rata mnaqqsa, peress li, fi kwalunkwe każ, huwa ser jinħeles mill-piż tat-taxxa relatata ma’ dawn il-provvisti permezz tal-eżerċizzju tad-dritt tiegħu għal tnaqqis tal-VAT. Għall-kuntrarju, l-applikazzjoni ta’ rata mnaqqsa għal dawn il-provvisti tiffavorixxi lill-konsumatur finali li effettivament jirrisjedi fil-proprjetà immobbli li hija s-suġġett tax-xogħlijiet u li ma għandux id-dritt għal tnaqqis tal-VAT tal-input.
34 Dan il-konsumatur jista’ għalhekk, permezz tal-applikazzjoni ta’ din ir-rata mnaqqsa, jibbenefika mis-servizzi ta’ rinnovazzjoni u ta’ tiswija tar-residenza li huwa effettivament juża għal finijiet residenzjali bi spiża inqas minn dik li huwa kien isostni li kieku dawn is-servizzi kienu ntaxxati bir-rata normali. Issa, l-element deċiżiv sabiex jiġi evalwat jekk il-konsumatur jistax ikun ivvantaġġat permezz tal-applikazzjoni tar-rata mnaqqsa tal-VAT jinsab fil-fatt li, fil-mument li fih tiġi ġġenerata l-ispiża, din il-proprjetà immobbli effettivament tintuża minnu għal finijiet residenzjali.
35 Fl-aħħar nett, fir-raba’ lok, għandu jiġi ppreċiżat li, sabiex jitqies li proprjetà immobbli hija effettivament użata għal finijiet residenzjali, ma huwiex neċessarju li din tkun okkupata matul it-twettiq tax-xogħlijiet mill-persuni li jirrisjedu fiha b’mod permanenti jew le. Minn naħa, użu effettiv għal finijiet residenzjali ma jinbidilx minħabba l-fatt li l-proprjetà tintuża biss għal ftit perijodi tas-sena. Min-naħa l-oħra, il-fatt li residenza privata ma tkunx okkupata matul ċertu perijodu ma jbiddilx in-natura ta’ residenza privata tagħha.
36 Fid-dawl ta’ dawn il-motivi kollha, ir-risposta għad-domanda preliminari għandha tkun li l-punt 2 tal-Anness IV tad-Direttiva dwar il-VAT għandu jiġi interpretat fis-sens li dan ma jipprekludix leġiżlazzjoni nazzjonali li tipprevedi l-applikazzjoni ta’ rata mnaqqsa tal-VAT għal servizzi ta’ tiswija u ta’ rinnovazzjoni ta’ residenzi privati bil-kundizzjoni li r-residenzi kkonċernati effettivament jintużaw bħala residenza fid-data li fiha jseħħu dawn ix-xogħlijiet.
Fuq l-ispejjeż
37 Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.
Għal dawn il-motivi, Il-Qorti tal-Ġustizzja (It-Tmien Awla) taqta’ u tiddeċiedi:
Il-punt 2 tal-Anness IV tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud,
għandu jiġi interpretat fis-sens li:
dan ma jipprekludix leġiżlazzjoni nazzjonali li tipprevedi l-applikazzjoni ta’ rata mnaqqsa tat-taxxa fuq il-valur miżjud għal servizzi ta’ tiswija u ta’ rinnovazzjoni ta’ residenzi privati bil-kundizzjoni li r-residenzi kkonċernati effettivament jintużaw bħala residenza fid-data li fiha jseħħu dawn ix-xogħlijiet.
Firem
* Lingwa tal-kawża: il-Portugiż.